1 फिरी यहोवाए मूसे सेइं ज़ोवं, 2 "मेण्डलरे लोक कुजानेरे लेई ते डेरन मरां अग्रोवं च़लनेरे लेई चैंदरे दूई नरशिंगे बनाए गान। 3 ते ज़ैखन तैना दूईये बज़ाए गान, तैखन सारे लोक मिलापे बाले तेम्बु कां दारे पुड़ अकोट्ठे भोइ गान। 4 अगर एक्‍की बार नरशिंगो बज़ाव गाए, त प्रधान लोक ज़ैना इस्राएली लोकां केरे हज़ारां केरे प्रधान्न, तीं कां अकोट्ठे भोन। 5 ज़ैखन तुस लोक ज़ोरे सेइं नरशिंगो बज़ाथ, त मिलापे बाले तेम्बेरे पूर्वेरे पासेरे डेरां केरे लोक अग्रोवं च़लन। 6 ते ज़ैखन तुस दूइयोवं फेरे ज़ोरे सेइं नरशिंगो बज़ाथ, तैखन मिलापे बाले तेम्बेरे दक्षिणेरे पासेरे डेरां केरे लोक अग्रोवं च़लन। तैन केरे सफर केरनेरे लेई तैना ज़ोरे सेइं बज़ान। 7 पन ज़ैखन सब लोकेईं अकोट्ठे केरतां सभा केरनि भोल्ही, त नरशिंगो बज़ानो, पन ज़ोरे सेइं नन्ना। 8 ते हारूनेरां मट्ठां ज़ैना याजकन, तैन्ना तैन नरशिंगे बज़ान। ऐह गल तुश्शी पीढ़ी-पीढ़ी तगर हमेशारे लेई विधि सेइं च़लती राहेली। 9 ते ज़ैखन तुस अपने मुल्खे मां कोन्ची सतानेबाले सेइं लड़नेरे लेई निस्सथ, तैखन ज़ोरे सेइं नरशिंगे बज़ान, तैखन तुश्शो यहोवा तुश्शी मद्दत केरेलो, ते तुस अपने दुश्मन करां बच़ाए गाले। 10 अपने आनन्द केरनेरे वक्ते मां, ते अपने खास तिहारे मां, ते महीनेरे शुरुआती मां एपनी होमबलि ते मेलबलि सेइं साथी एना नरशिंगे बज़ान, एस सेइं तुश्शे यहोवाए तुश्शी याद एज्जेली, अवं तुश्शो यहोवा आईं।"

11 इस्राएली लोकां केरे मिस्र मुल्खे मरां निसनेरे दूइयोवं सालेरे दूइयोवं महीनेरे बिहोवं दिहाड़े बिदलार मिलापे बाले तेम्बु पुड़ेरां खड़ी भोइ जेई, 12 तैखन इस्राएली लोक सीनैरे सुनसान ठैरी मरां निस्तां अग्रोवं सफरे मां च़ले, ते बिदलार पारान नंव्वेरे सुनसान ठैरी मां रुकी जेई। 13 यहोवारे हुक्मेरे मुताबिक ज़ैना तैनी मूसे दित्तोरे थिये पेइली बार तैन केरू सफर शुरू भोवं। 14 ते सेब्भन करां पेइले त यहूदी केरे डेरां केरे लोकां केरे झणडेरू सफर शुरू भोवं, ते तैना सब टोली बनेइतां च़ले, ते तैन केरो सेनापति अम्मीनादाबेरू मट्ठू नहशोन थियूं। 15 ते इस्साकारेरे गोट्लेरो सेनापति सूआरेरू मट्ठू नतनेल थियूं। 16 ते जबूलूनेरे गोट्लेरे लोकां केरो सेनापति हेलोनेरू मट्ठू एलीआब थियूं। 17 ते तैखन मिलापे बालो तेम्बु उसालो जेव, ते गेर्शोनी लोक ते मरारी लोकेईं मिलापे बालो तेम्बु छ़ुइतां सफर शुरू कियूं। 18 फिरी रूबेनेरे डेरेरे झणडेरे लोक च़लने लगे, ते तैना भी अपनु दल बनेइतां च़ले, ते तैन केरो सेनापति शदेऊरेरू मट्ठू एलीसूर थियूं। 19 ते शिमोनी लोकां केरे गोट्लेरो सेनापति सूरीशद्दैरू मट्ठू शलूमीएल थियूं। 20 ते गादी लोकां केरे गोट्लेरो सेनापति दूएलेरू मट्ठू एल्यासाप थियूं। 21 ते तैखन कहाती लोकेईं पवित्र चीज़ां छ़ुइतां सफर शुरू कियूं, ते तैन केरे पुज़ने तगर गेर्शोनी ते मरारी लोकेईं मिलापे बालो तेम्बु खड़ो कियो। 22 फिरी एप्रैमी लोकां केरे डेरां केरे झणडेरू सफर शुरू भोवं, ते तैना भी अक दल बनेइतां च़ले; ते तैन केरो सेनापति अम्मीहूदेरू मट्ठू एलीशामा थियूं। 23 ते मनश्शेरे गोट्लेरो सेनापति पदासूरेरू मट्ठू गम्लीएल थियूं। 24 ते बिन्यामीनेरे गोट्लेरो सेनापति गिदोनी एरू मट्ठू अबीदान थियूं। 25 फिरी दानी लोकां केरे डेरां केरे झणडेरू सफर शुरू भोवं, ते तैना भी अक दल बनेइतां च़ले; ते तैन केरो सेनापति अम्मीशद्दैरू मट्ठू अहीएजेर थियूं। 26 ते आशेरी लोकां केरे गोट्लेरो सेनापति ओक्रानेरू मट्ठू पगीएल थियूं। 27 ते नप्ताली लोकां केरे गोट्लेरो सेनापति एनानेरू मट्ठू अहीरा थियूं। 28 इस्राएली लोक एन्च़रे सेइं अपने-अपने दलां केरे मुताबिक अग्रोवं सफर केरते थिये, ते अग्रोवं च़लते रहते थिये।

29 एक्सां मूसे अपने शेरहे रूएल मिद्यानेरे मट्ठे होबाबे सेइं ज़ोवं, "अस लोक तैस ठारारे सफरे मां च़लते रहतम ज़ेसेरे बारे मां यहोवा ज़ोवरू थियूं, ‘अवं तै मुल्ख तुसन देइलो,’ एल्हेरेलेइ तू भी असन सेइं साथी च़ल, ते असां तेरी भलियाई केरमेले, किजोकि यहोवा इस्राएली लोकां केरे बारे मां भलू केरनेरो वाधो कियोरोए।" 30 होबाबे तैस जुवाब दित्तो, "अवं न च़ेलि; मीं अपने मुल्खे ते अपने खानदानेरे लोकन मांजो वापस गानूए।" 31 फिरी भी मूसे ज़ोवं, "असन न छ़ड, किजोकि जंगले मां कोड़ि-कोड़ि डेरे लानेन इस गल्‍लरो तीं पतोए, तू इश्शे लेई एछ़्छ़ी केरू ज़ेरू कम केरां। 32 अगर तू असन सेइं साथी च़लस त सच़्च़े ज़ै भलियाई यहोवा असन सेइं केरेलो, तैसेरे मुताबिक अस भी तीं सेइं भलियाई केरमेले।"

33 फिरी इस्राएली लोकेईं यहोवारे पहाड़े पुड़ेरां अग्रोवं ट्लाई दिहाड़ां केरू सफर कियूं, ते तैन ट्लाईए दिहाड़न मां यहोवाए करारेरो सन्दूख तैन केरे लेई आरामेरी ठार तोप्पी तैन अग्री-अग्री च़लतो राव। 34 ते ज़ैखन तैना डेरन मरां अग्रोवं च़लते थिये, तैस वक्तेरे देइतां पूरी दिहैड़ी यहोवारी बिदलार तैन पुड़ रहती थी। 35 ते ज़ैखन-ज़ैखन करारेरो सन्दूख अग्रोवं च़लाव गातो थियो, तैखन-तैखन मूसो एन ज़ोतो रहतो थियो, "हे यहोवा, उठ, ते तेरे दुश्मन तितर-बितर भोइ गान, ते तीं सेइं नफरत केरनेबाले तेरे सामनेरां नेश्शी गान।" 36 ते ज़ैखन-ज़ैखन तै रुकी गाती थी, त मूसो एन ज़ोतो थियो, "हे यहोवा हज़ारेईं हज़ार इस्राएली लोकन मां वापस एज्जी गा।"