1 A̱vu A̱sulazuva a damma Musa, 2 <<O urana wu ufaru u woto wu ufaru vu ta̱ shuwa̱ Oogodoꞌo, Oogodo o Uga'asusan. 3 Vu ta zuwa Akpati a Nzuwulai'i a̱tsuma̱ a̱ yi, reve vu sa̱ga̱do a̱ba̱jini o umuna wu una̱ntsu za na e geshe Akpati'i. 4 Vu to oto apada'a pe, a̱vu vu foɓo ɗe itana yu ulingaꞌa zuva va̱ yi. Vu to oto wisawatan wi ifitila'a pe, reve fo vu foɓo ifitila'a. 5 Vu ta zuwa masa'a ma zinariya ma na a̱ kula̱tosu a̱tsuka̱ a̱ ma̱guru'u elime a Akpati a Nzuwulai'i, a̱vu vu sa̱ga̱do umuna o una̱ntsu wo oogodoꞌo.

6 <<Vu zuwa masa'a ma zinariya ma̱ a̱tsuka̱ a̱ ma̱guru ma̱ kucci vu ukula̱tosu'u o una̱ntsu wo Oogodo o Uga'asusa'an, 7 Vu ta zuwa a̱ba̱jini a aasa'atsu'u e memere mo Oogodo o Uga'asusa'an na̱ masa'a'a, a̱vu vu tsun pe mini. 8 Vu ta̱ ru'wa̱ ukowo a̱ ka̱nda̱ruwa̱, a̱vu vu sa̱ga̱do umuna wu una̱ntsu wu ukowo'o. 9 Vu ta tara mani'in mo utsusu'un, a̱vu vu tsun Oogodo a aagalaci'i ni ili i na i ri pe'e suru, vu tawa yi na akiza, ni itana i na i ri pe suru, adama wo o'wo akiza. 10 Vu ta̱ tsuwa̱n masa'a ma̱ kucci vu ukula̱tosu'u ni itana yu ulinga ya̱ yi suru mani'in, vu ka̱mbuwa̱ yi na akiza. Tsundolo tsa ɗa masa'a'a wo o'wo na akiza a̱bunda̱ lon. 11 Vu tsun aasa'atsu'u na̱ wisawatan wa̱ yi mani'in, reve vu ka̱mbuwa̱ yi wo o'wo na akiza.

12 <<Vu ta̱wa̱ na̱ Haruna na̱ muwun ma̱ yi mo olobo o una̱ntsu wo Oogodo o Uga'asusan, reve vu sa'a le na̱ mini. 13 A̱vu vo otowo Haruna itana ya akiza, vu ta̱ tsuwa̱n yi mani'in mo ndolo, vu ka̱mba̱to yi wo o'wo na akiza, adama u yuwaan mu a̱ga̱nda̱ a tsuganu. 14 A̱vu vu ta̱wa̱to olobo a̱ yi elime, a̱vu vo oto le okoɗi a̱ a̱tugu. 15 Vu tsun le mani'in cine vu tsuyin dada le, adama a yuwaan mu a̱ga̱nda̱ a tsuganu. O utsusun u ndolo a tawa le ta̱ o o'wo nan ganu hali a̱ tyo a mantsa me elime e le suru.>> 16 Musa yuwan ta̱ ili suru tsoyi cine A̱sulazuva a damma niyi.

17 A̱ shuwa̱ ta̱ oogodoꞌo o urana wu ufaru u woto wu ufaru wa aa'wan e ire. 18 Ana Musa shuwa̱i oogodoꞌo, u shuwa̱ ta̱ nda̱na̱ta̱ ma̱ yi, reve u 'ya̱sa̱n akpata a̱ nge'en o una̱ntsu a̱ yi, reve u oto aɗanga'a, ɗaɗa u 'ya̱sa̱in atsura. 19 A̱vu wu pala oogodoꞌo na aapalutsu, reve waru wu pala le na aapalutsu, cine A̱sulazuva a damma niyi.

20 A̱vu u tara Nzuwulai'i a̱vu u zuwa yi a akpati'i, a̱vu wo otoloi aɗanga'a a akpati'i, a̱vu u zuwa ikpa̱ta̱tsu i matara mo ume mo unusu'u zuva va̱ yi. 21 Reve wo oto akpati'i o oogodoꞌo. A̱vu u sa̱ga̱do umuna wu una̱ntsu'u na we geshe Akpati'i, cine A̱sulazuva a dammai Musa.

22 U zuwa ta̱ apada'a Oogodo o Uga'asusan, upasu wu ugana wo oogodoꞌo, a alanga o umuna'a. 23 Reve waru u gere opopofu ɗe a apada'a a̱ ma̱ka̱ka̱n ma̱ A̱sulazuva, cine A̱sulazuva a dammai Musa.

24 U zuwa ta̱ wisawatan u fitila'a a̱tsuma̱ o Oogodo o Uga'asusa'an, a̱ nka̱la̱la̱i na apada'a e eɓele o uyagi wo oogodo'o. 25 A̱vu u daɓa ifitila'a a̱ ma̱ka̱ka̱n ma̱ A̱sulazuva, cine A̱sulazuva a dammai Musa.

26 A̱vu waru u zuwa masa'a ma zinariya'a a̱tsuma̱ o Oogodo o Uga'asusa'an, elime o umuna'a. 27 A̱vu u kula̱to a̱tsuka̱ a̱ ma̱guru zuva masa'a'a, cine A̱sulazuva a dammai Musa. 28 Reve waru u sa̱ga̱do umuna wu una̱ntsu wo oogodoꞌo.

29 U zuwa ta̱ masa'a ma̱ kucci vu ukula̱tosu'u zuzu nu u'uwata wo Oogodoꞌo, reve u ca ɗe kucci vu ukula̱tosu na̱ kucci vu ucasu wi ishina, cine A̱sulazuva a dammai Musa.

30 Reve waru u zuwa aasa'atsu'u e memere mo Oogodo o Uga'asusa'an na̱ masa'a'a, reve u tsun pe mini adama a masa'a me ekere na ana. 31 A̱yi ɗa Musa na̱ Haruna na̱ muwun ma̱ yi a sa'asayi ekere na ana. 32 A tsu sa'a ta̱ mantsa ma na aa uwa a̱tsuma̱ o Oogodo o Uga'asusa'an, na̱ mantsa ma na aa rawa zuzu na̱ masa'a'a, cine A̱sulazuva a dammai Musa.

33 A̱vu u yuwan ukowo'o a̱ ka̱nda̱ruwa̱ oogodoꞌo na̱ masa'a'a, a̱vu u sa̱ga̱do umuna wu una̱ntsu wu ukowo'o. Tsundolo tsa ɗa Musa kotoi ulinga wa̱ yi.

34 Reve eleshe a pala Oogodo o Uga'asusa'an, reve tsugbain tsa̱ A̱sulazuva tso shiton Oogodo a agalaci'i. 35 Musa gura uwa pe o Oogodo o Uga'asusa'an shi adama a na eleshe'e a pala yi ta̱, waru tsugbain tsa̱ A̱sulazuva tso shiton ta̱ Oogodo a agalaci'i.

36 A̱tsuma̱ a mmalu n le suru, mantsa ma na suru a̱ 'ya̱sa̱in eleshe'e zuva vo Oogodo a agalaci'i, a̱vu ama a Isra'ila e reme mmalu. 37 Agba nna̱ a̱ 'ya̱sa̱n eleshe'e shi, ele fo e reme mmalu'u shi, she urana u na a̱ 'ya̱sa̱n niyi. 38 Eleshe a̱ A̱sulazuva a̱ tsu da̱na̱ ta̱ zuva vo Oogodo a agalaci'i nu urana, na ayin gba akina a ɗa a̱ tsu da̱na̱ pe a̱tsuma̱ e eleshe'e e esu a aza a Isra'ila suru a̱tsuma̱ a mmalu n le suru.