2 Samweli 5

Dafidi e di bugyu Isareli

1 Ɛwʋ gɛ Isareli wo-ifoli yii begyegeyelɛ fɔ powu bɛ ba Dafidi wakʋn Hebron, gɛ bɛ dɔ̀ wɔ alan, <<Ɛtɩ ma awɔ tì di gɛ nkalan kɩlɩn. 2 Ɔya fɔ waanɩ gɛtɛ Sawulo è di tiigyu-dɩrɛ gba fɔ, awɔ na gyegeye a tɛ Isareli bete fɔ akpa yaanɩ, gɛ Yahwe ɛ dɔ̀ wɔ̀ alan, <Awɔ nan mɛ mɩɩn bɛnɩ Isareli bete bɔɔnyalɛ, gɛ aà bɛ mɛ boogyu.>> 3 Gɛlɛ wuu koro Dafidi ma Isareli begyegeyelɛ fɔ powu bɛ tà dikola Yahwe bʋnʋn Hebron dʋkɔbɛ. Gɛ bɛ sʋrʋ Dafidi bʋnɔ bɛ sɩ̀ wɔ Isareli wogyu-dɩrɛ. 4 Dafidi e di bɩkyan dikpilin ma fwo (30), pɛgɛ bɛ sɩ wɔ bugyu, gɛ e di bugyu bɩkyan akpilin anyɔɔ (40). 5 Ɛ sara Hebron ditele e di bugyu ɛ tɛ Yuda wofoli fɔ bɩkyan kwarankɩ ma bebon kooron. Gɛ ɛ sara Yerusalem e di bugyu ɛ tɛ Isareli ma Yuda bete powu bɩkyan dikpilin ma fwo bisiyee (33).

Dafidi e di Yerusalem ditele dii koro.

6 Duwi dɩkɩ Dafidi e gyegeye wɔ bɩtà bʋʋ bɛtàlɛ bɔɔ bʋnʋn bɛ san Yerusalem bàà ma kpà ma Yebusi bete gɛtɛ bɛ̀ sa dʋkɔ fɔ. Ɛwʋ gɛ Yebusi bete bɛ dɔ̀ Dafidi alan, <<Ɩɩn talɩ i gyu nfan. Bɛnʋn-gbenalɛ ma ɔtagasɩ ɛbɛ gba nan berema yɩ be ye nfan.>> Yema bɛ sa dɩmɩnlɛ alan, <<Dafidi ɛn nan talɩ e gyu dʋkɔbɛ.>> 7 Mɔ fɔ Dafidi e di ditele gɛtɛ dì di ɔkɛmakʋn gɛtɛ bee kpèlè Siyon gɛtɛ be foma dii diyere alɛ Dafidi Ditele fɔ dii koro. 8 Duwi dɩtɔkɔ Dafidi ɛ dɔ̀ wɔ bɛnɩ alan, <<Ɛbɛ gɛtɛ bee len bàà di Yebusi bete boo koro fɔ, wù di gɛtɛ bàà da gɛ ma butu buusele bɛ ma ye ɔtagasɩ ɛbɛ ma bɛnʋn-gbenalɛ gɛtɛ bè di Dafidi bɛkyʋnlɛ fɔ baakʋn. Gɛlɛ wuu koro gɛ wʋ dʋrɔ ade-dɔ̀lɛ alan, <<Bɛnʋn-gbenalɛ ma ɔtagasɩ ɛbɛ bɛn nan gyu digyu-kpara>> fɔ. 9 Gɛtɛ Dafidi e di ditele gɛtɛ be sere ɩpɔrɩ be silin di be tuma fɔ dii koro e were fɔ, ɛ sara daanɩ gɛ ɛ sa dɩ diyere alɛ <<Dafidi Ditele-dɩrɛ.>> Gɛ Dafidi e sere ɩpɔrɩ e silin atele ɛ fɩya ma ditele-dɩrɛ fɔ ye ofila wʋʋ gɛtàkʋn wʋʋ gɩlan. 10 Gɛ Dafidi e bè wura ɔkɛma gakpa yema Yahwe, Wurubwarɛ Kpatakpɩrɩ fɔ ɛ̀ sa ma ɛwɔ okoro.

11 Duwi dɩkɩ Tire wogyu-dɩrɛ Hiram ɛ sa bɛsaranyan Dafidi wakʋn. Gɛ bɛ ka Seda wo-iyon, ma bɛkapɩnta, ma bɛnɩ gɛtɛ bɛɛ ka ataa bɛ mara akwo. Gɛ bɛ ma sere digyu-kpara bɛ tɛ Dafidi. 12 Nyawʋ wʋ yɛ Dafidi ɛ nyɩnla alɛ Yahwe na ka wɔ na sɩ̀ Isareli bete boogyu, gɛ wɔ bɛnɩ Isareli bete boo koro, ɛ yɛ wo bugyu bʋ bʋn. 13 Gɛtɛ Dafidi e ye Hebron ɛ san Yerusalem fɔ, ɛ ma ka bedima, ma bɛna kpekpesi, gɛ be ni wo bebi-teni ma bɛnanɩ bɛ tɛ wɔ. 14 Bebi gɛtɛ be wo bɛ tɛ wɔ dʋkɔ fɔ baayere n di Samuwa, ma Sobabi, ma Natan, ma Solomon, 15 ma Ibiha, ma Elisuwa, ma Nefegi, ma Yafiya, 16 ma Elisama, ma Eliyada, ma Elifeleti.

Dafidi e di Filisiti bete boo koro.

17 Gɛtɛ Filisiti bete fɔ bɛ nʋn alɛ bɛ sʋrʋ Dafidi bʋnɔ, bɛ sɩ̀ bugyu bɛ tɛ Isareli fɔ, bɛ ka ɔkɛma-dɩrɛ bɛ tɔ bàà ma bugiti wɔ. Mɔ Dafidi ɛ nʋn ade fɔ, gɛ ɛ tɔ ɛ ma gyu gebukʋn. 18 Ɛwʋ gɛ Filisiti bete fɔ be be gyu Refayim dɩtagba gɛ bɛ yasɩ be gyu daanɩ. 19 Ɛwʋ gɛ Dafidi e lila Yahwe alan, <<N ma kpà ma Filisiti bete fɔ? Aà yɛ mɩ nan di boo koro?>> Ɛwʋ gɛ Yahwe ɛ dɔ̀ Dafidi alan, <<Ɩɩn, ma kpà, nan yɛ wɔ̀ àà nyɩ di Filisiti bete boo koro.>> 20 Ɛwʋ gɛ Dafidi ɛ san Bala-Perasim. Dʋkɔ gɛ ɛ ma kpà ma Filisiti bete, gɛ e di boo koro. Gɛ Dafidi ɛ dɔ̀ alan, <<Yahwe e di mɩɩn bɛkyʋnlɛ boo koro anlɛ getu gɛtɛ gɩ yɔn gɩ waalɩ.>> Okoro be kpèlè dʋkɔ alan, Bala-Perasim.*5:20 Gɛtɛ wuu wùlà alɛ, Wurubwarɛ gɛtɛ ɛɛ tana isele 21 Filisiti bete bɛ tɔ bɛ da be kere boo bekpen bɛ ya, gɛ Dafidi ma wɔ bɛnɩ be tola bɛ bɛ da. 22 Ɛwʋ gɛ Filisiti bete fɔ be biri bɛ bɛ yasɩ be gyu Refayim dɩtagba fɔ daanɩ. 23 Gɛ Dafidi e biri e lila Yahwe alɛ ɛ ma kpà ma ɛbɛ? Gɛ ɛ dɔ̀ wɔ alan, <<Kara tuma bɛ bʋnʋn-bʋnʋn, mɔ fɔ, mɛ dikulukulubi sa bɛ ye gamama, fɔ àà bɛ sʋ bɛ sa Balisam wo-iyon fɔ yɩɩpɩ. 24 Gengyi gɛ a bɔ à nʋn bɩsɩrɩ baagingin Balisam wo-iyon yɩɩ gatala fɔ, san bilen, wuu wùlà alɛ nmɩ Yahwe ǹ gyegeye aa bʋnʋn ǹ ma wolo Filisiti bɩtà bʋʋ bɛtàlɛ fɔ. 25 Dafidi ɛ mɛ anlɛ gɛtɛ Yahwe ɛ dɔ̀ wɔ fɔ, gɛ e wolo Filisiti bete fɔ, ye Gibeyon ma sere Gese.