JOB 38

I SOMOL ni fulweg lungun Job

1 Me welthin SOMOL u fithik’ ba nanyor nge yib laman ngak Job.

SOMOL

2 I gur mini’ ni ngam de’eriy rogon e tin nike m’ay i gonopiy rog

ni gur be’ ni dariy ban’en ni ga manang.

3 Mu sak’iy chiney ngalang nrogon e pumo’on

ngam fulweg e tin nggu fith ngom.

4 Ummoy u uw ko ngiyal’ ni gu sunumeg e fayleng?

Fa’anra er feni yo’or e tin ni ga manang, me’ere mu weliy nggu rung’ag.

5 Mini’ e duwgiliy ga’ngin e fayleng ni nge yan i par?

Mini’ e gad e fol ngay?

Go’ ga manang murung’agen e pin’ey?

6 Mang e ni reg e pi dugo’ ko fayleng nga daken?

Mini’ e ayliy e malang u tabthungen e fayleng?

7 Be puf e woch e rofen nem me tang e pi t’uf u ta’bang,

ma gubin pi chon e tharmiy e ra tolul niged e felfelan’.

8 I mini’ e ning e pi garog ni nge taleg e day

ko ngiyal’ ni ba’aram ni po’ u yin e fayleng nga wean?

9 I gag e gu upunguy e day ko manileng,

mu gu ing ko lumor.

10 Gu tay e gin nge mus e day riy,

mu gu loknag u wuru’ e garog.

11 Me lungug ngak, "Ngam mus u wur!

N’ew rom nib gel e nge mus u roy."

12 Job, bay ba ngiyal’ ni ka’a yugu

mog ni nge puf e woch me puf?

13 Ka’a yugu mu non me puf e woch nga daken e fayleng

nge rur e pi’in kireb ko yungi n’en ni yad be mith riy?

14 Tamilang e gagiyegnag e pi burey nge pi loway nge yan i par nike gagiyel

ni bod e m’ingm’ing u bmad,

ni ba gagyel ni bod e but’ ni th’ib ni ka ni pag e hang ngay.

15 Rran e kayigi tamilang u puluwon e pi’in yad ma ngongliy e kireb,

ni ir e ma telrad ko kireb ni yad be ngongliy.

16 Ka’a yugu mu’un ko pi alublub ni bay u t’ay e rigur?

Ka’a yugu mman u t’ay e rigur?

17 Ka’a yigi dag be’ ngom fapi garog

ni matnag ko fare fayleng ko yam’ nib lumor?

18 Ga manang feni ga’ e re fayleng ney?

Mu fulweg lungug ni fa’anra ga manang.

19 Ga manang e gin be yib e tamilang riy?

Ara ga manang e gin ni sum e lumor riy?

20 Rayag ni ngamog ngak e tamilang nge lumor n’umngin yang e gin ngranow riy

ara mu fulwegrow ko gin rbow riy?

21 Gu manang nrayag rom, ya kari yo’or e duw rom,

ya ummoy u rom ko ngiyal’ nsunumeg e fayleng.

22 Ka’a mu’un ko pi singgil ni ku gu cha’riy e ayis

nib munguy nge ayis nike el ngay nma mul u lanelang nga but’?

23 Ku gu tay be par ni fan ko ngiyal’ ni nggu pi’ e gafgow,

nge fan ko pi rran ni ngan cham ngan mael.

24 Ka’a mu’un ko gin ma yib e yal’ riy ngalang,

ara gin ma thow e nifeng riy u lan e ngek?

25 I mini’ e ke fu’og wol’ e ran ni fan ko n’uw ni ba ga’,

ma ke fal’eg kanawo’en e dirra’?

26 Mini’ e be gagiyegnag e n’uw be aw ko gin nder par be’ riy?

27 Mini’ e ma tarannag e but’ nib mlik’ nike finey e ran,

ni bochan e nge tugul e pan riy?

28 Gur bay e chitamngin e n’uw nge wa’angachal?

29 Mini’ e chitiningin e garbeb nge wa’angachal ni be ngal’ ni ayis,

30 nma piliyeg e ran nge par nike bod e malang

me pingeg daken e day nge ngal’ ni ayis?

31 Rayag rom ni ngam m’ag nga ta’bang fa medlip i t’uf ni kanog e Pleyades ngay,

ara mpithig e ren’en ni ir e ke m’ag fare ulung i t’uf ni kanog e Orion*38:31 ORION: Ba ulung i t’uf ntunguy fithingan ni ngi i puguran be’ nib sorok ko mokol gamanman ni Orion fithingan. ngay?

32 Mog, rayag rom ni ngu’um gagiyegnag e t’uf ko yan rorad u lanelang, ma ga pow’iy fa gal ulung i t’uf ni kanog e Dipper ni ba ga’ nge Dipper ni ba achig*38:32 Dipper ni ba ga’ nge Dipper ni ba achig: L’agruw ulung i t’uf ni bod ya’an baraba’ i ban’en ni bay kolngin ni yima l’ing e ran ngay. ngay?

33 Mog, ga manang e pi motochiyel ni be gagiyegnag lanelang

ma gur rayag ni ngam fanay ko tin nu fayleng ban’en?

34 Rayag ni ngam tolul ngamog ko pi manileng

miyad maluk nigem ko n’uw?

35 Ma fa’anra mu non ngak e uluch ni nge mat,

ma gur ra yib ngom nge ga’ar, "Tin kamog e nggu rin’?"

36 Mini’ e ma yog ngak e arche’ ni ibis*38:36 IBIS: Mmit i arche’ ni immoy u Egypt kakrom nra nge sugubur e lul’ ni Nile nge yib e ran riy nga daken e binaw mma yog. Aram rogon ni i leamnag e girdi’ e ngiyal’nem. e ngiyal’ ni nge sugubur e lul’ ni Nile,

ara mini’ e ma yog ngak e nimen ni dirra’ ni bayi aw e n’uw.

37 Mini’ e rib gonop nrayag rok ni nge the’eg e manileng

me ngololeg nge pu’og e n’uw,

38 ni n’uw nma elnag e fiyath nge yuchuwo’?

39 Mog, ga ma pir’eg e ggan nma kay e pi layon,

ma ga chuweg e bilig rok pifak e layon

40 ko ngiyal’ ni kar mithgad riy u lan e yiy,

ara gin kar pired riy u fithik’ e pan yad be son?

41 I mini’ e ma pi’ gan e pi arche’ ni raven?

ko ngiyal’ ni yad be gay e ggan ya ke yib e bilig ngorad,

ni be yor pifakrad ngog ni nggu pi’ e ggan ngorad?