1 यरीहो नगरेरे सारे फाटक इस्राएली लोकां केरे डरे सेइं लगातार बन्द राए, ते कोई भी मैन्हु अन्तर बेइर एज्जी गेइ न थियो बटतो। 2 फिरी यहोवाए यहोशू सेइं ज़ोवं, "शुन, अवं यरीहो नगरेरे राज़े ते तैसेरे सिपेहिन समेत तेरे कब्ज़े मां केरताईं। 3 एल्हेरेलेइ तू ते तेरे सिपाही नगरे घेरो देन, ते यरीहो नगरेरे च़ेवरे पासन दीसां अक फेरो केरतां एज्जन, ते शा दिहाड़े एन्च़रे केरते रान। 4 ते सत याजक सन्दूखे अग्री-अग्री हुड़ां केरे शिंगां केरे सत नरशिंगे नेइतां च़लन; फिरी सत्तोवं दिहाड़े तुस नगरेरे च़ेवरे पासन सत बार घुमथ, ते याजक भी नरशिंगे बज़ाते च़लन। 5 ते ज़ैखन तैना हुड़ां केरे सत नरशिंगे च़िरे तगर बज़ाते रान, तैखन सब सिपाही नरशिंगां केरि आवाज़ शुन्ते बेड़ी उच्‍ची आवाज़ी सेइं जयजयकार केरन; तैखन यरीहो नगरेरी शहरपनाह बुनियादी समेत बिछ़ड़ी गाली, तैखन सारे लोक सिद्धे नगरे मां गेइतां हमलो केरन।" 6 तैखन नूनेरे मट्ठे यहोशूए याजकन कुजेइतां ज़ोवं, "करारेरो सन्दूख छ़ूआ, ते तुसन मरां सत याजक यहोवारे सन्दूखे अग्री-अग्री हुड़ां केरे शिंगां केरे सत नरशिंगे नेइतां च़लन।" 7 फिरी यहोशूए लोकन सेइं ज़ोवं, "अग्रोवं गेइतां नगरेरे च़ेवरे पासन चक्‍कर लेइतां एज्जा; ते हथियारन बाले सिपाही यहोवारे सन्दूखे अग्री-अग्री च़लन।"

8 ते ज़ैखन यहोशूए एना सैरी गल्‍लां लोकन सेइं ज़ोई छ़ेडी, त तैना सत याजक ज़ैना यहोवारे सामने सत नरशिंगे बज़ेइतां च़लोरे थिये, ते यहोवारे करारेरो सन्दूख पत्पती च़लाव। 9 ते हथियारन बाले सिपाही नरशिंगो बज़ानेबाले याजकां केरे अग्री-अग्री च़ले, ते पेत्रीएं सिपाही सन्दूखे पत्पती च़ले, ते याजक नरशिंगो बज़ाते च़ले। 10 ते यहोशूए लोकन हुक्म दित्तो, "ज़ांतगर अवं तुसन जयजयकार केरनेरो हुक्म न देईं, तांतगर जयजयकार न केरथ, ते न कोई तुश्शी छ़ेड़ शुने, ते न कोई तुश्शे ऐशेरां गल निस्से, ज़ैखन तुसन हुक्म मैल्हे तैखने जयजयकार केरथ।" 11 तैने यहोवारो सन्दूख एक्‍की बार नगरेरे च़ेवरे पासन घुमाव; तैखन तैना डेरन मां आए, ते रात तैड़ी कट्टी।

12 फिरी होरसां झ़ेझ़ां यहोशू, सिपाही ते याजक खड़े उठे, ते याजकेईं यहोवारो सन्दूख छ़ूओ। 13 ते सत याजक हुड़ां केरां सत शिंगां केरे नरशिंगे नेइतां यहोवारे सन्दूखे अग्री-अग्री बज़ाते च़ले; ते तैन अग्री-अग्री हथियार ट्लेइतां सिपाही च़ले, ते पेत्रीएं सिपाही यहोवारे सन्दूखे पत्पती च़ले, ते याजक नरशिंगो बज़ाते च़ले जे। 14 ते एन्च़रे दूइयोवं दिहाड़े भी नगरेरे च़ेवरे पासन फेरी देइतां डेरन मां वापस आए। ते एन्च़रे सेइं तैना शा दिहाड़े चक्‍कर लाते राए।

15 फिरी सत्तोवं दिहाड़े इस्राएली बड़े सुबेले जुवान उठतां तैस्से तरीके सेइं नगरेरे च़ेवरे पासन सत चक्‍कर लेइतां आए; सिर्फ तैनेईं तैस दिहैड़ी सत्ते फेरेईं फेरी दित्ती। 16 तैखन सत्तोवं फेरे ज़ैखन याजक नरशिंगे बज़ाते थिये, तैखन यहोशूए लोकन सेइं ज़ोवं, "जयजयकार केरा; किजोकि यहोवाए एन नगर तुसन दित्तोरूए। 17 ऐह नगर ते एसमां ज़ैन किछ भी आहे, तैन यहोवा जो अर्पण कियोरी चीज़ भोल्ही; सिर्फ राहाब वेश्या ते ज़ेत्रे तैसारे घरे मां भोल्हे, तैना ज़ींते छ़डे गान, किजोकि राहाबां इश्शे भेज़ोरे दूई जासूस छ़ुपेइतां रखोरे थिये। 18 ते तुस यहोवा जो अर्पण कियोरी चीज़न करां खबरदार रेइयथ ते अपने आपे तैन करां अलग रेखथ, एरू न भोए कि अर्पण कियोरी चीज़न मरां कोई चीज़ आनथ, ते एस तरीके सेइं इस्राएली डेरन भ्रष्ट केरतां कष्टे मां छ़डथ। 19 सब चाँदी, सोन्नू, ते ज़ैना भांण्डां पितल ते लोंहेरन, तैना यहोवारे लेई पवित्रन, ते तैसेरे भण्डारे मां रखां गान।" 20 तैखन लोकेईं जयजयकार कियूं, ते याजक नरशिंगो बज़ाते राए। ते ज़ैखन लोकेईं नरशिंगेरी आवाज़ शुनी त फिरी उच्‍ची आवाज़ी सेइं तैनेईं जयजयकार कियूं, तैखन शहरपनाह थलेरां डुल्‍ली, ते लोक सिद्धे एक्‍की होरि पुड़ च़ैढ़ी जे, ते नगर अपने कब्ज़े मां कियूं। 21 ते कुन मड़द, कुन कौन्शां, कुन जुवान, कुन बुढे, बल्के दांत, भैड्डां-छ़ेल्‍ली ते गधे, ज़ेत्रे भी तैस नगरे मां थिये, तैना सब अर्पण कियोरी चीज़ां सेमझ़तां तलवारी सेइं मैरी छ़ेडी।

22 तैखन यहोशूए तैन दूई जासूसन सेइं ज़ोवं ज़ैना तैस मुल्खेरो भेद घिन्ने जेवरे थिये, "एपनी कसमरे मुताबिक तैस वेश्यारे घरे मां गेइतां तैस ते ज़ैना घरेरे लोकन भी घरे मरां बेइर आनां ज़ैना तैस सेइं साथी थिये।" 23 तैखन तैना जासूस अन्तर गेइतां तै राहाब ते तैसारे अम्मा बाजी ते ढ्ला ते बाकी सारे ज़ैना तैसारे कां रहते थिये सारे खानदानेरे लोक केढतां आने, ते इस्राएली डेरन करां बेइर बिशाले। 24 तैखन तैनेईं नगर, ते ज़ैन किछ तैस मां थियूं, अग लेइतां फुक्‍की छ़डू, सिर्फ चाँदी सोन्नू, ते ज़ैना भांण्डां पितलरां ते लोंहेरां थियां, तैना तैनेईं यहोवारे भवनेरे भण्डारे मां रेखी छ़डां। 25 ते यहोशूए राहाब वेश्या ते तैसारे बाजी केरे घराने बल्के तैन केरे सारे लोक ज़ींते छ़डे; ते अज़ तगर तैन केरू खानदान इस्राएली लोकन मां रहते, किजोकि ज़ैना जासूस यहोशूए यरीहो नगरेरो भेद घिन्नेरे लेई भेज़ोरे थिये, तैना तैसां छ़ुपेइतां रखोरे थिये।

26 फिरी तैखने यहोशूए इस्राएली लोकन कसम दित्ती, ते ज़ोवं, कि ज़ै मैन्हु गेइतां इस यरीहो नगरे फिरी बनाए तै यहोवारे तरफां लानती भोए।

"ज़ैखन तै तैसेरी मुनीयाद कढेलो तैसेरू बड्डू मट्ठू मेरि गालू,

ते ज़ैखन तै तैसेरे फाटक लाएलो

तैखन तैसेरू निकड़ू मट्ठू भी मेरि गालू।"

27 ते यहोवा यहोशूए सेइं साथी राव; ते यहोशूएरू नवं सारे कनान मुल्खे मां मुशूर भोइ जेवं।