Marcos 3

22 Sariya karanmɔɔ mɛnilu bɔnin Jerusalɛmu ka na, woilu tɛrɛ ye a fɔla ko: «Jenailu kuntii ba Ibulusa le ye a fɛ. Ko Ibulusa le ye fanka dila a ma ka jenailu gbɛn ka bɔ mɔɔilu fɛ.» 23 Wo rɔ, Isa ka ii kili ka kuma kɔrɔlama doilu fɔ ii yɛ. A ka a fɔ ko: «Setana ri Setana gbɛn ɲa ɲuman ma? 24 Ni jamanadenilu wulira i ɲɔɔn kanma, wo jamana ti se sabatila. 25 Ni denbaya mɔɔilu wulira i ɲɔɔn kanma, wo denbaya ti se sabatila. 26 Wo ɲa kelen ma, ni Setana wulira a jɛrɛ kanma ka a jɛrɛ kɛlɛ, a la fanka ti se sabatila. A bantɔ le.

27 «Ni mɔɔ ye a fɛ ka don cɛɛ fankama la bon kɔndɔ ka wo bolofenilu suɲa a ri cɛɛ fankama wo mira fɔlɔ ka a sidi. Wo kɔrɔ, a ri a bolofenilu suɲa.

28 «N di tuɲa fɔ ai yɛ: mɔɔilu hakɛilu bɛɛ ri se makotola, hali Alla tanama kumailu. 29 Kɔni ni mɔɔ mɔɔ ka Nii Sɛniman tanama kuma fɔ, a ti se makotola fewu. Hakɛ wo ri to wo tii kan habadan.»

30 Isa ka kuma woilu fɔ ii yɛ ka a masɔrɔn ii ka a fɔ ko jena le a fɛ.