1,2 Job, de fel’ ni ngamog ni ga ba mat’aw u p’eowchen Got,

3 fa ngam fith Got ni nge lungum, "Mang e be rin’ e denen rog ngom?

Mang e kayag ngog ni bochan e da gur denen?"

4 Arme nggu fulweg lungum nge pi fager rom.

5 Mu changar ngalan e lang! Mmuguy feni tolang e pi manileng!

6 Fa’anra mu denen, mdariy ban’en nra buch rok Got.

Ma fa’anra mu ngongliy e kireb nib bo’or yay, ma gur, bay ban’en nra rin’ ngak Got?

7 Fa’anra ga ba mat’aw, ma gur bay e ayuw riy ngak Got?

Ri dariy ban’en rom nthangri yag ngak Got.

8 Pi denen rom e ma gafgownag boch e girdi’,

ma n’en ni ga ma rin’ ni bfel’ e ma ayuwegrad.

9 Nap’an ni yira gafgownag e girdi’, mar gel’gel’gad;

ni yad be yor ngak be’ ni nge aywegrad.

10 Ma dariy bagyad ni sul ngak Got, ni ir e sunmegrad,

nma pi’ e lagan’ ngorad ko ngiyal’ ni man e lang u puluworad.

11 Dar sulod ngak Got, ni ir e pi’ e gonop ngodad,

ni ba ga’ ko llowan’ rok e gamanman nge arche’.

12 U ra yor niged e ayuw, ma de fulweg Got taban,

ni bochan e yad ba tolngan’ ma ba kireb e leam rorad.

13 Dariy rogon ni ngar yorgad ngalang;

ya Got ni Gubin ma Rayag rok e der guyrad ma der rung’ag lamrad.

14 Job, ga be yog ni damur guy Got;

machane makdan’um ngam son — ya oloboch rom e bay u peowchen.

15 Ga be leamnag ni Got e dar ma gechig nigey,

ma der tetyan ko denen.

16 M’ay angin ni ngku’um welthin;

ya rib gagyel ndamur nang ko mang e ga be weliy.