1 तैखन सुलैमान राज़े इस्राएली लोकां केरे बुज़ुर्ग ते गोट्लां केरे सब खास-खास मैन्हु भी ज़ैना इस्राएली लोकां केरे दादे-पड़दादां केरे घराना केरे प्रधान थिये, यरूशलेम नगरे मां एस इरादे सेइं अकोट्ठे किये, कि तैना यहोवारे करारेरो सन्दूख दाऊदपुर मतलब सिय्योने मरां आन्न। 2 एल्हेरेलेइ सब इस्राएली मड़द एतानीम नंव्वेरे सत्तोवं महीनेरे तिहारेरे मौके सुलैमान राज़े कां अकोट्ठे भोए। 3 ज़ैखन सारे इस्राएली बुज़ुर्ग आए, तैखन याजक सन्दूख छ़ुइतां च़ले। 4 ते यहोवारो सन्दूख, ते मिलापे बालो तेम्बु, ते ज़ेत्रां पवित्र भांडां तेम्बु मां थियां, तैना सारां याजक ते लेवी लोकेईं नेआं। 5 ते सुलैमान राज़ो ते सारे इस्राएली लोकां केरि मण्डली, ज़ै तैस कां अकोट्ठी थी, तैना सब सन्दूखेरे सामने एत्री भैड्डां ते दांत बलि केरि राहोरे थिये, इन बलिदानां केरि गिनती कोन्ची तरीके न थी भोइ सकती। 6 तैखन याजकेईं यहोवारे करारेरो सन्दूख भवनेरे पवित्र ठारी मां पुज़ेइतां करूबां केरे फंघां केरे हेठोरां रख्खो। 7 करूब सन्दूखेरे ठारी पुड़ बेइहे पासे एन्च़रे फंघां फैलेइतां थिये, कि तैना तैस पुड़ेरां सन्दूखेरे डण्डन तगर ढेकतां थिये। 8 इना डण्डे त एत्रे लम्मे थिये, कि तैन केरि च़ोट तैस पवित्र ठारी मां ज़ै पवित्र ठारारे सामने थी, लेइहोती थी, पन बेइरीं पासेरां न थी लेइहोते। तैना अज़ तगर हेजू भी तैड़ी आन। 9 सन्दूखे मां सिर्फ तैना दूई तेख्ती थी ज़ैना मूसे होरेब* पहाड़े पुड़ तैस मां तैस मौके रेखोरी थी, ज़ैखन यहोवा इस्राएली केरे मिस्र मुल्खे मरां निसनेरे बाद तैन सेइं करार कियोरो थियो। 10 ज़ैखन याजक पवित्र ठारी मरां निस्से, तैखन यहोवारे भवने मां बिदलार भेरोई जेई। 11 ते बिदलारारी वजाई सेइं याजक सेवा केरनेरे लेई खड़े न रेई सके, किजोकि यहोवारी लौ तैसेरे भवने मां भेरोई जेवरी थी।✝

12 तैखन सुलैमान राज़ो ज़ोने लगो, "यहोवा ज़ोवरू थियूं, कि अवं घनी बिदलारी मां बास केरेलो। 13 ते सच़्च़े मीं तेरे लेई अक भवन, बल्के एरी मज़बूत ठार बनेवरीए ज़ैस मां तू हमेशा रास।" 14 तैखन राज़े इस्राएली केरि पूरी सभारे पासे तुत्तर फिरेइतां आशिर्वाद दित्तो; ते पूरी सभा खड़ी राई। 15 ते तैनी ज़ोवं, "धने इस्राएलेरो परमेशर यहोवा! ज़ैनी अपने ज़बानी सेइं मेरे बाजी दाऊदे सेइं वाधो कियोरो थियो, ते अपनो कियोरो वाधो पूरो कियो, 16 ‘ज़ैस दिहाड़े मीं अपने इस्राएली लोक मिस्र मुल्खे मरां केढतां आने, तेइसेरू देंतू मीं कोई इस्राएली गोट्लां केरू कोई नगर नईं च़ुनोरू, ज़ैस मां मेरे रानेरे लेई भवन बनाव गाए; पन मीं दाऊद च़ुनो, कि तै मेरे इस्राएली लोकां केरो अधिकारी भोए।’ 17 सुलैमाने इन भी ज़ोवं, मेरे बाजी दाऊदेरी ऐह इच्छा त थी कि इस्राएलेरे परमेशर यहोवारे लेई अक भवन बनाए। 18 पन यहोवा मेरे बाजी दाऊदे सेइं ज़ोवं, ‘तेरी इच्छा ज़ै ई आहे, कि यहोवारे लेई अक भवन बनेइं, ऐह इच्छा केरतां तीं रोड़ू त कियूं;✝ 19 पन फिरी भी तू तैस भवने न बनेई सकस; तेरू ज़ैन अपनु मट्ठू भोल्हु, तैन्ने मेरे लेई भवन बनालू।’ 20 ई ज़ै वाधो यहोवा कियोरो थियो तैन्ने ऐह पूरो कियोरोए, ते अवं अपने बाजी दाऊदेरे जगाई पुड़ खड़ो भोइतां, यहोवारे वाधेरे मुताबिक इस्राएलेरे तखते पुड़ बिशोरोईं, ते इस्राएलेरे परमेशर यहोवारे लेई ई भवन बनावरोए।✝ 21 ते एसमां अक ठार तैस सन्दूखेरे लेई बनेवरीए, कि ज़ैस मां यहोवारो तै करारे, ज़ै तैनी इश्शे दादे-पड़दादन सेइं मिस्र मुल्खे मरां निसनेरे मौके तैनी कियोरो थियो।" 22 तैखन सुलैमान राज़ो सारे इस्राएली केरे हेरते यहोवारी वेदरे सामने खड़ो भोव, ते अपने हथ सुर्गेरे पासे फैलेइतां प्राथना की, हे यहोवा! 23 हे इस्राएलेरे परमेशर! तेरो ज़ेरो न त सुर्गे मां, ते न धेरती पुड़ कोई परमेशरे; तेरे ज़ैना दास अपने पूरे मने सेइं ते अपनो आप तेरे सामने रेखतां च़लतन, तैन केरे लेई तू अपनो करार भी पूरो केरतस, ते दया भी केरतो रहतस। 24 ज़ै वाधो तीं मेरे बाजी दाऊदे सेइं कियोरो थियो, तैसेरे मुताबिक तीं कियोरूए ज़ेन्च़रे तीं एपनी ज़बाना ज़ोवरू थियूं, तेन्च़रे तीं अपने हथेइं सेइं पूरू भी कियूं, ज़ेन्च़रे कि अज़्ज़े। 25 एल्हेरेलेइ हुनी हे इस्राएलेरे परमेशर यहोवा! ई वाधो भी पूरो केर, ज़ै तीं अपने दास मेरे बाजी दाऊदे सेइं कियोरो थियो, "तेरे खानदाने मां, मेरे सामने इस्राएलेरे तखते पुड़ बिशने बाले हमेशा तगर राले बल्के ज़ेन्च़रे तू एप्पु मीं सामने रेखतां च़लतो राव, तेन्च़रे तेरे खानदानेरे लोक अपने चाल चलने मां एन्च़रे एतिहात केरन।" 26 एल्हेरेलेइ हुनी हे इस्राएलेरे परमेशर ज़ै वाधो तीं अपने दास मेरे बाजी दाऊदे सेइं कियोरो थियो तैस पूरो केर।

27 "कुन परमेशर सच़्च़े धेरती पुड़ बास केरेलो, सुर्गे मां बल्के तैस करां भी उच्‍चे सुर्गे मां भी तू न लेग्गी बटस, फिरी मेरे बनेवरे इस भवने मां तू केन्च़रे लेग्गी बटेलो।✝ 28 फिरी भी हे मेरे परमेशर यहोवा! अपने दासेरी प्राथना ते बिनती शुन! ज़ै अवं अज़ तेरे सामने केरि राहोरोईं; 29 कि तू इस भवनेरे पासे तकतो रास, ज़ेसेरे बारे मां तीं ज़ोवरू थियूं, ‘मेरू नवं तैड़ी हमेशा रालू,’ रात दिहैड़ी तेरी एछ़्छ़ी खुल्‍ली रान ज़ै प्राथना तेरो दास इस ठारारे पासे भोइतां केरे, तैस तू शुन। 30 ते तू अपने दास ते अपने इस्राएली लोकां केरि प्राथना ज़ै तैना इस भवनेरे पासे छंदे केरतां केरेले तैस शुना, बल्के सुर्गे मरां ज़ैड़ी तू रहतस शुना, ते शुन्तां माफ़ केरां।

31 "अगर कोई केन्चेरे खलाफ पाप केरे, तैस कसम दित्ती गाए, ते तै एइतां इस भवने मां तेरी वेदी कां कसम केरे, 32 तैखन तू सुर्गे मां शुन्तां, अपने दासां केरो न्याय केरतां दुष्टे दुष्ट ठहरास ते ज़ैन तैनी कियोरूए तैसेरी सज़ाह तैस दे, ते बेकसूरे बेकसूर ठहरेइतां, ते तैसेरी धार्मिकतारे मुताबिक तैस फल देइयां। 33 फिरी ज़ैखन तेरे इस्राएली लोक पाप केरनेरे वजाई सेइं अपने दुश्मन्न करां हैरी गान, ते तेरे पासे फिरतां तेरू नवं घिन्तां तेरे इस भवने मां तीं कां बिनती केरतां तीं कां प्राथना केरन, 34 तैखन तू सुर्गे मरां शुन्तां, अपने इस्राएली लोकां केरो पाप माफ़ केरां: ते तैन इस मुल्खे मां फिरी वापस ऐन्हां, ज़ै तीं तैन केरे दादे-पड़दादन दित्तोरो थियो।

35 "ज़ैखन तैना तेरे खलाफ पाप केरन, ते तैस पापेरे वजाई सेइं अम्बर बन्द भोल्हु कि झ़ड़ी न भोए, एरे मौके अगर तैना इस ठारारे पासे प्राथना केरतां तेरू नवं घिन्नेले ज़ैखन तू तैन्न दुख देतो भोल्हो, ते तैना अपने पापे करां फिरी गान, त तू सुर्गे मरां शुन्तां तैन केरे पाप माफ़ केरां। 36 ते अपने दासां, ते अपने इस्राएली लोकां केरो पाप माफ़ केरां। तू ज़ै तैन रोड़ी बत हिरातस, ज़ैस पुड़ तैना च़लोरे लोड़तन, एल्हेरेलेइ अपने इस मुल्खे पुड़, ज़ै तीं अपने लोकां केरो हिस्सो केरतां दित्तोरोए, झ़ड़ी बखेइयां।

37 "ज़ैखन इस मुल्खे मां काल या महामारी या शोह पे या फसली गेरूई या टिट्टां या कीड़े लग्गन या तैन केरे दुश्मन तैन फाटकन मां तैन्न घेरन ते कोई आफत या रोग कि न भोए, 38 तैखन अगर कोई मैन्हु या तेरे इस्राएली लोक अपने-अपने मनेरो दुख बुझ़न ते छंदे केरतां अपने हथ खड़े केरतां तेरे भवनेरे पासे प्राथना केरन; 39 त तू सुर्गे मरां ज़ैड़ी तू रहतस शुन्तां माफ़ केरां, ते एनकेरां कि हर एक्‍की मैन्हु तैसेरी मनेरी गल्‍लां बुझ़तां तैसेरे सारे चालरे मुताबिक तैस फल देइयां: तूए त सैरी मैन्हु केरे दिलेरे भेद ज़ान्ने बालोस। 40 तैखन तैना ज़ेत्रे दिहाड़े इस मुल्खे मां रान, ज़ै तीं तैन केरे दादे-पड़दादन दित्तोरो थियो, तेत्रे दिहाड़न तगर तेरो डर मन्ते रान।

41 "फिरी परदेशी भी ज़ैना तेरे इस्राएली लोकन मरां न भोन, ज़ैखन तैना तेरू नवं शुन्तां दूर मुल्खेरां एज्जन, 42 तैना त तेरू महान नवं ते शेक्ति बालो हथ ते तेरी अग्रोवं कियोरी पाखड़री खबर शुन्न; एल्हेरेलेइ ज़ैखन एरहो कोई एइतां इस भवनेरे पासे प्राथना केरे, 43 त तैखन तू अपने सुर्गे मरां शुना ज़ैड़ी तू रहतस, ते ज़ैस गल्‍लरे लेई एरहो ज़ेरो परदेशी तीं कां प्राथना केरे, तैसेरे मुताबिक तैस सेइं बर्ताव केरां ज़ेसेरी वजाई सेइं ज़मीनी पुड़ेरे सारे मुल्खां केरे लोक तेरू नवं ज़ैनतां तेरे इस्राएली लोकां केरे सामने तेरो डर मन्न, ते इन ज़रूर समझ़न, कि ई भवन ज़ैन मीं बनेवरोए, तैस जो तेरो भवन ज़ोतन।

44 "ज़ैखन तेरे लोक ज़ैड़ी कोन्च तू तैन लड़ाई केरने भेज़स, तैड़ी तैना अपने दुश्मन्न सेइं लड़ाई केरनेरे लेई निस्सी गान, ते इस नगरेरे पासे ज़ैन तीं च़ुनोरूए, ते इस भवनेरे पासे ज़ै मीं तेरे लेई बनेवरोए, यहोवा कां प्राथना केरन, 45 तैखन तू सुर्गे मरां तैन केरि प्राथना ते बिनती शुना ते तैन केरो न्याय केरां।

46 "कोई मैन्हु एरहो नईं ज़ैनी पाप नईं कियोरो: अगर इना भी तेरे खलाफ पाप केरन, त तू तैन पुड़ क्रोध केरतां तैन दुश्मना केरे हथ्थे देइयां, ते तैना तैन्न गुलाम बनेइतां अपने मुल्खे जो नेन, चाहे तै दूर भोए या नेड़े, घिन्नी गान, 47 ते अगर तैना गुलैमरे मुल्खे मां सोच विचार केरन, ते मुड़तां अपने गुलाम बनाने बालां केरे मुल्खे मां तीं कां बिनती केरन, ‘कि असेईं पाप कियोरोए, ते बुराई ते दुष्टता कियोरीए;’ 48 ते अगर तैना अपने तैन दुश्मना केरे मुल्खे मां ज़ैनेईं तैना गुलाम बनेइतां नियोरे भोन, अपने पूरे मने ते प्राणन सेइं तेरे पासे फिरन ते अपने इस मुल्खेरे पासे ज़ै तीं तैन केरे दादे-पड़दादन दित्तोरो थियो, ते इस नगरेरे पासे ज़ैन तीं च़ुनोरूए, ते इस भवनेरे पासे ज़ै मीं तेरे लेई बनेवरोए, तीं कां प्राथना केरन, 49 त तू सुर्गे मरां ज़ैड़ी तू रहतस तैन केरि प्राथना ते बिनती शुना ते तैन केरो न्याय केरां, 50 ते ज़ैना पाप तेरे लोक तेरे खलाफ केरेले, ते ज़ेत्रे तैना गुनाह तेरे खलाफ केरेले, सेभन माफ़ केरतां, तैन केरे गुलाम बनाने बालां केरे मने मां एरी दया करेइतां कि तैना तैन पुड़ दया केरनेबाले भोन। 51 किजोकि तैना त तेरे लोक ते तेरो अपनो हिस्सो आन ज़ैना तीं लोंहेरे भठ्ठे मरां मतलब मिस्र मुल्खे मरां केढतां आनोरेन। 52 एल्हेरेलेइ तेरी एछ़्छ़ी तेरे दासेरे बिनतरे पासे ते तेरे इस्राएली लोकां केरे बिनतरे पासे खुल्‍ली रान, ज़ैखन-ज़ैखन तैना तीं कां प्राथना केरन, तैखन-तैखन तू तैन केरि प्राथना शुनां; 53 किजोकि हे प्रभु यहोवा अपने तैस वाधेरे मुताबिक, ज़ै तीं इश्शे दादे-पड़दादन सेइं मिस्र मुल्खेरे निसनेरे मौके अपने दास मूसेरे ज़िरिये कियोरो थियो, तीं अपने लोक अपनो खास हिस्सो भोनेरे लेई दुनियारे सैरी कौमन करां अलग कियोरेन।" 54 ज़ैखन सुलैमाने यहोवा कां ऐह सब प्राथना छंदे केरतां की, ज़ैखन तै ज़ैंधू केरे भारे ते सुर्गेरे पासे हथ फैलेइतां थियो, यहोवारी वेदी करां खड़ो उठो, 55 ते सारे इस्राएली लोकन उच्‍ची आवाज़ी मां आशिर्वाद देइतां ज़ोवं, 56 "यहोवारी तारीफ़ भोए, ज़ैनी ठीके अपने ज़ोनेरे मुताबिक अपने इस्राएली लोकन शान्ति दित्तोरिए, ज़ेत्रे वाधे तैने अपने दास मूसेरे ज़िरिये कियोरे थिये तैना सब पूरे किये। 57 इश्शो परमेशर यहोवा ज़ेन्च़रे इश्शे दादे-पड़दादन सेइं साथी रहतो थियो, तेन्च़रे असन सेइं साथी भी राए, तै असन न शारे ते न असन करां दूर भोए। 58 तै इश्शो मन अपने पासे एन्च़रे फिरेइतां रख्खे, कि असां तैसेरी सैरी बत्तन पुड़ च़लते रहम, कि असां तैसेरे हुक्मन ते विधन ते नियमन ज़ैना तैनी इश्शे दादे-पड़दादन दित्तोरे थिये, हमेशा मन्ते रहम। 59 ते मेरी इना गल्‍लां ज़ैन केरि मीं यहोवारे सामने बिनती कियोरीए, तैना रात दिहैड़ी इश्शे परमेशर यहोवारे मने मां बनोरी रान, ते ज़ेरि रोज़ ज़रूरत भोए तेन्च़रे तै अपने दासेरो ते अपने इस्राएली लोकां केरो न्याय केरतो राए, 60 ते एस सेइं दुनियारी सैरी कौमां बुझ़न, कि यहोवा ही परमेशरे, ते होरो कोई परमेशर नईं। 61 ते तुश्शो मन इश्शे परमेशर यहोवारे पासे एरहो पूरे तरीके सेइं लगोरो राए, कि अज़्ज़ेरे ज़ेरे तैसेरी विधन पुड़ च़लते ते तैसेरे हुक्मन मन्ते रहम।" 62 तैखन सुलैमान राज़ो सारे इस्राएली लोकन साथी यहोवा जो मेलबलि च़ाढ़ने लगो। 63 ते ज़ैना जानबर सुलैमाने मेलबलि देनेरे लेई यहोवा जो च़ाढ़े, तैना 22000 दांत ते 120000 भैड्डां थी। एस तरीके सेइं राज़े ते ज़ैना इस्राएली लोक तैड़ी थिये तैन सेइं साथी यहोवारे भवनेरी प्रतिष्ठा की। 64 तैस दिहाड़े राज़े यहोवारे भवनेरे सामनेबाले अंगनेरे मझ़ाटे भी अक ठार पवित्र की ते होमबलि ते अन्नबलि ते मेलबेलि केरि चर्भी तैड़ी च़ाढ़ी; किजोकि ज़ै पितलरी वेदी भवनेरे सामने थी, तै तैन केरे लेई निकड़ी थी। 65 सुलैमान राज़े ते तैस सेइं साथी ज़ैना इस्राएली लोक तैड़ी थिये तैन केरि अक बड़ी सभा ज़ै हमात नगरेरे फाटके करां लेइतां मिस्रेरे नाले तगर सारे मुल्खां केरे लोक अकोट्ठे भोवरे थिये, च़ेवधे दिहाड़न तगर इश्शे परमेशर यहोवारे सामने एन झोफड़ी केरू तिहार मनावं। 66 फिरी तिहार खतम भोनेरे एग्री दिहाड़ेरे बाद इस्राएली लोक भेज़े। ते तैना राज़े धन, धन, ज़ोइतां तैस सब भलैइयरे वजाई सेइं ज़ै यहोवा अपने दास दाऊद ते अपने इस्राएली लोकन सेइं कियोरी थी, खुश ते मघन भोइतां अपने-अपने डेरन जो च़ले जे।