1 Nba, tele loolu taminni kɔ, Alla la sarakalasela kuntiiba Ananiyasi ni mɔɔbakɔrɔ doilu nara Sesare. Ii nara Tɛritulusi ri mɛn tɛrɛ ye ii bɛɛ kuma fɔla. Ko mɛnilu ye ii ni Pɔli tɛma, ii wara woilu yiraka jamanatii Felisi la. 2 Wo rɔ, jamanatii ka a fɔ ko Pɔli ye na. Ii ka a lana tuma mɛn na, Tɛritulusi ka tɔɔ la damira Pɔli la jamanatii yɛ ko: «An fa, an da mɛn jususuma rɔ i baraka rɔ. I la famunyali kosɔn, ko siyaman da mafisaya ka jamana lawa ɲɛ fɛ. 3 An fa Felisi, wo ra diya an yɛ ɲa bɛɛ ma. An ye baraka bilala wo la jamana fan bɛɛ rɔ. 4 Kɔni an kana i tɔrɔ kuma siyaman na. Wo le rɔ, n ye i madiyala ko i ye hina an na ka i tolo malɔ an na dɔɔnin. 5 Nba, an da a yen ko cɛɛ ɲin ye mɔɔ tɔrɔla le ri. A ye mankan nawulila Judiyailu tɛma dunuɲa fan bɛɛ rɔ. Ale le Nasarɛtikailu la dina sila ɲɛmɔɔ ri. 6,7 A tɛrɛ ye a fɛ ka Alla batobonba manɔɔ. Wo le rɔ, an ka a mira.* 8 Ni i ka Pɔli fɛsɛfɛsɛ, an ye a jalakila ko mɛnilu rɔ, i jɛrɛ ri woilu famun.»

9 Judiya mɛnilu tɛrɛ ye, woilu ka kuma wo lasereya ko a ye ten de.

10 Jamanatii ka tɔɔmasere kɛ ko Pɔli ye kuma. Wo rɔ, Pɔli ka jabili kɛ ko: «N fa, n ka a lɔn ko a ra san siyaman bɔ, i ye an na jamana la kititɛɛla ri. Wo le kosɔn, n sɛwani ka n na ko fɔ ile yɛ. 11 Ni i ka ɲininkali kɛ, i ri a lɔn ko tuɲa le ko a ma tamin tele tan ni fila la fɔlɔ, n wara Jerusalɛmu Alla bato kanma. 12 Ii ma n tɛrɛn mɔɔilu sɔsɔla Alla batobonba jin kɔndɔ. Ii ma n tɛrɛn mankan nawulila jama tɛma salibon si la. Ii ma n tɛrɛn wo kan so kɔndɔ yɔrɔ si. 13 Mɔɔ ɲinilu ye tɔɔ lala n na ko mɛnilu rɔ sisɛn, ii ti se a yirakala ko woilu ye tuɲa le ri. 14 Nba, n ye n lɔla mɛn na i ɲana, wo le ɲin di. N ye an benbailu Maari Alla batola sila kura kan. Ii ka a fɔ ko sila wo tɛ tuɲa ri. Kɔni mɛnilu sɛbɛni sariya kitabu rɔ, a ni mɛnilu sɛbɛni kelalaselailu la kitabu rɔ, n lani wo bɛɛ la. 15 N ni ii bɛɛ jii lani Alla rɔ ko mɔɔ ɲumailu ni mɔɔ juuilu bɛɛ su ri wuli ka bɔ saya rɔ. 16 Wo le rɔ, n ye n dajala tuma bɛɛ sa n kɔnɔgbɛyani ri to. Kojuu si kana to n ni Alla tɛma, wala n ni mɔɔilu tɛma.

17 «Nba, n tun ma se Jerusalɛmu san siyaman kɔrɔ. Kɔni lon do, n wara wodi do di Judiya doilu ma ye ka wo kɛ ii la dɛmɛnnifen di. N wara ka saraka bɔ Alla yɛ fanan. 18 N tɛrɛ ye wo kan tuma mɛn na, Judiya doilu nara n tɛrɛn Alla batobonba kɔndɔ. N da wo namunilu bɛɛ kɛ ka n jɛrɛ lasɛninya. Jama tun tɛ ye; mankan tun tɛ ye. 19 Kɔni Judiya doilu mɛn bɔni Asi jamana rɔ. Woilu ka kan ka na n jalaki i ɲana yan. 20 Ni wo tɛ, mɔɔilu ye yan, mɛnilu ka n lɔnin yen kititɛɛ dɛkuru ɲɛrɔ. Ni ii ka jalaki yɔrɔ do tɛrɛn n na, woilu ye wo fɔ. 21 N ma foyi kɛ fɔɔ ɲin ko kelen. Ka n lɔnin to kititɛɛ dɛkuru ɲɛfɛ, n ka n kan nabɔ ko: ‹N lanin su lawuli ka bɔ saya rɔ ko le la. Wo le ka a kɛ, ai ra n nana kiti diya bi.›»

22 Felisi tɛrɛ ye ko siyaman famunna Maari la sila kan. Wo rɔ, a ka kiti lalɔ fɔlɔ. A ka a fɔ ko: «Ai ye wa. Ni tɛsidi kuntiiba Lisiyasi nara, n di ai la ko kɔrɔbɔ.» 23 A ka a fɔ tɛsidi kuntii do yɛ ko a ye Pɔli mara kaso la fɔlɔ kɔni a ye a rabila dɔɔnin. Ko a kana a duɲɔɔ si bali a dɛmɛnna.

24 Tele dɔndɔ taminni kɔ, Felisi ni a muso Durusili nara. Muso wo ye Judiya le ri. Felisi ka mɔɔilu lawa Pɔli kɔ ko ii ye a lana. Felisi ka a tolo malɔ a la. Mɔɔ ye a lemɛniyala Ɲenematɔmɔnin Isa ma ɲa mɛn ma, Pɔli ka wo ɲafɔ a yɛ. 25 Pɔli kumara dunuɲaratɛɛ telenbaya kan a ni jɛrɛramira ko kan. A kumara kiti ko kan fanan, kiti mɛn natɔ. A tɛrɛ ye kumala woilu kan tuma mɛn na, Felisi silanda. A ka a fɔ Pɔli yɛ ko: «A ka ɲin ten. I ye wa fɔlɔ. N wa fɛrɛ sɔrɔn lon mɛn, n di i kili ikɔ.» 26 A tɛrɛ ye a kɔndɔ fanan ko Pɔli ri surɔfen di a ma. Wo le rɔ, a tɛrɛ ye Pɔli kilila tuma bɛɛ ka a baro.

27 Nba, san fila taminda tuma mɛn na, mɔɔ kura siira Felisi nɔ rɔ jamanatiiya la. Mɔɔ kura wo tɔɔ ko Pɔrisusi Fɛsitusi. Kɔni Felisi tɛrɛ ye a fɛ ka Judiyailu ladiya. Wo rɔ, a ka Pɔli to a kɔ kaso la ye.