1 शमूएलेरी चर्चा सारे इस्राएली लोकन मां फैली जेई। ते एक्सां इस्राएली लोक पलिश्ती लोकन सेइं जंग लड़नेरे लेई निस्से; ते तैनेईं त एबेनेजेर नगरेरे आसे-पासे डेरे लाए, ते पलिश्ती लोकेईं अपेक नगरे मां डेरे लाए। 2 तैखन पलिश्ती लोकेईं इस्राएली लोकन पुड़ हमलो केरनेरी तियारी की, ते ज़ैखन बड़ी भारी लड़ाई भोने लगी तैखन इस्राएली लोक पलिश्ती लोकन करां हारे, ते तैनेईं लगभग 4000 इस्राएली सिपाही जंगरे मैइदाने मां मारे। 3 ज़ैखन इस्राएली सिपाही डेरन मां वापस आए, तैखन इस्राएलेरे बुज़ुर्ग लोक ज़ोने लगे, "यहोवा अज़ अस पलिश्ती लोकन करां किजो हाराए? एज्जा, अस यहोवारे करारेरो सन्दूख शीलो नगरे मरां आनम, कि तै इश्शे दरमियान एइतां असन दुश्मना केरे हथ्थे करां बच़ाए।" 4 तैखन तैन लोकेईं किछ सिपाही शीलो नगरे मां भेज़े तैड़ी तैना करूबन करां बह बिशोरो सेनारे यहोवारो करारेरो सन्दूख मगाव; ते परमेशरेरे करारेरे सन्दूखे सेइं साथी एली याकेरां दूईये मट्ठां, होप्नी ते पीनहास भी साथी आं।

5 ज़ैखन यहोवारो करारेरो सन्दूख डेरन मां पुज़्ज़ो, तैखन सारे इस्राएली एत्रे ज़ोरे सेइं ललकारने लगे, कि ज़मीन हिलने लगी। 6 एस ललकारनेरी आवाज़ शुन्तां पलिश्ती लोक पुछ़ने लगे, "इब्रानी लोकां केरे डेरन मां इस बड़े ललकारारी कुन वजाए?" तैखन तैन्न पतो लग्गो, कि यहोवारो सन्दूख डेरन मां आनोरोए। 7 तैखन पलिश्ती डेरतां ज़ोने लगे, "तैन डेरन मां इस्राएलेरो परमेशर* एवरोए।" फिरी तैनेईं एक्‍की होरि सेइं ज़ोवं, "ओ! असन सेइं पेइलू एरू कधे नईं भोवरू। 8 ओ! एरे महाप्रतापी देबतां केरे हथ्थे मरां असन कौन बच़ालो? इना त तैन्ना देबतेन ज़ैनेईं मिस्री लोकन पुड़ सुनसान ठैरी मां हर किसमेरी मुसीबतां छ़डोरी थी। 9 हे पलिश्ती लोकव, तुस हिम्मत केरा, ते मड़द बना, कोन्च एरू न भोए कि ज़ेन्च़रे इब्रि लोक तुश्शे गुलाम भोइ जेवरे थिये तेन्च़रे तुस भी तैन केरे गुलाम भोइ गाथ; मड़देरे ज़ेरे जंग केरा।"

10 तैखन पलिश्ती सेना बड़े बहदरी सेइं लड़ी, ते एत्री मार काट भोइ, कि 30000 इस्राएली सिपाही मारे जे। ते बाकी ज़ैना बच़े तैना अपने डेरन जो जे, ते एन्च़रे सेइं तैनेईं इस्राएली हाराए। 11 ते एली याजकेरां दूईये मट्ठां, होप्नी ते पीनहास भी मारां जेआं; ते परमेशरेरो सन्दूख पलिश्ती लोकेईं थुसोड़तां नियो।

12 तैखन तैस दिहाड़े अक बिन्यामीनी सिपाही जंगी मरां दौड़तां दुखेरे मारे अपना लिगड़ां छ़िंदतां ते दोग्गे पुड़ मित्ती छ़ेडतां शीलो नगरे मां पुज़्ज़ो। 13 तै ज़ैखन पुज़्ज़ो तैस मौके एली, ज़ेसेरो दिल परमेशरेरे सन्दूखेरे फिक्री मां कम्बने लगोरो थियो, तै बत्तरी ड्लेखी कुर्सी पुड़ बिशोरो बलगने लगोरो थियो। ते ज़ेरो तै सिपाही नगरे मां पुज़्ज़ो तैनी खबर दित्ती त नगरेरे सारे लोक चिन्डां मारने लगे। 14 चिन्डां मारनेरी शोर शुन्तां एली पुछ़ने लगो, "ए शोर ते हैल्‍लो मच़नेरी कुन वजाए?" ते तैनी सिपैहिए लूशी गेइतां एली पूरी खबर शुनाई। 15 तैस वक्ते एली त 98 सालां केरो थियो, ते तैसेरी एछ़्छ़ी केरि नज़र कमज़ोर पेई जेवरी थी, ते तैस किछ लेइहोतू न थियूं। 16 तैनी सिपैहिए एली सेइं ज़ोवं, "अवं तैए आईं ज़ै जंगी मरां अज़्ज़े देवड़तां एवरोईं।" तैनी पुछ़ू, "हे मेरे मट्ठां, कुन खबरे?" 17 तैनी खबर देनेबाले जुवाब दित्तो, "इस्राएली लोक पलिश्ती लोकां केरे सामनेरां नेश्शी जेवरेन, ते बड़े सिपाही मारे जेवरेन, ते तेरां दूईये मट्ठां होप्नी ते पीनहास भी मारे जे, ते परमेशरेरो सन्दूख भी थुसोड़तां नियोरोए।" 18 ते ज़ेरू तैनी परमेशरेरे सन्दूखेरू नवं घिन्नू एली फाटकेरे कुर्सी पुड़ेरां खिरकतां पत्रोवं बिछ़ड़ी जेव; ते बुढो ते भारी भोनेरे वजाई सेइं तैसेरो मेट्टू ट्लूटी जेव, ते तै मेरि जेव। तैनी त इस्राएली लोकां केरो न्याय 40 सालन तगर कियोरो थियो।

19 एली याजकेरी नुश ज़ै पीनहासेरी कौन्श थी तै दोज़ींती थी, ते तैसेरो गल्हे बिशनेरो वक्त नेड़े थियो। ते ज़ैखन तैसां परमेशरेरे सन्दूखेरे थुसोड़नेरी खबर, ते अपने शेहरे ते मुन्शेरे मरनेरी खबर शुनी, तैखन तैस गल्हे बिशनेरी तकलीफ भोने लगी, ते तै तल्‍ले झुकी, ते तैस अक मट्ठू भोवं। 20 तैसारे मरते-मरते तैना घैई ज़ैना तैसारे आसे-पासे खेड़ि थी तैनेईं तैस सेइं ज़ोवं, "न डर, किजोकि तीं मट्ठू भोवरूए।" पन तैसां किछ जुवाब न दित्तो, ते न किछ ध्यान दित्तू। 21 ते परमेशरेरो सन्दूख थुसोड़ो गाने ते अपनो शेरहे ते मुन्शेरे वजाई सेइं तैसा एन ज़ोइतां तैस मट्ठेरू नवं ईकाबोद रख्खू, ज़ेसेरो मतलबे, "इस्राएले मरां महिमा च़ली जेवरीए!" 22 फिरी तैसां ज़ोवं, "इस्राएले मरां परमेशरेरी महिमा च़ली जेवरीए, किजोकि परमेशरेरो सन्दूख थुसोड़तां नियोरोए।"