JOB 22

Bin dalip e welthin

Elifaz

1,2 Gur bay be’, nib th’abi gonop,

ni gomang e bay angin ngak Got?

3 Gur tin ga be rin’ nib mat’aw e be yib fel’ngin ngak Got,

fa gur fa’anra um par ni gab yal’uw ma bay buchu’uw i ayuw riy ngak?

4 Gathi bochan e bay madgun Got u wun’um

aram fan ni be puwan’ ngom ma be fekem i yan ko pufthin.

5 Danga’, ya bochan e kay gi yo’or e denen rom;

bochan urngin e kireb ni ga be ngongliy.

6 Um fek e mad rok be’ ni walagem ngam pag ndakuriy e mad ni nge yin’,

ni nge yan nga puluwon e salpiy rom ni fek ni ku ra sulweg ngom.

7 Dam pi’ e ran ko pi’in ka ra magaergad,

ma ga siyeg ni ngam pi’ gan e pi’in karm’ad ko bilig.

8 Um maruwel nga gelngim nge liw rom

ni nge milsuwon fare but’ ngom ni ga’ngin.

9 Gathi kemus ni da mu ayuweg e pi’in ke yim’ figirngirad,

ya ku mu mororo’ ma ga gafgownag e pi’in kanim’ rorad.

10 Ere chiney e ke liyegem e wup,

ma ke kolem e marus riy nib tomgin.

11 Ke ingem e lumor ndabkiyag ni mu guy ban’en,

ma ran ni sugbur e ke tharayem.

12 Gathi ma par Got ko thal nth’abi tolang e tharmiy

ngi i changar nga daken e pi t’uf nga but’, ni yug aram farad tolang?

13 Ma ga be fith e chiney ni be lungun, "Ba mang e manang Got?

Ke rungrung e manileng ngak — ere bu uw rogon ni nge pufthin nagdad?"

14 Ga be leamnag ni manileng nib dub’ag e kening owchen’,

be yan u lanelang u daken e palpalthib.

15 Mog, kar mu t’ar u wun’um ni ngam lek’,

wo’en e pi’in kireb ni gubin ngiyal’?

16 Ku dawor i taw nga nap’rad,

miyad un ko sugbur ngar man’gad.

17 Irera’ e pi girdi’ nra pi’ed keru’rad ngak Got

miyad leamnag ndariy ban’en nrayag ni rin’ ngorad.

18 Yug aram rogon ni Got e fal’eg rogorad —

Dabyag rog ni nggu nangfan e leam ko pi’in kireb.

19 Ma felan’ e girdi’ nib manigil ma girdi’ ni bfel’ e rorad e yad ma minmin

nnap’an ni yad ra guy e pi’in kireb ni kan gechig nagrad.

20 Urngin ban’en rok e pi’in kireb nma mogothgoth,

me tin nra magey riy e ra yik nge m’ay.

21 Job, chiney e ngam fal’eg e gapas u thilmew Got

ma dab ku’um tay ni bod ba to’ogor rom;

fa’an ga ra rin’ ni aray rogon, ma aram e ra fal’eg wa’atham.

22 Nge fel’ u wun’um e n’en ni be fil ngom;

ma ga cha’riy e thin rok u lanin’um.

23 Errogon, thingar mu sul ngak Got u fithik’ e sobut’an,

ma ga taleg gubin e kireb

ni yibe rin’ u lan e naun rom.

24 Mu n’ag e pi gol rom;

mu n’ag e gol rom nth’abi fel’ nga t’ay e lul’ nike mlik.

25 Mu tay Got ni Gubin ma Rayag Rok nge mang gol

nge silber ngom, ni kan ulunguy nib tolang ngalang.

26 Ma aram mu’um par ni gubin ngiyal’ nib pagan’um ngak Got,

ma ga pir’eg ni ir kenggin e felfelan’ ngom.

27 Nap’an ni ga ra meybil me fulweg taban,

ma ga tay nga tagil’ e tin mmicheg ngak ni ga ra rin’.

28 Ma urngin e tin ga ra ngongliy mra yan i aw ni bfel’,

ma tamilang e bayi gal’ e kanawo’ rom.

29 I Got e ma girengiy nga but’ e pi’in ba tolangan’rad

mma ayuweg e pi’in ba sobut’anrad.

30 Ra aywegem ni fa’anra bfel’ e rom,

ma ga be rin’ e tin ni bfel.