JOB 15

Bin l’agruw e welthin

Elifaz

1,2 Job, pi thin nir e dariy fan! Thin ni dariy rogon!

3 Dariy be’ nib gonop nra non ni bod gur

ara i bigbigiy ir ko thin ni dariy rogon.

4 Fa’anra mang e yira fanay e tin ga be yog, ma dariy be’ nra yib madgun Got u wan’;

ma ku dariy be’ nra meybil ngak.

5 Fanam kireb e be gagyel ko thin rom;

ga be guy rogon ni ngam mith nga fon e thin ni bfel’ nifngin.

6 Dariy fan ni nggu turguy e kireb rom;

ya gubin bug e thin ni kamog e ke turguy e gechig rom.

7 Mog, ga be leamnag ni gur e en som’on nni gergel nigem?

Mog, ummoy u rom ko ngiyal’ ni i sunumiy Got e pi burey?

8 Mog, um rung’ag e pin’en ni i tanomnag Got?

Mog, i gur e sum e gonop ko girdi’ rom?

9 Dariy ban’en ni gamanang ni dagnanged.

10 Gonop romad e gu filed rok e pi pumo’on nike mat lolugrad —

ni pi’in yad ba ilal ko chitamam.

11 Mog, pi fnow rok Got ngom e yug ba achig u wun’um,

nge pi thin nib sumnguy ni yibe yog ngom?

12 Ke puw dakanam ma kam sap i damumuw ngomad.

13 Kam damumuw ngak Got ma kam togopluw ngak.

14 Rayag ni nge par ba girdi’ nib machalbog?

Rayag ni nge mat’aw be’ ngak Got?

15 Mangfan, ya Got e mus ko pi engel rok ma ku der pagan’ ngorad;

mus ngorad ma ku dar machalboggad u p’eowchen.

16 Gadad e gadad ma unum e kireb ni gowa ran;

errogon, gadad ba kireb; dariy ban’en ni gadad bfel’ ngay.

17 Job, ere mmotoyil ko n’en gu manang.

18 Pi’in ba gonop e ka ra filed e tin riyul’ ngog

ni ka ra filed rok e pi chitamangirad kakrom,

ma der mithaged buchu’uw riy.

19 Nam rorad e da immoy e milekag riy;

da immoy be’ riy nra waliyrad nga orel rok Got.

20 Be’ nib kireb nma gafgownag boch e girdi’

e bayi gafgow u n’umngin nap’an e yafos rok.

21 Bayi rung’ag lungun e morus ni be gogo’ ngalan tel,

me og e moro’ro’ ngak ko ngiyal’ ni be leamnag ndariy ban’en nra buch rok.

22 Dakuriy rogon me thay u pa’ e lumor,

ya bay bang i saydon u bang ni be sonnag ni nge thang e fan rok,

23 ma pi arche’ ni vulture e yad be son ni ngar longuyed e ldow rok.

Ma manang ni pi rran ni kabay ko yafos rok e go’ ba lumor;

24 ma riya’ ni bod ba pilung nib gel gelngin,

e be sonnag ni nge og ngak.

25 Ireram e tin wa’athan e cha’

nra i sakleg pa’ ngak Got,

ma be dariyfannag e En ni Gubin ma Rayag Rok.

26,27 Cha’nem e ba tolangan’ ma ba tatogopluw;

be tining ngalang e shield rok ni kari gelnag laniyan’

me mil i yan ni nge cham ngak Got.

28 Ireram e re mo’on ni kol e pi binaw u fithik’ e mael

me fek e pi naun nike mil e pi’in taferad,

machane bayi gathay e mael e pi binaw nem nge pi naun nem.

29 Dabyag ni par nib n’uw nap’an nib yo’or ban’en rok;

dariy ban’en ni fen nra par nib n’uw nap’an.

Mus nga fon u but’ mra m’ay ngabang,

30 ma dabithay u pa’ e lumor.

Bayi par ni bod bake gek’iy

nike urfiy e nifiy papa’ngin,

ma ke rurug e nifeng e flores riy kem’ay.

31 Fa’anra rib balyang ni tin kireb e be pagan’ ngay,

ma aram e puluwon ni yira pi’ ngak e kireb.

32 Ra daworitaw ko nep’ rok me mororoy,

ni bod ba pa’ i gek’iy ni dabkisul nge galunglung bayay.

33 Bayi par nike bod yu pa’ i grape nike mulmul wom’ngin ndawori lol;

ma bod ba ke gek’iy ni olive nike munugun e flores riy.

34 Pi’in ndariy fan Got u wan’rad e dabi yib e pi’in owcharad,

ma pi naun nni toy u fithik’ e sasalap e ra mogothgoth ko nifiy.

35 Irera’ e girdi’ nma leamnag e kireb ma yad ma rin’ e kireb.

ma ba sug gum’ircha’rad ko sasaliyab ni gubin ngiyal’.