Nehemiya 2

Nehemiya ɛ san Yerusalem

1 Duwi dɩkɩ, Nisan*2:1 Nisan è di ebon-gyangbasɛlɛ Yuda bete bɔɔ gɩkyan gaanɩ. Ɛ sa gɛ Kirisito bete bɔɔ gɩkyan giibon-siyeefɛ ma ɛnaafɛ boo getite. wobon anɩ, egyu-dɩrɛ Aritaserisi gɩkyan dikpilinfɛ gaanɩ, gɛtɛ bɛ ka bʋkan bɛ mɔma egyu-dɩrɛ fɔ, na ka bʋkan fɔ na san ma wɔ. Fɔ en te we mɩ nan bɔnkyɔn n nya. 2 Okoro egyu fɔ e lila mɩ alan, <<Anʋn yii koro gɛ a bɔnkyɔn gɛlɛ gɛtɛ an taa yeba mɔ? Nyawʋ bɩrɛ wù di gɛ ade ɩkɩ n tɛ ha wɔ̀ aaturu waanɩ.>>

Dʋkɔ fɔ, wʋ mɛ mɩ gɩsaa wʋ kààrà. 3 Gɛ na dɔ̀ egyu fɔ alan, <<Egyu-dɩrɛ, sara nkpa gakpaakpa! Na bɔnkyɔn yema ditele-dɩrɛ gɛtɛ be lò tiitu ɛbɛ daanɩ fɔ di di gbena, gɛ ɔtan wu kuma-kuma dɩɩ-ɩpʋnʋ.>>

4 Gɛ egyu-dɩrɛ e lila mɩ alan, <<Anʋn gɛ aa len nan mɛ n tɛ wɔ̀?>>

Gɛ na tiri onyun na tɛ Wurubwarɛ gɛtɛ ɛ̀ sa gatala fɔ, 5 gɛ na tiri wuunyun na tɛ egyu-dɩrɛ fɔ alan, <<Egyu-dɩrɛ, gengyi à len, gɛ gengyi maade ii di wɔ̀ gʋnʋn fɔ, tɛ mɩ osele nan san Yuda, ɔkʋn gɛtɛ be lò miintu ɛbɛ fɔ, fɔ nan ma biri n sere ditele fɔ.>>

6 Ɛwʋ gɛ egyu-dɩrɛ e lila mɩ alan, <<Awi alen gɛ aà ma sara dʋkɔ, gɛ duwiri gɛ aà biri a ba?>> Fɔ egyu-dɩrɛ wɔsɔ è si wakʋn. Egyu è len gɛtɛ ɛ̀ɛ̀ tɛ mɩ osele nan san, okoro na tɛ wɔ awi gɛtɛ nan ma di dʋkɔ.

7 Gɛ na biri na dɔ̀ egyu-dɩrɛ alan, <<Egyu-dɩrɛ, gengyi wù di aa gelenbi fɔ, yɛ bàà ŋwara akpa bɛ tɛ mɩ gɛtɛ nan ka n ma tɛ Efrati Getu-fèn giisele wʋʋ bɛnyalɛ, fɔ bàà tɛ mɩ osele nan ma gyu Yuda. 8 Nte koturu wɔ̀ ke alɛ, yɛ bàà ŋwara gɩkpa tɛ Asafu gɛtɛ è di egyu gɩkan gɩɩnyalɛ fɔ, fɔ ɛ̀ɛ̀ tɛ mɩ iyon nan ka n ma salɩ ɩpʋnʋ n sa dikwo-tɔlɛ gɛtɛ dɩ̀ gbɛma Wurubwarɛ Dikwo-dɩrɛ fɔ, ma ditele fɔ dɩɩpɔrɩ, ma dɩkpaara gɛtɛ nan sara daanɩ fɔ.>> Gɛ gɛtɛ Wurubwarɛ ɛ̀ fɩya ma nmɩ okoro, egyu-dɩrɛ e yera maade gɛtɛ na lila fɔ. 9 Gɛ e tiri bɩtà bʋʋ bɛndɩrɛ ma abengyi yɩɩ bɛsaralɛ bɛkɩ ɛ fɩya ma nmɩ, gɛ na san na ma gyu Efrati Getu-fèn, gɛ na ka egyu-dɩrɛ wakpa fɔ na tɛ osele wʋʋ bɛnyalɛ fɔ.

10 Gɛtɛ Horon-te Sanibalati, ma Amon-te Tobiya bɛ nʋn ade nyayɩ fɔ, wʋ ha gɛtɛ ɛnɩ ɛkɩ ɛ ba ɛ̀ bɛ mɛ gepe ɛ tɛ Isareli bete.

Nehemiya e silin ɛ nya Yerusalem wɔ-ɩpɔrɩ fɔ

11 Okoro na ma gyu Yerusalem, gɛ na sara dʋkɔ awi asiyee. 12 Gɛ na tɔ odente ma beteni-kalansɛ bɛkɩ. Fɔ mɩn dɔ̀ ɛnɩ ɛkɩ ade gɛtɛ miin Wurubwarɛ ɛ ka ɛ sa miinturu waanɩ alɛ n mɛ n tɛ Yerusalem. Fɔ ɛnan gɛtɛ bɛɛ sara wo koro ɛkɩ ɛn ma dʋkɔ, dɩkpɔŋɔ-tɩtɩɩ gɛtɛ na sara dii koro na san fɔ diiko.

13 Na tɔ odente gɛ na ye ma otunu gɛtɛ bee kpèlè Dɩtagba Diitunu fɔ, ka san Egbongbon Wɔlɔkɔ wɔpɩ, ka ma gyu otunu gɛtɛ bee kpèlè Ditonton Diitunu fɔ wʋʋpɩ. Na nya Yerusalem wo-itunu gɛtɛ i sila-sila ɩ nʋ̀n fɔ gepepe, ma wɔ-ɩpʋnʋ gɛtɛ ɔtan wu muru fɔ. 14 Gɛ na san na ma ye Ditiribun Diitunu wʋʋpɩ, ka ma gyu Egyu-dɩrɛ-Dɩbʋna dɩɩpɩ. Mɔ osele wʋkɩ wʋn ma gɛtɛ mɩɩn dɩkpɔŋɔ-tɩtɩɩ fɔ dàà gyu ye. 15 Okoro na bʋn ma dɩtagba fɔ odente-odente wʋtɔkɔ, gɛ na nya ɔpɔrɩ fɔ gepepe, gɛ na biri gama na ma gyu ma Dɩtagba Diitunu fɔ. 16 Fɔ ditele dɩɩ bɛndɩrɛ fɔ baanɩ ɛkɩ ɛn nyɩnla ɔkʋn gɛtɛ na da, abɛɛ ade gɛtɛ ǹ tɛ mɛ. Yema ɔkʋna wʋtɔkɔ fɔ, mɩn tɛ dɔ̀ Yuda bete, abɛɛ gedi gɩɩ bɛtɛlɛ, abɛɛ gebù gɩɩ bɛnɩ, abɛɛ bɛndɩrɛbi, abɛɛ bɛnɩ gɛtɛ baà mɛ gʋtʋn fɔ ade ɩkɩ.

17 Gɛ na bɛ dɔ̀ bɛ alan, <<Ɩ nya dɩfana gɛtɛ ti gyu daanɩ. Yerusalem e gbena, gɛ wɔ-ɩpʋnʋ i kpin. Ɩ yɛ taà biri tɩ mara Yerusalem wɔpɔrɩ fɔ, fɔ tàà ye ɩnɩnfa-dɩrɛ nyayɩ yaanɩ.>> 18 Na nɩ dɔ̀ bɛ anlɛ gɛtɛ miin Wurubwarɛ ɛ̀ sa ma nmɩ, ma anyun-gyebi gɛtɛ egyu-dɩrɛ ɛ tabʋrʋ ɛ tɛ mɩ fɔ.

Gɛ bɛ dɔ̀ alan, <<Ɩ yɛ taà kya ɔpɔrɩ fɔ wuu gebiri-sere!>> Ɛwʋ gɛ bɛ kya gʋtʋn fɔ gɩɩ gɛmɛ.

19 Mɔ gɛtɛ Horon-te Sanibalati, ma wɔsaranyan Amon-te Tobiya, ma Arabi-te Gesem bɛ nʋn ade nyayɩ fɔ, bɛ mʋmwa, gɛ bɛ sa tɩ dɩkpàtà. Gɛ be lila tɩ alan, <<Anʋn yaade gɛ ɩɩ mɛ lɛ? Ii len yàà tɔ yela egyu-dɩrɛ wo koro?>>

20 Gɛ na tiri wuunyun na tɛ bɛ alan, <<Wurubwarɛ gɛtɛ ɛ̀ sa gatala fɔ ɛɛ̀ yɛ gʋtʋn fɔ gàà san gepe tɛ tɩ. Ɛtɩ Wurubwarɛ bɛsaranyan taà biri tɩ kya gesere ɔpɔrɩ fɔ. Mɔ ɛyɩ bɩrɛ ɩn ma gedikʋn gɩkɩ Yerusalem, gɛ ɩn ma otimi wʋkɩ Yerusalem, gɛ akukuba-de ɩkɩ ɩn ma gɛtɛ baà ka bɛ kʋna yɩ.>>