1 Gadad gubin nni gergelegdad ni gadad ba me’waer ma dariy gelingdad.

Yafos rodad e ba ngoch ma ba sug ko oloboch.

2 Gadad ma ilal ngad mororaygad ni bod feni pay nma mororay e flores;

gadad ma ling ni bod e taglul’.

3 Got, mog ka ga ma guyeg,

ni ngam fekeg nga tafen e puf oloboch ngam pufthin nageg?

4 Dariy ban’en nib be’ech nrayag ni yib

rok ban’en ni bod feni alit e girdi’.

5 Ra be’ ma kan mu’ i duwgiliy n’umngin nap’an e yafos rok —

urngin e pul ni nge par nib fos.

Ka mu duwgiliy kamta’, ni dabkiyag i thilyeg.

6 Mu fek owchem romad ma ga pagmad;

mu pagmad nggu felfelan’gad ko biney e tamilang nib mo’maw’ e par riy, ni fa’anra yag romad.

7 Dabi mulan’ ba ke gek’iy ni kan th’ab nga but’;

ya rayag ni thay e nof riy ngki tugul.

8 Ni yug aram rogon nike kakrom likngin,

ma ke yim’ e bulbul riy u fithik’ e but’,

9 ya yira tarannag me thay e nof riy ni bod ba ke gek’iy ni ka fini tugul.

10 Ba girdi’ e ra yim’ ma kemus e yafos rok aram;

ra yim’ ma aram e ke yan ngan?

11 Bod yu pa’ i lul’ ni m’ay e ran riy, nge pi lipath ni mlik’,

12 ra yim’ e girdi’ ma dabki fos.

Dabkiyag nra odgad ko ngiyal’ ni kabay lanelang;

dabra rbitbitgad ko binem e mol ni kar ted.

13 Gu be athpeg ni yigum mithageg u lan e fayleng ko yam’;

nggu par ni gu be mith nge taw ko ngiyal’ nike m’ay e damumuw rom,

ma ga duwgiliy bangiyal’ ni ggub ngan’um.

14 Fa’anra yim’ be’, ma gur ku rayag ni ngki fos bayay?

Machane gag e bay gu sonnag e ngiyal’ ni bfel’,

nggu son nge chuw e ngiyal’ney nib gafgow.

15 Ma aram e bay mu pong, mu gu fulweg,

ma bay gu fel’ u wun’um, i gag e en ni mu sunmiyeg.

16 Ma aram e bay mu fal’eg i yaliy gubin yay ni gu ra yif’ eg,

ma dab kum tay fenamyan ko pi denen rog.

17 Bay mu n’agfan u wun’um ma ga pag ndab kum tafinaynag;

bay mu upunguy gubin e kireb ni ku gu rin’.

18 Bayi taw nga bingyal’ nra muchubu’ e burey

ma yungi war e ra n’ag gil’.

19 Ra chub’iy e ran e pi war nga but’,

ma n’uw ni gel e ra un e but’ ngay;

ere kam chuwegan’ e girdi’ ko yafos.

20 Ka mu gel ngomad ka mu chuwegmad ni dabkug sulod;

yam’ e thiliyeg owchemad.

21 Pifakmad e yira yog e sorok ngorad u ban’en, machane gamad e dakriy e n’en nra rin’ ma gamad nang,

ma ngiyal’ ni kan dariyfan nagrad e dabnog ngomad.

22 Kemus ni go’ amith u dowmad e gamad be thamiy

nge gafgow ni be tay lanin’mad.