Hɔrɔya Suran 17

Ji bɔra farakolo rɔ

1 Nba, Isirayɛlikailu bɛɛ bɔra Sin wula kɔndɔ ka wa ikomin Allabatala ka a fɔ ii yɛ ɲa mɛn ma. Ii ka i mataama dɔɔnin dɔɔnin fɔɔ ka wa se yɔrɔ do rɔ, mɛn tɔɔ ko Refidima. Ii ka ii daa makɛ ye, kɔni ii ma minninji tɛrɛn ye. 2 Wo le ka a kɛ mɔɔilu wulira ka Musa makuma ko: «Ai ye ji di an ma.» Musa ka ii jabi: «Ai ye nde makumala nfenna? Ai ye i tɛɛla Allabatala rɔ nfenna ka a kɔrɔbɔ?» 3 Kɔni ji lɔɔ tɛrɛ ye ii la kojuuya. Wo rɔ, ii wulira ka a kɛ Musa makuma ri. Ii ka a fɔ ko: «Nfenna i ka an nabɔ Misiran ka an ni an denilu ni an na kolofenilu bɛɛ faa ji lɔɔ bolo wa?» 4 Musa ka a dalakasi Allabatala yɛ ko: «N ka kan ka nfen kɛ mɔɔ ɲinilu yɛ? A ra to dɔɔnin ii ri n ton kaba la.» 5 Allabatala ka Musa jabi: «I ye Isirayɛlikailu la mɔɔbakɔrɔ doilu ta ka wa jama ɲɛfɛ. I la gbeleke ye wa i bolo, i ka Nili Ba gbasi gbeleke mɛn na. 6 N di n lɔ i ɲɛfɛ Horɛbu koyinkɛ farakolo do kan. I ye farakolo wo gbasi i la gbeleke la. Ji ri bɔ wo rɔ, mɔɔilu ri ji wo min.» Musa ka a kɛ wo ɲa kelen ma Isirayɛlikailu la mɔɔbakɔrɔilu ɲana.

7 Musa ka yɔrɔ wo tɔɔ la ko Meriba, ka a masɔrɔn Isirayɛlikailu ka sɔsɔli kɛ ye. A ka tɔɔ gbɛrɛ fanan la a la ko Masa, ka a masɔrɔn Isirayɛlikailu ka Allabatala kɔrɔbɔ ye le, ka a fɔ ko: «Allabatala ye an tɛma wa, wa a tɛ an tɛma?»

Amalɛkikailu ka Isirayɛlikailu kɛlɛ

8 Nba, Amalɛkikailu wulira ka na Isirayɛlikailu kɛlɛ Refidima. 9 Wo rɔ, Musa ka a fɔ Josuwe yɛ ko: «I ye mɔɔ doilu suwandi, mɛnilu ri kɛlɛ kɛ an yɛ. Ai ye wa Amalɛkikailu kɛlɛ. Sini n di wa n lɔ tindi kan ye. Alla la gbeleke ri kɛ n bolo.» 10 Musa ka mɛn fɔ, Josuwe ka wo kɛ. A ni a la tɛsidiilu wara ka Amalɛkikailu kɛlɛ. Wo waati kelen, Musa ni Haruna ni Huri yɛlɛra tindi wo kan. 11 Musa wa a boloilu kɔrɔtani to tuma mɛn na, Isirayɛlikailu la tɛsidiilu ri nɔ sɔrɔn. Kɔni a wa a boloilu lajii tuma mɛn na, Amalɛkikailu ri nɔ sɔrɔn. 12 Kɔni Musa bolo fila bɛɛ ra kunda. Wo rɔ, Haruna ni Huri nara kabakudun do ri. Musa ka a sii wo kan. Ka a siini to, Haruna ni Huri ka a boloilu mira ka ii kɔrɔta. Do ka a bolokinin mira, do ka a bolomaran mira. Wo rɔ Musa boloilu kɔrɔtani tora haan tele be waati. 13 Wo le ka a kɛ, Josuwe ni a la mɔɔilu sera Amalɛkikailu la a la fanmuru la fewu.

14 Allabatala ka a fɔ Musa yɛ ko: «I ye ko ɲin sɛbɛ kitabu lamininnin dɔ sa mɔɔilu kana ɲina wo rɔ. I ye a karan Josuwe ɲana sa a ri a mɛn, baa n di Amalɛkikailu halaki fɔɔ dunuɲa mɔɔilu ri ɲina ii la ko la fewu.» 15 Musa ka saraka bɔ diya lɔ ka a tɔɔ la ko: «Allabatala ra se di n ma.» 16 Musa ka a fɔ ko: «Amalɛkikailu wulira Allabatala la mansaya kanma. Wo le rɔ, Allabatala ri ii kɛlɛ kadawu.»