1 यहोवाए मूसे सेइं ज़ोवं। 2 "इस्राएली लोकन सेइं ज़ोइयां कि मेरे लेई च़ढ़तल आन्न, ज़ैन एपनी मेर्ज़ी सेइं देनू चान तैन सेब्भन करां मेरे लेई च़ढ़तल नेइयां। 3 ते ज़ैना चीज़ां केरि च़ढ़तल तैन करां आन्नीए, तैना इना आन, मतलब सोन्नू, चाँदी, पितल। 4 नीले बैंगनी ते लाल रंगेरो कपड़ो ते सूक्ष्म सनेरो कपड़ो ते छ़ेल्‍लरी ज़ड़ां, 5 लाल रंगे सेइं रंगोरी हुड़ां केरि खाड़ी, ते समुन्दरी बछ़ड़ां केरि खाड़ी, किकरेरी लकड़ी। 6 लौअरे लेई तेल, अभिषेक केरनेरे तेलेरे लेई ते खुशबूदार धूपेरे लेई खुशबूदार चीज़ां। 7 एपोद ते चपरासेरे लेई सुलैमानी घोड़, ते ज़ोड़नेरे लेई मणि। 8 ते तैना मेरे लेई अक पवित्र ठार बनान, कि अवं तैन केरे दरमियाने मां रेईं। 9 ज़ैन किछ अवं तीं हिराताईं, मतलब रानेरी ठार ते तैसेरे सब सामानेरो नमूनो, तैसेरू ज़ेरू तुस लोक तैस बनेइयथ।

10 "किकरेरी लेकड़रो अक सन्दूख बनाव गाए, तैसेरी लम्बाई ढाई हथ, ते चौड़ाई ते ऊँचाई डैढ-डैढ हथ भोए। 11 ते तैस खालिस सोन्ने सेइं अन्तर मेइं ते बेइर मेइं पलटेइयथ, ते सन्दूखे पुड़ सोन्नेरो बाड़ बनेइयथ। 12 ते सोन्नेरे च़ेवर कड़े कढेइतां तैसेरे च़ेवरे पासन पुड़, एक्‍की पासे दूई कड़े ते होरि पासे भी दूई कड़े लुवेइयथ। 13 फिरी किकरेरी लेकड़रे डण्डे बनावेइयथ, ते तैन्न भी सोन्ने सेइं मैढ़थ। 14 ते डण्डे सन्दूखेरे दूईये पासां केरे कड़न मां छ़डने ज़ेसेरे ज़ोरे सेइं सन्दूख छ़ूओ गाए। 15 तैना डण्डे सन्दूखेरे कड़न मां लग्गोरे रान ते तैस करां अलग न किये गान। 16 ते ज़ै गवैहरो सन्दूख, अवं तुसन देलो तैस, तैस्से सन्दूखे मां रेखथ।

17 "फिरी खालिस सोन्नेरू अक प्रायश्चतेरी गद्दी *बनावेइयां, तैसेरी लम्बाई ढाई हथ, ते चौड़ाई डैढ हथ भोए। 18 ते सोन्नू ढैलतां दूई करूब बनावेइतां प्रायश्चितेरे ढकनेरे दूईये पासन लुवेइयां। 19 अक करूब त एक्‍की पासे पुड़ ते होरो करूब होरि पासे लुवेइयां, ते करूबेरे ते प्रायश्चितेरे ढकने तैसेरे टुक्ड़े सेइं बनावेइतां तैसेरे दूईये पासन लुवेइयां। 20 ते तैन करूबां केरां फंघां बैंधोरां एरां फैलोरां बन्न कि प्रायश्चितेरू ढकनू तैस पुड़ ज़ुड़े, ते तैन केरां तुत्तरां आमने-सामने ते प्रायश्चितेरे ढकनेरे पासे रान। 21 ते प्रायश्चितेरू ढकन सन्दूखे पुड़ लुवेइयां, ते ज़ै गवैहरी तेख्ती अवं तीं देलो तैस सन्दूखे मां रेखां। 22 ते अवं तैस पुड़ रेइतां तीं सेइं मिलतो रालो; ते इस्राएली केरे लेई ज़ेत्रे हुक्म मीं तीं देने भोल्हे, तैना सेब्भी केरे बारे मां अवं प्रायश्चितेरे ढकने पुड़ ते तैन करूबां केरे मझ़ाटे मरां, ज़ैना गवैहरे सन्दूख पुड़ भोल्हे, तीं सेइं गलबात केरतो रालो।"

23 "फिरी किकरेरी लेकड़रो अक मेज़ बनावेइयां, तैसेरी लम्बाई अक हथ, चौड़ाई अक हथ, ते ऊँचाई डैढ हथ भोए। 24 तैस खालिस सोन्ने सेइं पलैट्टां, ते तैसेरे च़ेवरे पासन सोन्नेरो अक बाड़ बनावेइयां। 25 ते तैसेरे च़ेवरे पासन च़ेवर अंगल चौड़ी अक पटरी बनावेइयां, ते तैस पटेरारे च़ेवरे पासन सोन्नेरो अक बाड़ बनावेइयां। 26 ते सोन्नेरे च़ेवर कड़े बनावेइतां मेज़ेरे तैन च़ेवरे कून्न मां लुवेइयां, ज़ैना तैसेरे च़ेवरे पेइड़न पुड़ रान। 27 तैना कड़े पेटरी पुड़े रान, ते डण्डन सेइं मेज़ ठमनेरू कम देनेरे लेई भोल्हे। 28 ते डण्डे किकरेरी लेकड़रे बनावेइतां सोन्ने सेइं पलैटाने, ते मेज़ तैन्ने सेइं छ़ूवो गाए। 29 ते तैसेरी पातर धूपदान, ते चमचे ते उलटानेरे लेई कुटोरे, सब खालिस सोन्नेरे बनावानू। 30 ते मेज़े पुड़ मीं कां च़ैढ़ोरी रोट्टी लगातार रखनी।

31 "फिरी खालिस सोन्नेरो अक दीवट बनानो। ते सोन्नू ढैलेइतां तै दीवट, पेइड़े ते डण्डे समेत बनाव गाए; तैस पुड़ फूड़ू केरो गुच्छो, ड्लन्ठ ते फूड़ू, सब एक्‍की टुक्ड़ेरां बनाना। 32 ते तैसेरे ड्लखोरां शा, डैलड़ी दीवटेरे एक्‍की पासेरां निसोरी भोन ते ट्लाई डैलड़ी तैसेरी होरि पासेरां निस्सोरी भोन; 33 हर एक्‍की डैलड़ी मां बदामेरे फूड़ू केरे ज़ेरे ट्लाई-ट्लाई फूड़ू केरे गुच्छे भोन, अक-अक ड्लन्ठ, ते अक-अक फूड़ोंव भोए; दीवटे मरां निस्सोरी शा डैलड़ी केरो ईए आकार या नकशो भोए। 34 ते दीवटेरे डेन्डी मां बदामेरे फूड़ू केरे ज़ेरे च़ेवर फूड़ू केरे गुच्छे भोन ते अपने-अपने ड्लन्ठ ते फूड़ोंव सने भोन। 35 ते दीवटे मरां निस्सोरे शा डैलड़न मरां दूई-दूई डैलड़ी केरे बुन अक-अक ड्लन्ठ भोए, तैना दीवटे सने एक्‍की टुक्ड़ेरे बनोरोए भोन। 36 तैन केरे ड्लन्ठ ते डैलड़ी, सब दीवटे सने एक्‍की टुक्ड़ेरे भोन, खालिस सोन्ने ढलवेइतां पूरो दीवट एक्‍की टुक्ड़े सेइं बनावेइयां। 37 ते सत दीये बनावेइयां; ते दीये बाले गान कि तैना दीवटेरे सामने लौ देन। 38 ते तैसेरे गुलतराश ते गुलदान सब खालिस सोन्नेरे भोन। 39 दीवट ते इन सारी चीज़न सने एक्‍की तोड़े* खालिस सोन्नेरू बनानू। 40 ते खबरदार रेइतां इन सब चीज़न तैस नमुनेरी ज़ेरि बनावेइयां, ज़ै तीं इस पहाड़े पुड़ हिरेवरोए।