1,2 Job mog, gu ra non ma ga ra dabuy?

Ya dabkiyag ni gu par ni dab gu non.

3 Ka mu fonownag bo’or e girdi’

ma kam pi’ gelngin pa’ e pi’in ndariy gelngin pa’rad.

4 Ma ra tun ay be’ ara par nike aw parwon,

ma thin rom e ma pi’ e athamgil ngak nge sak’iy.

5 Ma chiney e gur e ke aw e gafgow ngom,

ma ka mu pagem ke mulan’um.

6 Um par ni ga be liyor ngak Got, ndariy thibngim,

ere thangri pagan’um me l’agan’um ngak.

7 Mu leam, rayag ni mog be’

ni i par nib mat’aw me yib e riya ngak?

8 Kug guy e girdi’ nra gi’ed e but’ ni kireb

ka ra yunged e kireb ngay ni bod rogon e awoch,

ma chiney e ka ra tired wom’ngin ni kireb.

9 Ke kireb nagrad Got u fithik’ e damumuw rok ni bod ba yoko’.

10 Pi’in nib kireb e yad be tolul ma yad be wa’achar ni bod e layon,

machane Got e be thang lungrad ma be tet’ar nguwelrad.

11 Yad bod e layon ndariy ban’en ni ngar li’ed ngar longuyed,

miyad yim’ me wear pifakrad ni gubin.

12 Bay ba ngiyal’ nni kathkathnag bbugithin ngog,

nri chugur ni nge dab gu rung’ag.

13 Bod rogon ba lik’ay nib tamdag ni kirebnag e mol rog.

14 Mu gu par ni gu be da’da’

ma gu be t’on nreb ko tamdag.

15 Mu gu thamiy bochiyang i nifeng nike thoy owcheg,

me puth e ulum nga dakenag ko tamdag.

16 Mu gguy ban’en nib sak’iy u rom;

mu gu lik’ath ngay, ma de pow rog ko be mang.

Mu gu rung’ag ba lam ko ngiyal’nem ndariy ban’en ni be yan lingan ni be ga’ar:

17 "Gur rayag ni nge mat’aw be’ u p’eowchen Got?

Gur rayag ni nge machalbog be’ u p’eowchen e en ni ir e sunumiy?

18 Got e der ma pagan’ ngak e pi tapigpig rok nu tharmiy;*

ma pir’eg e oloboch rok e pi engel.

19 Ere ga be finey mra pagan’ ngak be’ nni sunumiy ko but’,

ni yib ko fiyath nrib mom i li’ ni bod ba chachangeg?

20 Gadad e girdi’ e rayag ni nge kadbul ma gadad ba fos,

ma dawori aw e lumor me aw e fan rodad ndariy be’ ni manang.

21 Min fek urngin e tin bay rodad;

ma gadad yim’, ni ka dawori yag e gonop ngodad."