JOB 34

1,2 Gimed e girdi’ ni gonop, nri gimed ba llowan’;

mmotoyilgad e chiney ko mang e gu be yog.

3 Gimed ra ri’ lamen e ggan mi gimed nang nib bfel’,

ma gimed ra rung’ag e thin ni bfel’ ma damur nanged nib puluw.

4 Gadad e ngad guyed ko mini’ e ba sorok ko re tugthin ney.

5 I Job e be yog ni ir e bfel’ e rok,

ma Got e ke fek rok mat’wun.

6 Be fith ni be ga’ar, "Uw rogon ni nggu ban nggog ni gu ba kireb?

Rib ubchiya’ e maad’ad rog, machane dariy bangbangen e denen rog."

7 Ka’a mu guy be’ ni pumo’on ni bod aney i Job?

Dariy bingyal’ nike dag e liyor ngak Got.

8 Ba’adag daken e girdi’ ni kireb e leam rorad

ma yad ma cheag e pi’in tadenen.

9 Be yog ni dariy fel’ngin

ni ngan falwok ko tin nib magan’ Got ngay.

10 Mmotoyilgad ngog, gimed e pi’in gimed ra nangfan!

Gur, Got ni Gubin ma Rayag Rok e ra rin’ e kireb?

11 Ma pi’ puluwon ngak e girdi’ e n’en kar rin’ed

mma gechignag e girdi’ nrogon ni nge aw ngorad.

12 I Got, ni Gubin ma Rayag rok e der ma rin’ e kireb;

ma dariy bingyal’ nma sasalap ngak be’.

13 Gur, bay be’ ni pi’ gelngin Got?

Gur, bay be’ ni duwgiliy ni nge mil suwon e fayleng ngak Got?

14 Rachey ni fulweg Got fare athon l’ugun,

15 mra yim’ gubin e girdi’

nge sul ko ab bayay.

16 Ere ngam motoyil ngog, ni fa’anra ga ba gonop.

17 Mog, ga be turguy e kireb nga daken Got nib mat’aw?

Ga be leamnag ni ir e dabun e tin nib mat’aw?

18 Got e turguy ni nge gechignag e pilung nge pi tagagiyeg

ko ngiyal’ ni dariy farad ngabang ara ba kireb e gafarig rorad.

19 Der ma mang ko pi’in tagagiyeg

ma der ma fol ko pi’in fel’ rogon me pag e gafgow,

ya ir e sunmiy gubin e girdi’.

20 Rayag ni nge yim’ be’ nib tomgin nnep’.

Got e ma gad pa’ ko girdi’ ngarm’ad;

de mom’aw ngak ni nge thang e fan rok e pi madangdang.

21 Ma yaliy urngin e gachgach ko girdi’.

22 Dariy ba lumor nrayag

ni mithag ba tadenen rok Got.

23 Got e de t’uf rok ni nge duwgiliy e ngiyal’

ni nge yan e girdi’ nge pufthin nagrad.

24 De t’uf rok ni nge firtiy murung’agen

e pi tayugang’ mfini yin’ luwrad.

25 Bochan e manang ko mang e yad ma rin’;

be toyrad ni lukngun e nep’.

26 Ma gechignag e pi tadenen u p’eowchen e girdi’;

27 ni bochan e dakrir folwokgad rok

ma kar sabalbalyang nigedyad ko gubin e tin ni yog.

28 Yad ma motogal ngak e gafgow ngar yorgad ngalang ngak Got,

me rung’ag lungrad ni yad be man ayuw.

29 Fa’anra turguy Got ndariy ban’en ni nge rin’,

ma dariy be’ nrayag rok ni nge thibthibnag.

Ma fa’anra mithag owchen, mra par e girdi’ ni dariy ban’en nrayag rorad.

30 Dariy ban’en nrayag ni nge rin’ e pi nam

ni nge dabi gagiyeg nagrad e pi’in nde nang Got.

31 Job, ka mu puwofaynag e pi denen rom ngak Got

ma ka mu micheg ni dabkum denen bayay?

32 Kamog ngak Got ni nge dag ngom e kireb rom,

ma ke m’ag u wun’um ni ngam tal i ngongliy e kireb?

33 Faanra gabe puwan’ ko tin be rin’ Got,

ma ga be leamnag ni ra rin’ e n’en ni ga be finey?

Gur e ngam turguy, gathi gag;

mog ngomad e chiney e n’en ni gabe leam nag.

34 Be’ nib sul lanyan’ ngak e rib muduwgil nra pining e kefel’ ngay;

ma re mo’on nib gonop nra rung’ag e thin rog e ra yog

35 ni Job e be welthin u fithik’ e manan’

ma dariy ban’en ni be yog nib puluw.

36 Mu leamnag urngin e pin’en ni be yog Job;

ma bay i gagyel ngom ni be non ni bod be’ nib kireb e leam rok.

37 Ke puthuy e togopluw ko pi denen rok;

ma be moningnag Got u p’eowchadad ni gadad gubin.