1 Dawudaa bɛtina, bɛti baane kuntigin xa, Yedutun xa.

2 N bata a fala, n naxa,

"N na n kɛwanle rakɔrɔsima nɛn,

alogo n dɛ xuiin nama n bira yulubini.

N mi fa fala yo tiyɛ muxu ɲaxine yɛɛ xɔri."

3 N yi n dundu,

n yi n naxara,

n mi yi fala yo tima

hali fe faɲina,

koni n ma sɔxɔlɛn yi siga fari sɛ tun!

4 N bɔɲɛn yi wolon n kui.

N to yi n mirima a ma,

a yi n kuiin gan fɔlɔ

alo tɛɛna.

N yi falan ti fɔlɔ, n naxa,

5 "Alatala,

n siin soge dɔnxɛn yita n na

e nun a yatɛ saxina.

I xa n nakolon

a n ma siimayaan mi buma."

6 I tan nan n ma lɔxɔne yatɛn nadungixi ayi.

Sese mi n siin waxatin na

i yɛɛ ra yi.

Adamadiin birin buma nɛn

alo foyedin gbansan!

Bɛti xuini te.

7 Nininna nan gbansan a tan na.

Muxuna a masigama,

a feen ligama koni fuyan!

A nafunla malanma,

koni naxan a sɔtɛ a xanbi

a mi na kolon.

8 Marigina, n fa n xaxili tima nanse ra nayi?

N na n yigin sama i tan nan yi.

9 N nakisi n yulubin birin ma.

I nama tin daxune yi gele n ma.

10 N yi dunduxi nɛn.

N mi yi fala yo tima.

Amasɔtɔ i tan nan ito ligaxi n na.

11 I ya furen ba n ma,

benun i xa n naɲan tɔrɔni.

12 I muxun maxadima a hakɛna fe ra

i yi a hakɛn saran a ra.

I muxuna nafunle kalama alo xiine.

Adamadi yɛtɛɛn ligaxi nɛn alo foyedina.

Bɛti xuini te.

13 Alatala, n ma maxandi xuiin mɛ.

I yi i tuli mati n ma mawuga xuiin na.

N na wuga, i nama i dundu.

I ya xɔɲɛn nan tun n tan na sigatini,

alo n benbane yi kii naxan yi.

14 N yiba singen

alogo n xa sɛwa benun n xa dangu,

benun n xa faxa.