1 <<Vu yuwan masa'a ma akpata o uɗanga akashiya, uga'an wa̱ yi na̱ washin wa̱ yi una̱ta̱ udasuwu wa ana ucindere na akapi, mishin ma̱ yi waru udasuwu wa ana una̱shi. 2 Vu yuwan avana o obolu mu upasu na̱shi'i suru, avana'a na̱ masa'a'a a̱ da̱na̱ ili i ta̱ uɓoluloi, reve vu sura masa'a'a na̱ rumushili. 3 Vu yuwaan yi mpondo adama o ɓoloto okomo, ni isheburu na ataɗa ni ikune ya akatsu na ayimba a̱ ma̱pura̱ ma akinkina. Vu yuwan itana yu ulinga ya̱ yi suru na̱ rumushili. 4 Vu yuwaan masa'a'a uzatsuwata wu rumushili, reve vu yuwan nkawani mu rumushili o obolu a̱ na̱shi o uzatsuwata'a. 5 Reve vu zuwa yi za̱la̱ va aci a masa'a'a adama wo o'wo e memere ma masa'a'a. 6 Vu yuwaan masa'a'a aɗanga o uɗanga u akashiya, reve vu sura le na̱ rumushili. 7 Vo oto aɗanga'a a nkawani'i cine oo o'wo e eɓele e re ma masa'a'a nna aa tanu yi. 8 Vu yuwan masa'a'a uka̱'un na akpata a washin. Vu yuwan yi cine o roco nuwu zuva masasan tsoyi. 9 Vu yuwaan waru ukowo'o amuna a na a yuwain no okoro a sa'ani uɗavu, o upasu wu uyagi uga'an wu umuna'a u da̱na̱ ana ukpaku na̱ kupoton (150). 10 Na atsura ushin na̱ nda̱na̱ta̱ ushin u le a̱ da̱na̱ za vu rumushili agba koroto na̱ wunla̱ta̱ u le a̱ da̱na̱ aza a azurufa. 11 Upasu wu ugana waru u da̱na̱ na amuna, uga'an wa̱ yi udasuwu wa ana ukpaku na̱ kupoton (150), atsura a̱ yi ushin na̱ nda̱na̱ta̱ n le ushin a̱za̱ a̱ rumushili ushin agba nkoroto ma atsura'a na̱ wunla̱ta̱ u le a̱ da̱na̱ aza a azurufa. 12 Upasu wa̱ a̱livu wu ukowo'o, a yuwaan yi umuna wu uga'an kupocindere no ozo o ton, na atsura kupa na̱ nda̱na̱ta̱ kupa. 13 Upasu wa asana na̱ elime o ukowo'o u da̱na̱ udasuwu wa ana kupocindere no ozo o ton. 14 Umuna u na u rawai udasuwu wa ana ushin ne ejere na akapi u da̱na̱ upasu u ta̱ wu u'uwata, na̱ a̱shuwutsu a ta'atsu na̱ nda̱na̱ta̱ n ta'atsu. 15 Ne ɗa waru upasu we ire u da̱na̱ nu umuna u na u rawai udasuwu wa ana ushin ne ejere na akapi, na̱ a̱shuwutsu a ta'atsu na̱ nda̱na̱ta̱ n ta'atsu.>> 16 <<Vu yuwaan u'uwata wu ukowo'o umuna uga'an wa̱ yi ana mata'atsu. Umuna'a u da̱na̱ mini ma̱ bulu nu ushili u ma̱ɗiya̱ nu ushili u san no okoro a sa'ani o uɗavu nu ulinga wu ukere. A yuwaan yi a̱shuwutsu a̱ na̱shi na̱ nda̱na̱ta̱ n na̱shi. 17 A̱shuwutsu a na a̱ ka̱nda̱ruwa̱i ukowo'o suru a yuwaan le wunla̱ta̱ na̱ koroto azurufa, na̱ nda̱na̱ta̱ mu rumushili. 18 Uga'an wu ukowo'o wo o'wo ana ukpaku na̱ kupoton (150), washin waru ana kupocindere na amuna o uɗavu wo okoro a sa'ani ana ucindere na akapi na̱ nda̱na̱ta̱ mu rumushili. 19 Itana i na aa yuwan ulinga wo oogodo o uga'asusa'an suru ni irumu i ma̱shuwa̱ ma̱ yi suru ni ili i ma̱shuwa̱ mo ukowo'o suru, na̱ rumushili ɗa aa yuwan le.

20 <<Vu zuwa aza a Isra'ila a̱ ta̱wa̱a̱ na̱ mani'in n ma̱ zetun ma na a pishai cece adama a fitila'a adama u da̱na̱ a madala kuci. 21 Pe o Oogodo o Uga'asusan reve Haruna no olobo a̱ yi a zuwa fitila'a a̱ ma̱ka̱ka̱n ma̱ A̱sulazuva a madala kuci usana hali a̱ tyo ulivu a alanga o umuna u na u ri elime e ili yi Nzuwulai. A̱yi nda ili i na aza a Isra'ila a̱ ri n yuwusan ɗa a̱a̱ bula̱ shi ele na̱ muwun mu gundo le.