Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
"किकरेरी लेकड़रो अक सन्दूख बनाव गाए, तैसेरी लम्बाई ढाई हथ, ते चौड़ाई ते ऊँचाई डैढ-डैढ हथ भोए। ते तैस खालिस सोन्ने सेइं अन्तर मेइं ते बेइर मेइं पलटेइयथ, ते सन्दूखे पुड़ सोन्नेरो बाड़ बनेइयथ। ते सोन्नेरे च़ेवर कड़े कढेइतां तैसेरे च़ेवरे पासन पुड़, एक्की पासे दूई कड़े ते होरि पासे भी दूई कड़े लुवेइयथ। फिरी किकरेरी लेकड़रे डण्डे बनावेइयथ, ते तैन्न भी सोन्ने सेइं मैढ़थ। ते डण्डे सन्दूखेरे दूईये पासां केरे कड़न मां छ़डने ज़ेसेरे ज़ोरे सेइं सन्दूख छ़ूओ गाए। तैना डण्डे सन्दूखेरे कड़न मां लग्गोरे रान ते तैस करां अलग न किये गान। ते ज़ै गवैहरो सन्दूख, अवं तुसन देलो तैस, तैस्से सन्दूखे मां रेखथ।
"फिरी खालिस सोन्नेरू अक प्रायश्चतेरी गद्दी बनावेइयां, तैसेरी लम्बाई ढाई हथ, ते चौड़ाई डैढ हथ भोए। ते सोन्नू ढैलतां दूई करूब बनावेइतां प्रायश्चितेरे ढकनेरे दूईये पासन लुवेइयां। अक करूब त एक्की पासे पुड़ ते होरो करूब होरि पासे लुवेइयां, ते करूबेरे ते प्रायश्चितेरे ढकने तैसेरे टुक्ड़े सेइं बनावेइतां तैसेरे दूईये पासन लुवेइयां। ते तैन करूबां केरां फंघां बैंधोरां एरां फैलोरां बन्न कि प्रायश्चितेरू ढकनू तैस पुड़ ज़ुड़े, ते तैन केरां तुत्तरां आमने-सामने ते प्रायश्चितेरे ढकनेरे पासे रान। ते प्रायश्चितेरू ढकन सन्दूखे पुड़ लुवेइयां, ते ज़ै गवैहरी तेख्ती अवं तीं देलो तैस सन्दूखे मां रेखां।
ते अवं तैस पुड़ रेइतां तीं सेइं मिलतो रालो; ते इस्राएली केरे लेई ज़ेत्रे हुक्म मीं तीं देने भोल्हे, तैना सेब्भी केरे बारे मां अवं प्रायश्चितेरे ढकने पुड़ ते तैन करूबां केरे मझ़ाटे मरां, ज़ैना गवैहरे सन्दूख पुड़ भोल्हे, तीं सेइं गलबात केरतो रालो।"
फिरी बसलेले किकरेरी लेकड़रो सन्दूख बनाव; तैसेरी लम्बाई ढाई हथ, चौड़ाई डैढ हथ, ते ऊँचाई डैढ हथ थी।
फिरी यहोवाए मूसे सेइं ज़ोवं, "नंव्वे सालेरे पेइले दिहाड़े तू मिलापे बालो तेम्बु खड़ो केरां। ते तैस मां गवैहरे सन्दूखे रेखतां मझ़ेटियें पड़दे पत्र केरां।
ते तैने गवैहरो पत्र नेइतां सन्दूखे मां रख्खो, ते सन्दूखे मां डण्डे लाए तैसेरे बह प्रायश्चितेरे ढकनू रख्खू; ते तैनी गवैहरो सन्दूख मिलापे बाले तेम्बु मां पुज़वाव, ते मझ़ेटियें पड़दे टंगेइतां करारेरो सन्दूख तैसेरे अन्तर फर्क कियो; ज़ैस तरीके सेइं यहोवा परमेशरे मूसे हुक्म दित्तोरो थियो।
ते ज़ैखन मूसो यहोवा सेइं गल्लां केरनेरे लेई मिलापे बाले तेम्बु मां जेव, तैनी प्रायश्चितेरे ढकने पुड़ां ज़ै गवैहरो सन्दूखे पुड़ भोतो थियो, दूईये करूबां केरे मझ़ाटेरां तैनी आवाज़ शुनी, ज़ै तैस सेइं गल्लां लगोरो थियो केरने, तैनी यहोवा सेइं गल्लां की।
फिरी इस्राएली लोकेईं यहोवारे पहाड़े पुड़ेरां अग्रोवं ट्लाई दिहाड़ां केरू सफर कियूं, ते तैन ट्लाईए दिहाड़न मां यहोवाए करारेरो सन्दूख तैन केरे लेई आरामेरी ठार तोप्पी तैन अग्री-अग्री च़लतो राव। ते ज़ैखन तैना डेरन मरां अग्रोवं च़लते थिये, तैस वक्तेरे देइतां पूरी दिहैड़ी यहोवारी बिदलार तैन पुड़ रहती थी। ते ज़ैखन-ज़ैखन करारेरो सन्दूख अग्रोवं च़लाव गातो थियो, तैखन-तैखन मूसो एन ज़ोतो रहतो थियो, "हे यहोवा, उठ, ते तेरे दुश्मन तितर-बितर भोइ गान, ते तीं सेइं नफरत केरनेबाले तेरे सामनेरां नेश्शी गान।" ते ज़ैखन-ज़ैखन तै रुकी गाती थी, त मूसो एन ज़ोतो थियो, "हे यहोवा हज़ारेईं हज़ार इस्राएली लोकन मां वापस एज्जी गा।"
तैखन यहोवा मूसे सेइं ज़ोवं, "इस्राएली लोकन सेइं गल्लां केरतां तैन केरे सियाना केरे घरां केरे मुताबिक तैन केरे सेब्भी प्रधान्न कां अक-अक सोटी ने; ते तैन बारहे सोटन पुड़ एक्की-एक्की पुड़ एक्की-एक्की घरेरे पूर्वज मड़देरू नवं लिख, ते लेवी केरी सोटी पुड़ हारूनेरू नवं लिख। किजोकि इस्राएली केरे सियाना केरे घरानेरी अक-अक प्रधान मड़देरी अक-अक सोटी भोल्ही। ते तैन सोटन मिलापे बाले तेम्बु मां करारेरे सन्दूखे अग्गर, ज़ैड़ी अवं तुसन सेइं मिलताईं, रेखी छ़ड। ते ज़ैस मड़दे अवं च़ुनेलो, तैसेरी सोटी गुड्डी निसेली; ते इस्राएली ज़ैना तुसन पुड़ बुड़बड़ाते रहतन, तैन बुड़बुड़ानु अवं एप्पु पुड़ेरां दूर केरेलो।" ते मूसे इस्राएली लोकन सेइं ऐह गल ज़ोई, ते तैन केरे सेब्भी प्रधानेईं अपने लेई अपने-अपने घरानेरे मुताबिक अक-अक सोटी तैस दित्ती, तैना बारहे सोटी भोइ; ते तैन मां हारूनेरी भी सोटी थी। तैना सोटी मूसे करारेरे सन्दूखेरे सामने तेम्बु मां यहोवारे सामने रेखी छ़ेडी। होरसां मूसा करारेरे सन्दूखे कां मिलापे बाले तेम्बु मां जेव, ते कुन हेरते; कि हारूनेरी सोटी ज़ै लेवी केरे घरानेरे लेई थी, तैस गुड्डी लेगोरिन, ते फूड़ू भी फुलोरन, ते बदाम भी लगोरेन। तैखन मूसे तैना सब सोटी यहोवारे सामनेरां केढतां इस्राएली लोकन कां घिन्तां जेव; ते तैनेईं अपनि-अपनि सोटी पिशैनतां नी। फिरी यहोवाए मूसे सेइं ज़ोवं, "हारूनेरी सोटी करारेरे सन्दूखे कां रख, कि ऐह तैन खलाफत केरनेबालां केरे लेई अक निशान बेनतां राए, कि तू तैन केरू बुड़बुड़ानु ज़ैन मेरे खलाफ भोतू रहते, अग्रोवं जो रोकी सकस, एरू न भोए कि तैना मेरि गान।" ते मूसे यहोवारे हुक्मेरे मुताबिके कियूं।
एल्हेरेलेइ ज़ैखन इस्राएली लोकेईं अपने डेरन मरां यरदन दरियाए पार गानेरे लेई सफर शुरू कियूं, ते याजक करारेरे सन्दूखे छ़ुइतां लोकन अग्री-अग्री च़ले, ते सन्दूख छ़ूनेबाले याजक यरदन दरियाएरे बन्ने पुड़ पुज़्ज़े, ते सन्दूख छ़ूनेबाले याजकां केरे पव यरदन दरियारे पैनी मां पे, (फसलरे कटनेरे मौके सारे दिहाड़न मां यरदन दरियाएरू पानी अपने निशाने करां उबरू च़ेढ़तां बांमेइं बगते।) तैखन ज़ैन पानी बांमेइं बगतू थियूं, तैन बड़े दूर आदाम नगरे कां ज़ैन सारतान नगरेरे नेड़े तैड़ी रुकतां अक ढेर बेनि जेवं, ते दिवारारू ज़ेरू खड़ू राव, ते ज़ैन पानी मैइदानेरे समुन्दर ज़ैस जो खारो समुन्दर भी ज़ोतन तैस पासे बगतू थियूं, तैन पूरे तरीके सेइं शुक्की जेवं; ते इस्राएली लोक यरीहो नगरेरे सामने पार पुज़्ज़ी जे। ते याजक यहोवारे करारेरो सन्दूख छ़ुइतां यरदन दरियारे ज़मीनी पुड़ बराबर खड़े राए, ज़ांतगर सारे इस्राएली लोक शुकोरी ज़मीनी पुड़मेइं पार न पुज़्ज़े, आखरकार सैरी कौमरे लोक यरदन दरियाए पार च़ले जे।
ते ज़ेरे यहोवारे करारेरो सन्दूख छ़ूनेबाले याजक यरदन दरियाएरे पैनी मझ़मेइं निस्से, ते तैन केरे पव शुकोरी ज़मीनी पुड़ पे, तेरहु यरदन दरियाएरू पानी एपनी ठारी पुड़ अऊं, ते पेइलू ज़ेरू एपनी ठारी पुड़ बगने लगू।
यरीहो नगरेरे सारे फाटक इस्राएली लोकां केरे डरे सेइं लगातार बन्द राए, ते कोई भी मैन्हु अन्तर बेइर एज्जी गेइ न थियो बटतो। फिरी यहोवाए यहोशू सेइं ज़ोवं, "शुन, अवं यरीहो नगरेरे राज़े ते तैसेरे सिपेहिन समेत तेरे कब्ज़े मां केरताईं। एल्हेरेलेइ तू ते तेरे सिपाही नगरे घेरो देन, ते यरीहो नगरेरे च़ेवरे पासन दीसां अक फेरो केरतां एज्जन, ते शा दिहाड़े एन्च़रे केरते रान। ते सत याजक सन्दूखे अग्री-अग्री हुड़ां केरे शिंगां केरे सत नरशिंगे नेइतां च़लन; फिरी सत्तोवं दिहाड़े तुस नगरेरे च़ेवरे पासन सत बार घुमथ, ते याजक भी नरशिंगे बज़ाते च़लन। ते ज़ैखन तैना हुड़ां केरे सत नरशिंगे च़िरे तगर बज़ाते रान, तैखन सब सिपाही नरशिंगां केरि आवाज़ शुन्ते बेड़ी उच्ची आवाज़ी सेइं जयजयकार केरन; तैखन यरीहो नगरेरी शहरपनाह बुनियादी समेत बिछ़ड़ी गाली, तैखन सारे लोक सिद्धे नगरे मां गेइतां हमलो केरन।" तैखन नूनेरे मट्ठे यहोशूए याजकन कुजेइतां ज़ोवं, "करारेरो सन्दूख छ़ूआ, ते तुसन मरां सत याजक यहोवारे सन्दूखे अग्री-अग्री हुड़ां केरे शिंगां केरे सत नरशिंगे नेइतां च़लन।" फिरी यहोशूए लोकन सेइं ज़ोवं, "अग्रोवं गेइतां नगरेरे च़ेवरे पासन चक्कर लेइतां एज्जा; ते हथियारन बाले सिपाही यहोवारे सन्दूखे अग्री-अग्री च़लन।"
तैखन लोकेईं जयजयकार कियूं, ते याजक नरशिंगो बज़ाते राए। ते ज़ैखन लोकेईं नरशिंगेरी आवाज़ शुनी त फिरी उच्ची आवाज़ी सेइं तैनेईं जयजयकार कियूं, तैखन शहरपनाह थलेरां डुल्ली, ते लोक सिद्धे एक्की होरि पुड़ च़ैढ़ी जे, ते नगर अपने कब्ज़े मां कियूं।
तैखन पलिश्ती लोकेईं इस्राएली लोकन पुड़ हमलो केरनेरी तियारी की, ते ज़ैखन बड़ी भारी लड़ाई भोने लगी तैखन इस्राएली लोक पलिश्ती लोकन करां हारे, ते तैनेईं लगभग 4000 इस्राएली सिपाही जंगरे मैइदाने मां मारे। ज़ैखन इस्राएली सिपाही डेरन मां वापस आए, तैखन इस्राएलेरे बुज़ुर्ग लोक ज़ोने लगे, "यहोवा अज़ अस पलिश्ती लोकन करां किजो हाराए? एज्जा, अस यहोवारे करारेरो सन्दूख शीलो नगरे मरां आनम, कि तै इश्शे दरमियान एइतां असन दुश्मना केरे हथ्थे करां बच़ाए।" तैखन तैन लोकेईं किछ सिपाही शीलो नगरे मां भेज़े तैड़ी तैना करूबन करां बह बिशोरो सेनारे यहोवारो करारेरो सन्दूख मगाव; ते परमेशरेरे करारेरे सन्दूखे सेइं साथी एली याकेरां दूईये मट्ठां, होप्नी ते पीनहास भी साथी आं।
ज़ैखन यहोवारो करारेरो सन्दूख डेरन मां पुज़्ज़ो, तैखन सारे इस्राएली एत्रे ज़ोरे सेइं ललकारने लगे, कि ज़मीन हिलने लगी। एस ललकारनेरी आवाज़ शुन्तां पलिश्ती लोक पुछ़ने लगे, "इब्रानी लोकां केरे डेरन मां इस बड़े ललकारारी कुन वजाए?" तैखन तैन्न पतो लग्गो, कि यहोवारो सन्दूख डेरन मां आनोरोए। तैखन पलिश्ती डेरतां ज़ोने लगे, "तैन डेरन मां इस्राएलेरो परमेशर एवरोए।" फिरी तैनेईं एक्की होरि सेइं ज़ोवं, "ओ! असन सेइं पेइलू एरू कधे नईं भोवरू। ओ! एरे महाप्रतापी देबतां केरे हथ्थे मरां असन कौन बच़ालो? इना त तैन्ना देबतेन ज़ैनेईं मिस्री लोकन पुड़ सुनसान ठैरी मां हर किसमेरी मुसीबतां छ़डोरी थी। हे पलिश्ती लोकव, तुस हिम्मत केरा, ते मड़द बना, कोन्च एरू न भोए कि ज़ेन्च़रे इब्रि लोक तुश्शे गुलाम भोइ जेवरे थिये तेन्च़रे तुस भी तैन केरे गुलाम भोइ गाथ; मड़देरे ज़ेरे जंग केरा।"
तैखन पलिश्ती सेना बड़े बहदरी सेइं लड़ी, ते एत्री मार काट भोइ, कि 30000 इस्राएली सिपाही मारे जे। ते बाकी ज़ैना बच़े तैना अपने डेरन जो जे, ते एन्च़रे सेइं तैनेईं इस्राएली हाराए। ते एली याजकेरां दूईये मट्ठां, होप्नी ते पीनहास भी मारां जेआं; ते परमेशरेरो सन्दूख पलिश्ती लोकेईं थुसोड़तां नियो।
तैखन यहोवा अश्दोदी लोकन बड़ी सज़ाह देने लगो, ते तै अश्दोद नगर ते तैसेरे आसे-पासेरे इलाकन मां रानेबाले लोकन गिलटी केरे ज़िरिये दुखी केरने लगो। ऐह हाल हेरतां अश्दोद नगरेरे लोकेईं ज़ोवं, "इस्राएली लोकां केरे देबतेरो सन्दूख असन मां न लोड़े राहोरो; किजोकि असन ते इश्शे देबते दागोने बड़ी सज़ाह लगोरो देने।" तैखन तैनेईं पलिश्ती लोकां केरे पंच़े राज़न जो समाद भेज़ो, ते तैन पुछ़ू, "अस इस्राएली केरे देबतेरे सन्दूखे सेइं कुन केरम?" तैनेईं जुवाब दित्तो, "इस्राएली केरे देबतेरो सन्दूख घुमेइतां गत नगरे मां पुज़व गाए।" तैखन तैनेईं इस्राएली केरे परमेशरेरो सन्दूख घुमेइतां गत नगरे मां पुज़व। ज़ैखन तैना तैस घुमेइतां तैड़ी पुज़्ज़े, त एरू भोवं कि यहोवारो क्रोध तैस नगरेरे लोकां केरे खलाफ भड़को; ते तैने निकड़े करां बड्डे तैस गत नगरे मां सारे लोक गिलटन सेइं बिमार किये, तैस नगरे मां बड़ी खलबली भोइ। तैखन तैनेईं परमेशरेरो सन्दूख पलिश्ती केरे होरि एक्रोन नगरे जो भेज़ो ते ज़ेरो परमेशरेरो सन्दूख एक्रोन नगरे मां पुज़्ज़ो तेरहे तैट्ठेरे लोक एन ज़ोइतां चिन्डां मैरतां लेरां देने लगे, "इस्राएली लोकां केरे देबतेरो सन्दूख घुमेइतां असन कां एल्हेरेलेइ पुज़व जेवरो, कि अस ते इश्शे लोक मारे गाम।" तैखन तैनेईं पलिश्ती लोकां केरे पंच़े राज़े अकोट्ठे किये, ते तैन सेइं ज़ोवं, "इस्राएली लोकां केरे देबतेरो सन्दूख भेज़ो गाए, कि तै अपने जगाई पुड़ वापस गाए, ते असन ते इश्शे लोकन मैरी न सके।" तैस नगरेरे लोकन मां त मौतरे डरेरी खलबली मच़ोरी थी, ते परमेशरेरो क्रोध तैन केरे खलाफ भड़कोरो थियो।
यहोवारो सन्दूख पलिश्ती लोकां केरे मुल्खे मां सत महीन्न तगर राव। तैखन पलिश्ती लोकेईं अपने याजक ते जैदूगिर कुजेइतां तैन पुछ़ू, "यहोवारे सन्दूखे सेइं अस कुन केरम? असन ज़ोथ कि कुन प्रायश्चित देइतां अस तैस तैसेरे जगाई पुड़ भेज़म?" तैनेईं जुवाब दित्तो, "अगर तुस इस्राएली लोकां केरे देबतेरो सन्दूख तैड़ी भेज़ने चाथ, त तै एन्च़रे नईं भेज़नो; तैसेरो नुकसान भरनेरे लेई ज़रूर दोषबलि देइयथ। तैखन तुस ठीक भोल्हे, ते तुसन पतो च़लेलो कि तैसेरो क्रोध तुसन पुड़ेरां किजो दूर न भोव।"
पलिश्ती लोकेईं एन्च़रे कियूं; ते दुद्ध देने बैली बेछ़ी नेइतां तैस गेड्डी मां जोट्ली, ते तैन केरे बच्चे गेवड़े मां ढेपतां छ़डे। ते यहोवारो सन्दूख, ते सामानेरो सन्दूख, ज़ैस मां सोन्नेरे मूंशे ते एपनी गिलटी केरि मूरती गेड्डी पुड़ रेखी। तैखन बेछ़ी बेतशेमेश नगरेरे सिद्धी बत्तां च़ेलि; तैना सड़कां-सड़कां डांडां मैरती च़ेलि जेई, ते न देइने पासे न बांए पासे मुड़ी; ते पलिश्ती लोकां केरे राज़े तैन केरे पत्ती-पत्ती बेतशेमेश नगरेरे नेड़े पुज़्ज़े। ते बेतशेमेश नगरेरे लोक वैदी मां गेहुं केट्टी राहोरे थिये। ते ज़ैखन तैनेईं एछ़्छ़ी खेड़ि केरतां सन्दूख लाव, त तैखन तैना तैस लेइतां खुशी भोए। गड्डी बेतशेमेश नगरेरे रानेबाले यहोशूएरे उडारे मां गेइतां रुकी जेई, तैड़ी अक बड्डो घोड़ थियो। तैखन तैनेईं गेड्डरी लेकड़ी च़ीरी ते बेछ़ी केरि होमबलि केरतां यहोवा जो च़ाढ़ी। ते लेवी लोकेईं यहोवारो सन्दूख ते तै होरो सन्दूख ज़ै साथी थियो, ज़ैस मां सोन्नेरी चीज़ां थी, उसालो तै तैस बड्डे घोड़ पुड़ रख्खो; ते बेतशेमेश नगरेरे लोकेईं तैस्से दिहाड़े यहोवारे लेई होमबलि ते मेलबलि च़ाढ़ी।
तैखन किर्यत्यारीम नगरेरे लोक गेइतां यहोवारो सन्दूख छ़ुइतां च़ले जे, ते अबीनादाबेरे घरे मां ज़ैन तैन केरे नगरेरे पहैड़ी पुड़ थियूं तैड़ी रख्खो, ते यहोवारे सन्दूखेरी रखवाली केरनेरे लेई अबीनादाबेरू मट्ठू एलीआजर पवित्र कियूं।
किर्यत्यारीम नगरे मां सन्दूख रखोरे 20 साल भोए, ते तैस दौरान इस्राएलेरे सारे लोक दुखेरे मारे यहोवा करां मद्दत मगने लगे।
किछ वक्तेरां बाद लोकेईं दाऊद राज़े ई खबर दित्ती, कि यहोवा ओबेदेदोमेरे घराने पुड़, ते ज़ैन किछ तैसेरू आहे, तैस पुड़ भी परमेशरेरे सन्दूखेरे वजाई सेइं बरकत दित्तोरिए। तैखन दाऊदे गेइतां परमेशरेरो सन्दूख ओबेदेदोमेरे घरे मरां दाऊदपुरे मां खुशी सेइं पुज़व। ज़ैखन यहोवारो सन्दूख छ़ूनेबाले शा कदम अग्रोवं च़ले, तैखन दाऊदे अक दांत ते अक पालोरू बछ़ड़ू बलि कियूं। ते दाऊदे सनेरे कपड़ेरो एपोद लखे मां बेन्धतां यहोवारे सामने तने मने सेइं नच़तो राव। दाऊद ते इस्राएलेरे सारे कुलां केरे लोक यहोवारे सन्दूखे जयजयकार केरते ते नरशिंगो बज़ाते अग्रोवं च़ले।
तैखन सुलैमान राज़े इस्राएली लोकां केरे बुज़ुर्ग ते गोट्लां केरे सब खास-खास मैन्हु भी ज़ैना इस्राएली लोकां केरे दादे-पड़दादां केरे घराना केरे प्रधान थिये, यरूशलेम नगरे मां एस इरादे सेइं अकोट्ठे किये, कि तैना यहोवारे करारेरो सन्दूख दाऊदपुर मतलब सिय्योने मरां आन्न। एल्हेरेलेइ सब इस्राएली मड़द एतानीम नंव्वेरे सत्तोवं महीनेरे तिहारेरे मौके सुलैमान राज़े कां अकोट्ठे भोए। ज़ैखन सारे इस्राएली बुज़ुर्ग आए, तैखन याजक सन्दूख छ़ुइतां च़ले। ते यहोवारो सन्दूख, ते मिलापे बालो तेम्बु, ते ज़ेत्रां पवित्र भांडां तेम्बु मां थियां, तैना सारां याजक ते लेवी लोकेईं नेआं। ते सुलैमान राज़ो ते सारे इस्राएली लोकां केरि मण्डली, ज़ै तैस कां अकोट्ठी थी, तैना सब सन्दूखेरे सामने एत्री भैड्डां ते दांत बलि केरि राहोरे थिये, इन बलिदानां केरि गिनती कोन्ची तरीके न थी भोइ सकती। तैखन याजकेईं यहोवारे करारेरो सन्दूख भवनेरे पवित्र ठारी मां पुज़ेइतां करूबां केरे फंघां केरे हेठोरां रख्खो। करूब सन्दूखेरे ठारी पुड़ बेइहे पासे एन्च़रे फंघां फैलेइतां थिये, कि तैना तैस पुड़ेरां सन्दूखेरे डण्डन तगर ढेकतां थिये। इना डण्डे त एत्रे लम्मे थिये, कि तैन केरि च़ोट तैस पवित्र ठारी मां ज़ै पवित्र ठारारे सामने थी, लेइहोती थी, पन बेइरीं पासेरां न थी लेइहोते। तैना अज़ तगर हेजू भी तैड़ी आन। सन्दूखे मां सिर्फ तैना दूई तेख्ती थी ज़ैना मूसे होरेब पहाड़े पुड़ तैस मां तैस मौके रेखोरी थी, ज़ैखन यहोवा इस्राएली केरे मिस्र मुल्खे मरां निसनेरे बाद तैन सेइं करार कियोरो थियो। ज़ैखन याजक पवित्र ठारी मरां निस्से, तैखन यहोवारे भवने मां बिदलार भेरोई जेई। ते बिदलारारी वजाई सेइं याजक सेवा केरनेरे लेई खड़े न रेई सके, किजोकि यहोवारी लौ तैसेरे भवने मां भेरोई जेवरी थी।
"हे भटकने बाले बच्चव, मीं कां वापस एज्जा, किजोकि अवं तुश्शो मालिक आई; यहोवा एन ज़ोते। तुश्शे हर एक्की नगरे मरां अक, ते हर एक्की कुले मरां दूई नेइतां अवं सिय्योने मां पुज़ालो।
"अवं तुसन अपने मनेरे मेर्ज़रे मुताबिक पुहालां केरे ज़ेरे प्रधान देइलो, ज़ैना ज्ञान ते अक्ली सेइं तुसन च़ारेले। ते तैन दिहाड़न मां ज़ैखन तुस एस मुल्खे मां बद्धथ, ते च़ेवरे पासन फैलथ, तैखन लोक फिरी एरू न ज़ोले, यहोवारे करारेरो सन्दूख; यहोवा एन ज़ोते। तैसेरो खियाल भी तैन केरे मने मां न एज्जेलो, न लोक तैसेरे न राने सेइं फिक्र केरेले; ते न तैसेरी मरम्मत भोल्ही।
पेइले करारेरे मुताबिक भी परमेशरेरी आराधना केरनेरे नियम थिये; ते आराधना केरनेरे लेई मैन्हु केरि बनेवरी अक ठार थी। यानी अक तेम्बु बनोरो थियो, ते तैसेरे दूई हिस्से थिये, पेइले हिस्से मां अक दीवट (दीयो), मेज़ ते च़ैढ़ोरी रोट्टी रेखोरी भोती थी, तैस हिस्से जो पवित्र ठार ज़ोते थिये। ते होरि हिस्से मां पड़दे पुतोरां तै ठार थी, तैस हिस्से जो परमपवित्र ठार ज़ोते थिये। एसमां सोन्नेरी तै धूपवेदी थी ज़ैस पुड़ खुशबूदार चीज़ां बालते थिये, ते च़ेवरे पासन सोन्ने सेइं पलेटोरो करारेरो सन्दूख थियो। ते तैस सन्दूखे मां मन्ने सेइं भेरतां अक सोन्नेरू भांड थियूं, ते कने हारूनेरी तै सोटी थी ज़ैस पुड़ पट्लां लग्गोरां थियां ते दूई घोड़ां केरि तेख्ती थी, ज़ैन पुड़ दश हुक्म लिखोरे थिये। एस सन्दूखेरे बेइयें पासे महिमा बाले करूब बनोरे थिये, ज़ैना परमेशरेरी मौजूदगी हिराते थिये। तैना अपने-अपने फंघन सेइं तैस ठैरी सैयो केरि राहोरे थिये, ज़ैड़ी पाप माफ़ कियोरे थिये। पन हुनी इन गल्लन रोड़े च़ारे ज़ोनेरो वक्त नईं।
परमेशरेरू ज़ैन मन्दर सुर्गे मांए, तैन खोल्लू, ते तैसेरे मन्दरे मां करारेरो सन्दूख लेइहोव, ते बिजली ते आवाज़ ते गुड़ने ते भुंज़ल आए, ते बड़ी-बड़ी आण पेई।