JOB 31

1 Ku gu t’ar u wun’ug

ndariy bingyal’ ni nggu changar i darngal ngak be’ ni bpin.

2 Mang e ma rin’ Got ni Gubin ma Rayag Rok ngodad?

Uw rogon nma pi’ puluwon e pi ngongol nma rin’ e girdi’?

3 Ma pi’ e riya’ nge mogothgoth nge yib

ngak e pi’in yad ma rin’ e kireb.

4 Got e manang urngin e tin gu ma rin’;

be guy urngin yay ni gu be yif eg.

5 Gu be micheg u p’eowchen Got ndawor gu ngongliy e kireb,

ma dawor gguy rogon ni nggu bannag be’.

6 Got e nge thabthabel nigeg u daken e thabthabel nib puluw,

nge guy nri de kireb e rog.

7 Fa’anra ku gu pi’ keru’ug ko kanawo’ nib mat’aw,

ara ku gu pageg ke pagan’ug ko tin kireb,

ara ke alitnag e denen pa’ag,

8 me ere nge yim’ e woldug rog nge kireb,

ara yugu boch e girdi’ e nge mang yad e ra ked e woldug ni gu yung.

9 Fa’anra ke gabalan’ug nga le’engin be’ ni gamow bbuguliyoror,

kug mith u wuru’ e mab rok ngu’ug sonnag,

10 me ere ngi i lith e bpin rog e ggan rok reb e pumo’on,

mi i mol nga chob rok reb e pumo’on.

11 Ya mit ney e denen e rib gel e kireb riy ni gechig ni yima pi’ riy e yam’.

12 Ra bod e nifiy nu infiyerno nra longuy gubin ban’en rog nge m’ay.

13 Ra weliy reb e tapigpig rog ban’en nib togopluw ngog,

mu gu motoyil ngak nggu rin’ ngak e tin nib mat’aw.

14 Fa’anra da ug rin’ ni aram rogon, ma uw rogon me yag ni sabol owchemow Got?

Mang e gu ra yog ni fa’anra yib Got ni nge pufthin nigeg?

15 Got ni ir e sunumiyeg

e ku ir e sunumiy e tapigpig rog.

16 Dariy ba ngiyal’ ni gomanga kug siyeg ndab gu ayuweg e pi’in gafgow,

ma pi’in ni ppin nike yim’ figirngirad e dariy ba ngiyal’ ni gu pag bagyad nda gu ayuweg,

17 ara gu pag e pi’in ni kanim’ rorad ngarm’ad ko bilig ma gu be abich.

18 Ku gu ayuwegrad u n’umngin nap’an e yafos rog.

19 Nap’an ni gu ra pir’eg be’ nib t’uf e ayuw rok

nrib gafgow ni mus ko mad ma dabiyag ni nge chuw’iy,

20 mu gu pi’ e mad ngak nni ngongliy nga bunu’en e saf

nni fek ko fa ran’ i saf rog.

Ma aram e ra pining e sorok ngog u polo’ i gumircha’en.

21 Fa’anra ka’a gu bannag be’ ni kanim’ rok,

ni bochan e gu manang ni gu ra gel ngak u tafen e puf oloboch,

22 me’ere mang e yigi m’ing pa’ag nruw raba’;

me pof u kenginag.

23 Dabiyag ni nggu rin’ e mit nem e ngongol,

ya gu be rus ko gechig nma pi’ Got.

24 Dariy ba ngiyal’ ni pagan’ug ko pin’en ni pire’ ni bay rog,

25 ara gu uf ni bochan e pire’ ban’en rog.

26 Dawor gu meybil ko yal’ ni be mat ra’en,

ara pul nike yan i fel’ ram’en.

27 Dawor gu ma’alfath ni nggu tay fan e yal’ nge pul

ni gomanga ku gu faray pa’ag ni gu be liyor ko yal’ nge pul.

28 Gechig ko binem e denen e yam’;

ya be siyeg Got ni Gubin ma Rayag Rok.

29 Dariy bi’id nike gafgow e pi to’ogor rog me felan’ug ngay,

ara buch ban’en rorad nib gel e gafgow riy mu ggirig u wun’ug ngorad;

30 dawor gu denen ni gomang a ku gu yibiliyrad ni ngarm’ad.

31 Urngin e pumo’on ni yad be maruwel rog e yad manang

ni gubin ngiyal’ ni gu ma ayweg e pi milekag.

32 Ma gu ma fek e milekag nga tabinaw rog nggu ayuwegrad,

da gur ma pagrad ngar molod u kanawo’.

33 Boch e girdi’ e yad ma guy rogon ni ngar mitheged e denen rorad,

ma gag e da gur mithag e denen rog.

34 Dagur rusnag e tin gomang a bay i yog e girdi’;

dawor gu th’ab gulungag ara gu aw nga naun

ni gomang a kug rusnag nrichey nga ni moning nigeg.

35 Dariy be’ nra motoyil ko tin gu be yog?

Ya gu be micheg ni gubin bug e thin ni kugog e briyul’.

Nge mang Got ni Gubin ma Rayag Rok e nge fulweg lungug.

Pi thin nib togopluw ngog

e fa’an mang e ka ni yoloy nga but’ nge yag ni gguy,

36 ma gu ra yin’ nga daken pog ni gu ba uf ngay,

mu gu tay nga daken lolgeg ni bod e te’elyaw.

37 Mu gu weliy ngak Got urngin e tin kug rin’,

mu gu pug owcheg ngalang u p’eowchen.

38 Fa’an gomang a gu iring e binaw ni gu be woldug riy ni gu fek rok e pi’in ntafen,

39 ara gomang a ku gu way e ggan ni be yib riy,

fa kug pag e pi’in yad be muruwliy yad be yim’ ko uyongol,

40 ma are nge mang pan nge rchangal

e nge tugil nge luwan e wheat nge barley.

Kemus u roy e thin rok Job.