1 Ebon-kɩlɩn fɔ wo duwi dikpilin ma dɩnaafɛ daanɩ fɔ, Isareli bete be tuma, gɛ bɛ ban onyun, gɛ be tin bekotoku baayan, gɛ bɛ ka atɩn bɛ sʋrʋ-sʋrʋ baayu. 2 Isareli bete be tiri koro be ye ɛbɛ gɛtɛ ben di Isareli bete fɔ baanɩ, gɛ bɛ ma yela baayelakʋn, gɛ be tiri ɛbɛ gbagba baade-kpen gɛtɛ bɛ mɛ fɔ, ma ɛyɩ gɛtɛ bootu ɛbɛ bɛ mɛ fɔ bɛ dɔ̀. 3 Be yela ɔkʋn gɛtɛ bè yela fɔ, gɛ bɛ ka awɔrɔnyan asiyee bɛ kalan ade be ye Yahwe, boo Wurubwarɛ fɔ Wose wʋʋ gɩkpa fɔ gaanɩ. Gɛ be biri bɛ ka awɔrɔnyan asiyee be tiri baade-kpen bɛ dɔ̀, gɛ bɛ sʋma Yahwe, boo Wurubwarɛ fɔ. 4 Gɛ Lefi bete Yesuwa, ma Bani, ma Kadimiyeli, ma Sebaniya, ma Buni, ma Serebiya, ma Bani ma Kenani be yela ɔkʋn-tɔlɛkʋn gɛtɛ Lefi bete bee tì yela fɔ, gɛ bɛ gbɛrɛ afala kin-kin be tiri onyun bɛ tɛ Yahwe, boo Wurubwarɛ fɔ. 5 Gɛ Lefi bete Yesuwa, ma Kademiyeli, ma Bani, ma Hasabeneya, ma Serebiya, ma Hodiya, ma Sebaniya, ma Petaya bɛ dɔ̀ alan, <<Ɩ tɔ i yela, fɔ yàà sila Yahwe, yii Wurubwarɛ gɛtɛ ɛ̀ sa gakpaakpa fɔ!

Gesila gɩ kʋtʋma aa gingyebi gii diyere fɔ. Aa diyere dɩ kààrà anlɛ gɛtɛ wù di gɛtɛ bàà sila wɔ̀ fɔ.

6 Aako-kwan n di Yahwe. Awɔ na mɛ gatala, ma gatala gɩɩ gatala, ma gatala gaanyan powu, ma gɛtʋnkwaa ma anyan-kamasɛ gɛtɛ ɩ̀ sa gaanɩ. Awɔ na mɛ bɛpʋ ma anyan gɛtɛ ɩ̀ sa baanɩ fɔ powu. Awɔ n tɛ tɛ gɩnyan-kamasɛ nkpa, gɛ gatala gɩɩ-ɩkɛma powu ii kura ɩ sʋma wɔ̀.

7 Awɔ n di Yahwe, Wurubwarɛ gɛtɛ a tiri Abram, gɛ a ka wɔ a ye Wuri, Babilon gɛtʋnkwaa gaanɩ, gɛ a sa wɔ diyere alɛ Abraham. 8 A we gɛtɛ ee di nʋnkwarɩ, gɛ a tà dikola ma ɛwɔ gɛtɛ aà ka Kanaan bete, ma Hiti bete, ma Amori bete, ma Perisi bete, ma Yebusi bete, ma Girigasi bete bɔɔ ntʋnkwaa a tɛ wodu wʋʋ bɛnɩ. A di aade-dɔ̀lɛ-sɩ̀lɛ fɔ yii koro, yema aade ɩ̀ tʋna.

9 A we dɩfana gɛtɛ tiitu ɛbɛ bɛ fana Egyipiti gɩfɩɩ gaanɩ. A nʋn baafala yɩɩ gɛgbɛrɛ ɔkʋna gɛtɛ bè yela Ɛpʋ-sɩya wonyun fɔ. 10 A mɛ apenterebi ma ade-dɩrɛ ma gɩsaa a ka a tɔ a yela Farawo, ma wɔ bɛndɩrɛbi powu, ma wɔ gɩfɩɩ gɩɩ bɛnɩ powu boo koro, yema à nyɩ̀ gɛnyanla-dɩrɛ gɛtɛ Egyipiti bete bɛ nyanla tiitu ɛbɛ. A da ma ade nyayɩ yii koro a ka a yɛ aa diyere di ye, anlɛ gɛtɛ ǹdò ke di ye lɛ. 11 A yo ɛpʋ butu akpen anyɔɔ bɔɔ bʋnʋn baanɩ, gɛ be gyu wanɩ be ye gɛtʋnkwaa-kɔlɛ gii koro. Mɔ a yɛ bɔɔ bɛkyʋnlɛ bɛ nyɩ be gyu butu fɔ bʋʋ gamɩ dɩkpalan daanɩ anlɛ gɛtɛ dɩtaa dɩɩ nyɩ di gyu dɩbʋna daanɩ fɔ. 12 A ka dɩkpaba boli-boli a wùlà bɛ osele difilawi daanɩ, gɛ a ka ɔtan-gyelɛ melu-melu a ŋmaŋɩ boosele waanɩ odente waanɩ gɛtɛ bàà wura we osele.

13 A waran a ye gatala a ba Sinayi wodon wuu koro. A tabʋrʋ ma ɛbɛ a ye gatala, gɛ a tɛ bɛ ade-wùlàlɛ ma Ise gɛtɛ ɩ̀ sa waanɩ, gɛ ɩ̀ tʋna, ma ade-kpakyalɛ gɛtɛ ɩ̀ kɔlɔ. 14 A yɛ bɛ bɛ nyɩnla aa Ditunawi fɩrɩnfɩrɩn, gɛ a da ma aasaranyan Mose wo koro a tɛ bɛ aade-kpakyalɛ, ma aade-wùlàlɛ, ma aa-ise. 15 Gɛtɛ dɩkpan dii wolo bɛ fɔ, a tɛ bɛ boroboro a ye gatala, gɛ gɛtɛ otinbili wù de bɛ fɔ, a tiri butu a ye dɩtaa daanɩ a tɛ bɛ. A tabʋrʋ a tɛ bɛ alɛ, bɛ san bàà ma to gɛtʋnkwaa gɛtɛ a kan ntam a tɛ bɛ alɛ gaà bɛ̀ mɛ booyo fɔ.

16 Mɔ tiitu ɛbɛ bɛ bʋma koro, gɛ bɛ mɛ giten-kɛma, gɛ ben di aa-ise fɔ yii koro. 17 Be terema bɛn nʋn aakʋn. Be finla ade-dɩrɛ ma gɩsaa gɛtɛ a mɛ fɔ. Bɛn mɩnɩ kʋna apenterebi-de gɛtɛ a mɛ a tɛ bɛ fɔ. Bɛ mɛ giten-kɛma, gɛ bɛ tɔ be yela aa koro be tiri egyegeyelɛ gɛtɛ èè birima bɛ san gɩdɩ gaanɩ. Mɔ awɔ Wurubwarɛ n tɛ ka ade-kpen a kyɛ, gɛ aa bwala bɛnɩ, gɛ aa wula bɛnɩ gutunkoro, gɛ an taa ka owurufa bilen-bilen, gɛ aa gelen gɩ̀ sɔ. Okoro an kere bɛ ya, 18 ma gɛtɛ bɛ mara dɩkwɔ-bi bɛ tɛ koro, gɛ bɛ dɔ̀ alɛ, ekpen nyawɔ n di tiikpen gɛtɛ e tiri tɩ e ye Egyipiti, bɛ ka bɛ dɔ̀ nbusu wade bɛ gyaga aa koro gba fɔ.

19 Aa gutunkoro-dɩrɛ gɛtɛ à ba okoro, an kere bɛ ya otonkuma-dɩrɛ fɔ waanɩ. Dɩkpaba kpim gɛtɛ dii wùlà bɛ osele ofila ken-ken fɔ din kere bɛ ya, gɛ ɔtan gɛtɛ wuu wùlà bɛ osele fɔ wʋ̀ bɔ wʋʋ ŋmaŋɩ boosele waanɩ fɔ, wun ye bɔɔ bʋnʋn. 20 A ka aa Gifiye-kpara fɔ a tɛ bɛ gɛtɛ gii wùlà bɛ ade. A tɛ bɛ anyandilɛ gɛtɛ bee kpèlè Mana fɔ be di, gɛ a tɛ bɛ butu bɛ nyʋn. 21 A nya boo koro bɩkyan akpilin anyɔɔ otonkuma-dɩrɛ fɔ waanɩ. Ben bugiti gɩnyankɩ fana. Baanyan-salɛ ɩn fɛɛran, gɛ bɔɔ bɩsɩrɩ gba bun funa.

22 A yɛ bɛ be di bugyu buu gedikʋn, ma bɩfɩɩ kpekpesi buu koro, gɛ be to bʋʋ ntʋnkwaa. Be to Sihon gɛtʋnkwaa, ɔkʋn gɛtɛ Hesibon wogyu-dɩrɛ ee di bugyu fɔ, ma Basan gɛtʋnkwaa, ɔkʋn gɛtɛ Ogi wogyu-dɩrɛ ee di bugyu fɔ. 23 A yɛ bɛ be wo bebi asɔ yaanɩ anlɛ gɛtɛ aŋorobi ɩ̀ sɔ gatala fɔ, gɛ a ka bɛ a ma gyu gɛtʋnkwaa gɛtɛ a dɔ̀ a tɛ bootu ɛbɛ alɛ bɛ ma to bɛ mɛ booyo fɔ gaanɩ. 24 Boodu wʋʋ bɛnɩ bɛ ma gyu gaanɩ, gɛ be to gɛtʋnkwaa fɔ. A yɛ be di Kanaan bete gɛtɛ bɛ sara gɛtʋnkwaa fɔ gaanɩ fɔ boo koro. A ka Kanaan bete fɔ, ma gɩfɩɩ fɔ gii begyu, ma gɩɩ bɛnɩ a sa bɔɔ gʋlɔ, gɛtɛ bàà mɛ bɛ anlɛ gɛtɛ bè len. 25 Be to atele ma ɔkɛma, ma ntʋnkwaa-fʋnlɛ-kpara. Be to akpaara gɛtɛ anyamanyan-kpara powu ɩ yɔn yaanɩ, be to atiribu gɛtɛ be were kunla bɛ sɩ̀, ma wayɩn wo-ili, ma olife wo-ili, ma iyon-lʋnlɛ abi kpekpesi. Be di bɛ kʋtɩ, gɛ be di ɔsɛ ade-kpara kpekpesi gɛtɛ a mɛ a tɛ bɛ fɔ yii koro.

26 Ma nyayɩ powu fɔ, bɛ mɛ giten-kɛma, gɛ bɛ tɔ be yela aa koro. Be kere Aase fɔ bɛ ya. Be wolo aa bɛtabʋrʋlɛ gɛtɛ bɛ dɔ̀ bɛ alɛ be biri bɛ ba aakʋn fɔ. Gɛ bɛ mɛ nbusu wade gɛtɛ ɩn ma gɛnya. 27 Okoro a ka bɛ a sa bɔɔ bɛkyʋnlɛ bɔɔ gʋlɔ, gɛ bɛ nyanla bɛ gepepe. Mɔ gɛtɛ bɛ̀ sa gɛnyanla fɔ gaanɩ fɔ, be wula be kpèlè wɔ̀. Gɛ a nʋn boo gewula-kpèlè fɔ a ye gatala, gɛ gɛtɛ à di gɛ gutunkoro giiwulalɛ okoro, a tɛ bɛ betolɛ-yalɛ be be tiri bɛ be ye bɔɔ bɛkyʋnlɛ baalɔ yaanɩ.

28 Mɔ onyun-dɔ̀lɛ nyawʋ gɛtɛ olila wu biri wʋ ba fɔ, be biri bɛ kya ade-kpen yɩɩ gɛmɛ aa bʋnʋn baanɩ. Ɛwʋ gɛ a yɛ bɛ bɛ nʋ̀n bɔɔ bɛkyʋnlɛ baalɔ yaanɩ, gɛ a ka bɛ a sa bɔɔ bɛkyʋnlɛ fɔ bɔɔ gatɩn. Gɛ gɛtɛ be biri bɛ gbɛrɛ afala be kpèlè wɔ̀ fɔ, a nʋn baafala yɩɩ gɛgbɛrɛ ye gatala, gɛ a ka aa gutunkoro-dɩrɛ fɔ a to bɛ a ya disere dilen-dilen.

29 A dɔ̀ gɛtɛ bàà biri bɛ tɛrɛma Aase fɔ, mɔ bɛ bʋma gɛ koro gatala, gɛ bɛn nʋn aade-dɔ̀lɛ fɔ. Ben di aade-wùlàlɛ gɛtɛ gengyi ɛnɩ ɛ̀ tɛrɛma gɛ eè wura nkpa fɔ yii koro. Bɛ bʋma koro gatala be kere wɔ̀ gɛsʋma bɛ ya, gɛ bɛ mɛ giten-kɛma, gɛ be terema bɛn nʋn aakʋn. 30 A wura diwe-lila a tɛ bɛ bɩkyan kpekpesi. A yɛ aa Gifiye fɔ gɩ da ma aa bɛtabʋrʋlɛ boo koro gɩ tabʋrʋ gɩ tɛ bɛ, mɔ bɛn ka bɩta. Okoro a ka bɛ a sa bɩfɩɩ-fon bʋʋ bɛnɩ baalɔ yaanɩ. 31 Gɛtɛ à di gɛ gutunkoro giiwulalɛ okoro, an muru bɛ, gɛ an kere bɛ ya, yema à di gɛ gɛbwala ma gutunkoro gii Wurubwarɛ.

32 Oo tii Wurubwarɛ, Wurubwarɛ-kpatakpɩrɩ, ɔkɛma Wuute, gɛtɛ aade ɩ̀ ba gɩsaa. Aa di aa gelen gii dikola fɔ dii koro. Kara nya dɩyɩyɛ gɛtɛ dɩ ba ɛtɩ gbagba, ma tii begyu-dɩrɛ, ma tii begyegeyelɛ, ma tii gedi gɩɩ bɛtɛlɛ ma aa bɛtabʋrʋlɛ, ma tiitu ɛbɛ, ma aa bɛnɩ fɔ powu tii koro, ye sɩyɛɛ ɔkʋna gɛtɛ Asiriya begyu bɛ nyanla tɩ be ye ma ǹdò lɛ alɛ wù di gɛ ade-pɩɩ! 33 Ade gɛtɛ i sere tii koro powu lɛ, aade ɩ̀ dɔ. Ma gɛtɛ tɩ mɛ ade-kpen gɛ a tiira tɩ giten fɔ, aa di nʋnkwarɩ. 34 Tii begyu-dɩrɛ, ma tii begyegeyelɛ, ma tii gedi gɩɩ bɛtɛlɛ, ma tiitu ɛbɛ bɛn tɛrɛma Aase fɔ. Bɛn ka aade-tɩyɛlɛ-sɩ̀lɛ fɔ, ma Aade-tɛrɛmalɛ fɔ bɩta. 35 Ma gɛtɛ bɛ sara boo bugyu buu gedikʋn bɔɔ gʋlɔ gii koro, gɛ a ka koro gaanyan kpekpesi a tɛ bɛ gɛtʋnkwaa-kpara-kpatakpɩrɩ gɛtɛ a ka a tɛ bɛ fɔ gaanɩ fɔ, bɛn sʋma wɔ̀, gɛ ben kere ade-kpen yɩɩ gɛmɛ bɛ ya.

36 Mɔ nya gɛtɛ ǹdò ti biligi bɛdɩ̀ gɛtʋnkwaa gɛtɛ a ka a tɛ tiitu ɛbɛ alɛ bàà di gaabi gɛtɛ gaà lʋn fɔ, ma gaanyan-kpara-kurumakyɛɛ gɛtɛ gɩ̀ ba fɔ gii koro. 37 Taade-kpen yii koro gɛtʋnkwaa fɔ gaanyan gɛtɛ gɩ lʋn fɔ i biligi begyu gɛtɛ a yɛ bee di bugyu tii koro fɔ booyo. Bɛɛ mɛ ɛtɩ ma tɩɩ bɛkwɔ anlɛ gɛtɛ bè len. Taade ɩ̀ ba gutunkoro kààrà.

38 Ade nyayɩ powu yii koro fɔ, tɩ tà dikola, gɛ tɩ ŋwara gɩkpa tɩ sɩ̀. Gɩkpa fɔ gaanɩ fɔ, tii begyegeyelɛ, ma Lefi bete ma tii gedi gɩɩ bɛtɛlɛ na nyɩ gʋlɔ.>>