1 <<Apa nda ili i na vaa yuwan adama vu tawa le, adama a yuwaan mu ulinga u tsuganu: vu tara ma̱dindim na̱ a̱giri'i e re aza a na a̱ ri na̱ mɓa̱la̱ shi. 2 Reve vu yuwan opopofu a na a̱ ri na̱ wolilo shi a yira i yitabo i lashi, na akala a na a̱ ja̱mba̱ra̱i na̱ mani'in n ne emeshen a na a putalai mani'in n. 3 Vu zuwa le a aasaka reve vu ta̱wa̱ ne ele pe. Reve waru vu ta̱wa̱ na̱ ma̱dindim'm na̱ a̱giri'i ere'e.>> 4 Reve vu ta̱wa̱ na̱ Haruna no olobo a̱ yi o una̱ntsu wo Oogodo o Uga'asusa'an reve vu sa'a le na̱ mini. 5 Reve vu tara a̱tugu'u na̱ mokoɗi mo utugu nu utugu u epo vo oto Haruna, epod'u na apaɗi o oosonu a̱ ma̱ka̱ka̱n. Vu nla̱a̱ yi epod'u na̱ gbakala sa'ani uɗavu wu ukere'e. 6 Vu nla̱a̱ yi okokolo a aci, reve vu nla̱ makpata ma zinariya'a o okokolo'o. 7 Reve vu tara mani'in n mo utsusun wa ganu reve vu tsuwa̱n yi a aaci vu tawa yi. 8 A̱vu vu ta̱wa̱ no olobo a̱ yi vo to le mukoɗi ma̱ a̱tugu. 9 Reve vo oto le ili i ma̱nla̱ a aci. Reve vu nla̱a̱ Haruna no olobo a̱ yi igbakala. Tsuganu tsu to o'wo za le babu ukotu, ne tsu nda tsa ɗa vaa katala Haruna no olobo a̱ yi tsugbain. 10 Vu ta̱wa̱a̱ na̱ ma̱dindim'm e elime o Oogodo o Uga'asusan, reve Haruna no olobo a̱ yi a̱ kuruwa̱ yi ekere a aaci. 11 Reve vu paɗa yi a̱ ma̱ka̱ka̱n ma̱ A̱sulazuva o uwata wo Oogodoꞌo. 12 Vu kene mpasa m ma̱dindim'm reve vu tsun a avana a masa'a na aakatsu a̱ wu, reve vu tsun za na buwai e ikyun i masa'a'a. 13 Reve vu tawa mani'in ma na ma̱ ɓa̱ruyi iliya̱tsuma̱ suru, na asuvu na a'ilu ra ra ra na̱ mani'in me le, reve vu kula̱to le a masa'a'a. 14 Agba vu tara inama i ma̱dindim'm nu ukwan ni iliya̱tsuma̱ ya̱ yi a̱ tyo a alanga o ucina̱ wu uva̱la̱ta̱ vu kula̱to le, kucci vu unusu u ɗa. 15 Reve vu tara a̱a̱giri'i a̱ ta̱, reve Haruna no olobo a̱ yi a̱ kuruwa̱ yi ekere e le a aaci. 16 Reve vu paɗa yi a̱vu vu tara mpasa ma̱ yi vu kyo'onu le a̱ nge'en m masa'a'a suru. 17 Vu paɗa a̱a̱giri'i'i mupaɗi mupaɗi, reve vu za̱'wa̱ iliya̱tsuma̱'a̱ na ana, vu zuwa le oɓolo na aaci'i na apaɗi apaɗi'i. 18 Reve vu kula̱to ma̱dindim'm suru a masa'a'a. A̱yi ɗa kucci vu ukula̱tosu e ekere a̱ A̱sulazuva, ma̱guru mo uyo'o kuci na a cayi A̱sulazuva na akina. 19 Reve vu tara a̱a̱giri'i a na a buwai, reve Haruna no olobo a̱ yi a̱ kuruwa̱ yi ekere e le. 20 Reve vu paɗa yi, reve vu kene mpasa ma̱ yi reve vu daɓa ilege ya atsuvu o usa'ani wa Haruna no olobo a̱ yi. Reve waru vu daɓa a akatsu a gbagbain e ekere a sa'ani e le na akatsu a gbagbain a ana o usa'ani e le. Reve vu kyo'onu mpasa nna m buwai a̱ nge'en m masa'a'a suru. 21 Reve vu kene mpasa a masa'a'a na̱ mani'in mo utsusun, reve vu kyo'onuwo Haruna no olobo a̱ yi na̱ a̱tugu e le. Ne ɗa a̱yi no olobo a̱ yi na̱ a̱tugu e le a tawa le ta̱ aza a akiza. 22 Vu tawa mani'in ma̱ a̱a̱giri'i'i na̱ za wizan na̱ za na palai iliya̱tsuma̱ na asuvu o uga'an, na a'ilu e re na̱ mani'in ma na ma pala nle, oɓolo na aagutsu o ukere u sa'ani. (A̱yi nda a̱yi ɗa a̱a̱giri'i o ukatalasa u tsugbain.) 23 Diga a asaka o opopofu a na a̱ ri na̱ wolilo shi za na ri a̱ ma̱ka̱ka̱n ma̱ A̱sulazuva, reve vu tara pe aakpatali a̱ ta̱ na akala a na a yuwain na̱ mani'in ne emeshen. 24 Reve vu zuwa le suru e ekere a Haruna no olobo a̱ yi, reve a̱ 'ya̱sa̱n le kucci wu u'ya̱susa̱n e ekere a̱ A̱sulazuva. 25 Reve vu tara le e ekere e le, reve vu kula̱to le a masa'a oɓolo na̱ kucci vu ukula̱tosu wo o'wo ma̱guru mo uyo'o e ekere a̱ A̱sulazuva, kucci na a cayi A̱sulazuva wa akina. 26 Reve vu tara ma̱ka̱ka̱n ma̱ a̱a̱giri'i ma na a katalai Haruna tsuganu, a̱vu vu 'ya̱sa̱n yi kucci vu u'ya̱susa̱n e ekere a̱ A̱sulazuva. A̱yi ɗa woo o'wo akunda a̱ wu. 27 Reve vu tawa ma̱ka̱ka̱n na aagutsu a na a̱ 'ya̱sa̱in kucci vu u'ya̱susa̱n wu ukatalasa u tsuganu wa Haruna no olobo a̱ yi, diga e ili i na i ri za le. 28 A̱yi ɗa woo o'wo akunda a na aza a Isra'ila a̱a̱ da̱na̱ aa casu Haruna no olobo a̱ yi. A̱yi ɗa utafa u na aza a Isra'ila a̱a̱ da̱na̱ aa yuwusaan A̱sulazuva kucci muwwulai n le. 29 A̱tugu a akiza a Haruna o to o'wo ozo o olobo a̱ yi a̱ca̱pa̱ a̱ yi, adama a̱ tsun le mani'in reve waru a katala le tsuganu pe. 30 Ulobo u na u tarai tsuganu e ekere a̱ yi u to oto le rana cindere nnu u ta̱wa̱ o Oogodo o Uga'asusan u yuwan a̱ga̱nda̱ Upasu wa Akiza. 31 Vu tara a̱a̱giri'i o ukatalasa wa ganu'u, reve vu su'wan inama ya̱ yi uba̱ta̱ wa Akiza. 32 Reve Haruna no olobo a̱ yi a tama inama'a no opopofu a na a̱ ri a asaka o una̱ntsu wu uwata wo Oogodo o Uga'asusa'an. 33 Ele ɗa goon aa tama ili i na a cayi adama a matara mo ume mo unusu u le na a katala nle reve a tawa le nan ganu. Ko za ro aa tama le shi, adama a na a̱ ta̱ na akiza. 34 Waru ni inama yi ukatalasa u tsuganu ko opopofu a buwa hali she usana i kula̱to le. She a tama le wan, adama a na ili ya akiza i ɗa. 35 Vu yuwaan Haruna no olobo a̱ yi ili i na suru n damma nuwu. A ta yuwan ayin e cindere a yuwusan a̱ga̱nda̱ o ukatalasa u le. 36 Urana suru vu paɗa ma̱dindim ma̱ kucci adama a matara mo ume mo unusu. Vu yuwaan masa'a'a a̱buki vu tsuwa̱n yi mani'in adama vu tawa yi vo o'woto yi cece. 37 Vu yuwan rana cindere a yuwusan a̱buki a matara mo ume mo unusu adama a masa'a'a reve vu ka̱mba̱to yi na akiza. Ne ɗa masa'a'a wa̱a̱ da̱na̱ na akiza suru suru. Waru ili i na i ju'wa̱n niyi suru u to o'wo na akiza. 38 Apa ili na ya̱a̱ da̱na̱ a paɗasa a masa'a usana suru: mugiri'i n re ma a'wan a̱ ta̱ ta̱. 39 Vu ca za ta̱ nu usana, za na buwai waru nu ulivu. 40 Oɓolo na̱ ma̱giri'i mo ufaru vu ca ukunzuwu u ta̱ u yira i lashi a̱tsuma̱ a kupa ma na a̱ ja̱mba̱ra̱i na akapi a makundatsu a mani'in ma̱ zetun ma na o kpokoi, na akapi a makundatsu a masayan ma̱ ina̱bi ucasu wi ili yo oso. 41 Reve vu paɗa ma̱giri'i ma na a buwai nu ulivu, reve vu ca yi oɓolo nu ucasu wi ishina ni ili yo oso ya̱ yi tsu za vu usana ma̱guru mo uyo'o, ili i na a cayi A̱sulazuva na akina. 42 A̱yi nda a̱yi ɗa woo o'wo kucci vu ukula̱tosu u na a̱ ri n yuwusan o una̱ntsu wo Oogodo o Uga'asusan a̱ ma̱ka̱ka̱n ma̱ A̱sulazuva diga gogo hali a̱ tyo mantsa suru, uba̱ta̱ u na maa ga'an na̱ a̱ɗu n yuwan adanshi na̱ a̱ɗu. 43 Lo ɗa waru maa ga'an na ama a Isra'ila, waru tsugbain tsa̱ va̱ tso to o'woto uba̱ta̱'a̱ na akiza. 44 <<Ne ɗa maa tawa Oogodo o Uga'asusa'an na̱ masa'a'a na akiza, waru n ta tawa Haruna no olobo a̱ yi a yuwaan mu a̱ga̱nda̱ a tsuganu. 45 Reve n da̱nu a̱tsuma̱ a ama a Isra'ila waru mo o'wo A̱sula̱ e le. 46 E te reve a na a̱mu ɗa A̱sulazuva A̱sula̱ e le, za na uta̱ nle diga e iɗa ya Masar adama n da̱nu e memere me le. A̱mu ɗa A̱sulazuva A̱sula̱ e le.>>