1 फिरी बसलेले किकरेरी लेकड़रो सन्दूख बनाव; तैसेरी लम्बाई ढाई हथ, चौड़ाई डैढ हथ, ते ऊँचाई डैढ हथ थी। 2 तैनी तै अन्तर बेइर खालिस सोन्ने सेइं पलैट्टो, ते तैसेरे च़ेवरे पासन सोन्नेरो बाड़ बनाव। 3 ते तैसेरे च़ेवरे पेइड़न पुड़ लानेरे लेई तैनी सोन्नेरे च़ेवर कड़े लाए, दूई कड़े एक्‍की पासे ते दूई कड़े होरि पासे लाए। 4 फिरी तैने किकरेरे लेकड़रे डण्डे बनाए, ते तैना सोन्ने सेइं मढ़े, 5 ते तैना सन्दूखेरे दूईये पासां केरे कड़न मां छ़डे कि तैन पुड़ सन्दूख छ़ूओ गाए। 6 फिरी तैनी खालिस सोन्ने सेइं प्रायश्चिते बाली गद्दी* बनावाई; तैसेरी लम्बाई ढाई हथ ते चौड़ाई डैढ हथ थी। 7 ते तैने सोन्नू ढैलतां दूई करूब प्रायश्चितेरे ढकनेरे दूईये पासन पुड़ बनाए; 8 अक करूब त एक्‍की पासे पुड़, ते होरो करूब होरि पासे पुड़ बनाव; तैनी तैना प्रायश्चितेरे ढकने सेइं साथी एक्‍की टुक्ड़ेरे दूईये पासन पुड़ बनाए। 9 ते करूबां केरां फंघां बैंधोरां फैलोरे बनां, ते तैन फंघन सेइं प्रायश्चितेरू ढकनू ढेक्‍कोरू थियूं, ते तैन केरां तुत्तरां आमने-सामने ते प्रायश्चितेरे ढकनेरे पासे बना।

10 फिरी तैनी किकरेरी लेकड़रो मेज़ बनाव; तैसेरी लम्बाई दूई हथ, चौड़ाई अक हथ, ते ऊँचाई डैढ हथ थी; 11 ते तैनी तैन खालिस सोन्ने सेइं मढ़ू, ते तैस मां च़ेवरे पासन खालिस सोन्नेरो अक बाड़ बनाव। 12 ते तैने तैसेरेलेइ च़ेवर अंगल चौड़ी अक पटरी, ते इस पेटरारे लेई च़ेवरे पासन सोन्नेरो अक बाड़ बनाव। 13 ते तैनी मेज़ेरे लेई सोन्नेरे च़ेवर कड़े ढैलतां तैन च़ेवर कून्न मां लाए, ज़ैना तैसेरे च़ेवरे पेइड़न पुड़ थिये। 14 तैना कड़े पेटरी कां मेज़ छ़ूनेरे डण्डां केरे खानां केरू कम देनेरे लेई बनाए। 15 ते तैनी मेज़ छ़ूनेरे लेई डण्डे किकरेरी लेकड़ी सेइं बनाए, ते सोन्ने सेइं मढ़े। 16 ते तैनी मेज़े पुड़ेरू सामान मतलब पातर, धूपदान, कुटोरे, ते उलटानेरां भांडां सब खालिस सोन्नेरां बनां।

17 फिरी तैने खालिस सोन्नू ढैलतां पेइड़े ते डण्डन सने दीवट बनावं; तैसेरे फूड़ू केरो गुच्छो, ड्लन्ठ, ते फूड़ू सब एक्‍की टुक्ड़े सेइं बनां। 18 ते दीवटे मरां निस्सोरी शा डैलड़ी बनेई; ट्लाई डैलड़ी त तैसेरी एक्‍की पासेरां ते ट्लाई डैलड़ी तैसेरी होरि पासेरां निस्सोरी बनेई। 19 हर एक्‍की डैलड़ी मां बदामेरां फूड़ू केरे ज़ेरे ट्लाई-ट्लाई फूड़ू केरे गुच्छे, अक-अक ड्लन्ठ, ते अक-अक फूड़ोंव बनावं; दीवटे मरां निस्सोरी, तैना शेइये डैलड़ी इस्से तरीके सेइं बनेई। 20 ते दीवटेरे डेन्डी मां बदामेरे फूड़ू केरो ज़ेरो अपने-अपने ड्लन्ठ ते फूड़ोंव सने च़ेवर फूड़ू केरो गुच्छो बनाव। 21 ते दीवटे मरां निस्सोरी शेइये डैलड़न मरां दूई-दूई डैलड़न हैठ अक-अक ड्लन्ठ दीवटे साथी एक्‍की टुक्ड़े सेइं थिये। 22 ड्लन्ठ ते डैलड़ी सब दीवटे साथी एक्‍की टुक्ड़ेरे बनाए; सारो दीवट गढ़ोरे खालिस सोन्नेरो ते एक्‍की टुक्ड़ेरो बनाव। 23 ते तैनी दीवटेरे सत्ते दीये, ते गुलतराश, ते गुलदान, खालिस सोन्ने सेइं बनाए। 24 तैने सारू सामान ते दीवट किक्‍कार* भेरतां सोन्ने सेइं बनावं।

25 फिरी तैनी किकरेरी लेकड़री धूपेरी वेदी भी बनाई; तैसारी लम्बाई अक हथ ते चौड़ाई भी अक हथ थी; तै चौरस बनाई, ते तैसेरी ऊँचाई दूई हथ थी; ते तैसारां शिंगां तैस सेइं बगैर जोड़ने सेइं बनोरां थियां 26 बेइयें पल्‍लन, ते च़ेवरे पासेरे पैखड़न ते शिंगन सने तैनी तै वेदी खालिस सोन्ने सेइं मढ़ी ते तैसेरे च़ेवरे पासन सोन्नेरो अक बाड़ बनाव, 27 ते तैस बाड़ेरे बुन तैसेरे दूईये पल्‍लन पुड़ तैनी सोन्नेरे दूई कड़े बनाए, ज़ैना तैसेरे छ़ूनेरे डण्डां केरे खानां केरू कम देन। 28 ते डण्डे तैनी किकरेरी लेकड़रे बनाए, ते तैन पुड़ सोन्नू मढ़ू।

29 ते तैनी अभिषेक केरनेरो पवित्र तेल, ते खुशबू देने बैली चीज़ां केरो धूप खुशबूअरे रीतरे मुताबिक बनाव।