1 Dawudaa bɛtina.

Alatala, n ma maxandi xuiin namɛ!

I tuli mati n xuiin na.

N yabi i ya tinxinna nun i ya hinanna nin.

2 I nama n tan i ya walikɛɛn makiti,

bayo muxu yo mi tinxin i tan yɛtagi.

3 N yaxuna n sagatanma,

a yi n nabira bɔxɔni,

a yi n lu dimini

alo muxu singe faxaxine.

4 Wɛkilɛn bata ɲan n yi,

n sɛnbɛ mi fa na sɔnɔn.

5 N na n mirima waxati danguxine ma.

I feen naxanye birin nabaxi,

n na n mirima ne ma,

n na n mirima i kɛwanle ma.

6 N na n yiine tima i tan nan xa.

N niin xaraxi i yɛtagi

alo bɔxɔ xarena.

Bɛti xuini te.

7 Alatala, n yabi iki sa!

N niin ɲanmatɔɔn na a ra.

I nama i yɛtagin luxun n ma.

Xanamu n sama faxa muxune fari nɛn.

8 Benun xɔtɔnni,

i xa n yabi i ya hinanni.

Amasɔtɔ n na n yigi saxi i tan nin.

A yita n na

n lan n xa sigan ti

kiraan naxan xɔn.

Amasɔtɔ n na n niin taxuxi i tan nan na.

9 Alatala, n xunba n yaxune yii.

N na n luxunxi i tan nan fɛma.

10 N xaran i sagoon ligan ma,

bayo n ma Ala nan i ra.

I ya Nii faɲin xa n xali bɔxɔ faɲini.

11 Alatala siimayaan fi n ma i xinla fe ra.

I xa n ba tɔrɔni i ya tinxinni.

12 N yaxune dɛ xidi i ya hinanni.

N yɛngɛfane halagi,

amasɔtɔ i ya walikɛɛn nan n na.