1 Lon do rɔ, Isa donda salibon do kɔndɔ. Cɛɛ bolofaanin do tɛrɛ ye. 2 Mɔɔilu tɛrɛ Isa ragbɛla kosɛbɛ ka a yen ni a ri cɛɛ wo lakɛndɛya Ɲɔɲɔ Lon, baa ii ye sariya sɔrɔn ko rɔ a ma. 3 Isa ka a fɔ cɛɛ bolofaanin yɛ ko: «I wuli ka i lɔ jama tɛma.» 4 Isa ka a fɔ mɔɔilu yɛ ko: «A ye di? A dahanin ka koɲuma kɛ Ɲɔɲɔ Lon wa, wala ka kojuu kɛ, ka mɔɔ kisi wa, wala ka a faa?» Ii ka ii makun. 5 A mɔnɛra ka a ɲa lɔ ii rɔ ka ii ragbɛ. A niilafinda ka a masɔrɔn ii ma sɔn a ɲayenna. A ka a fɔ cɛɛ bolofaanin yɛ ko: «I bolo rasɔmɔn.» Cɛɛ ka a bolo rasɔmɔn mɛn kɛ, a bolo kɛndɛyara fewu. 6 Farisiilu bɔra ka wa. Ii ni mansa Herodi kɔmɔɔ doilu ka i ɲɔɔn yen i kɔrɔ ka Isa faa ko ɲa ɲinin.

7 Isa ni a la karandenilu wara Kalile Dala dala. Jama ba bilara a kɔfɛ ka bɔ Kalile mara rɔ. Mɔɔilu fanan bɔra Jude mara rɔ, 8 a ni Jerusalɛmu so kɔndɔ ka wa a kɔfɛ. Mɔɔilu bɔra Idume mara fanan dɔ, a ni Juridɛn Ba kɔfɛla, a ni Tiri ni Sidɔn soilu fan fɛla. A kɛra jama ba ri. Ii wara Isa kɔfɛ ye, baa a fɔra ii ɲana a ye ko mɛnilu bɛɛ kɛla. 9 Jama ba kosɔn, Isa ka a fɔ a la karandenilu yɛ ko ii ye kulun do rabɛn a yɛ sa jama kana a ragbɛrɛn. 10 Baa a tun ka jankarɔtɔilu siyaman nakɛndɛya. Wo rɔ, jankarɔtɔ tɔilu bɛɛ tɛrɛ ye mɔɔilu tuuntuunna sa ii ri ɲa sɔrɔn ka ii maa a la. 11 Jenailu ka Isa yen tuma mɛn na, ii ka ii be a ɲakɔrɔ ka ii kan nabɔ ko: «Alla Dencɛ le ile ri.» 12 Kɔni Isa ka ii jamari fanka la ko ii kana a fɔ mɔɔilu yɛ a ye mɛn di.

13 Wo kɔ rɔ, Isa yɛlɛra koyinkɛ do kan. Mɛnilu ka a diya, a ka woilu kili. Woilu nara a tɔrɔfɛ. 14 A ka mɔɔ tan ni fila suwandi ka ii kɛ talibidenbailu ri sa ii ri kɛ a fɛ tuma bɛɛ, a ni sa a ri ii kelaya mɔɔilu kawandi diya. 15 A ka jenailu gbɛn se di ii ma fanan. 16 A ka mɔɔ tan ni fila mɛnilu kɛ talibidenbailu ri, woilu le ɲin di: a ka Simɔn ta, a tun ka mɛn tɔɔ la ko *Piyɛri. 17 A ka Sebede dencɛ fila fanan ta, mɛnilu ye Yakuba ni Yuhana ri. A ka woilu tɔɔ la ko Bowanɛrɛ. Wo kɔrɔ le ko ii fadiman ikomin sankulunkan. 18 A ka Andere ni Filipe ni Baritɔlɔmi fanan ta, a ni Matiyu ni Tomasi ni Alife dencɛ Yakuba ni Tade ni Simɔn Fabaden. 19 A ka Judasi Sikariyɔti fanan ta, mɛn natɔ a donna mɔɔilu bolo.

20 Wo kɔ rɔ, Isa donda bon do kɔndɔ. Jama ba nara ii ladɛn a dafɛ kokura. Wo rɔ, Isa ma fɛrɛ sɔrɔn ka dɔɔnnin kɛ. 21 Ko wo fɔra Isa la denbaya mɔɔilu yɛ tuma mɛn na, ii wulira ka na ko ii ye a mirala ka wa a ri, baa ii ka a fɔ ko a kunkolo wulini. 22 Sariya karanmɔɔ mɛnilu bɔnin Jerusalɛmu ka na, woilu tɛrɛ ye a fɔla ko: «Jenailu kuntii ba Ibulusa le ye a fɛ. Ko Ibulusa le ye fanka dila a ma ka jenailu gbɛn ka bɔ mɔɔilu fɛ.» 23 Wo rɔ, Isa ka ii kili ka kuma kɔrɔlama doilu fɔ ii yɛ. A ka a fɔ ko: «Setana ri Setana gbɛn ɲa ɲuman ma? 24 Ni jamanadenilu wulira i ɲɔɔn kanma, wo jamana ti se sabatila. 25 Ni denbaya mɔɔilu wulira i ɲɔɔn kanma, wo denbaya ti se sabatila. 26 Wo ɲa kelen ma, ni Setana wulira a jɛrɛ kanma ka a jɛrɛ kɛlɛ, a la fanka ti se sabatila. A bantɔ le.

27 «Ni mɔɔ ye a fɛ ka don cɛɛ fankama la bon kɔndɔ ka wo bolofenilu suɲa a ri cɛɛ fankama wo mira fɔlɔ ka a sidi. Wo kɔrɔ, a ri a bolofenilu suɲa.

28 «N di tuɲa fɔ ai yɛ: mɔɔilu hakɛilu bɛɛ ri se makotola, hali Alla tanama kumailu. 29 Kɔni ni mɔɔ mɔɔ ka Nii Sɛniman tanama kuma fɔ, a ti se makotola fewu. Hakɛ wo ri to wo tii kan habadan.»

30 Isa ka kuma woilu fɔ ii yɛ ka a masɔrɔn ii ka a fɔ ko jena le a fɛ.

31 Ka Isa to dinkira wo rɔ, a na ni a dɔɔcɛilu nara. Ii ka ii lɔ kɛnɛma ka mɔɔ lɔ a kili la. 32 Wo ka jama siinin tɛrɛn a laminin dɔ. Doilu ka a fɔ a yɛ ko: «I na ni i dɔɔcɛilu lɔnin kɛnɛma. Ii ye i ɲininna.» 33 Isa ka ii jabi: «Yon ye n na ri? N dɔɔcɛilu ye yon ni yon di?» 34 A ka a ɲa lɔ mɔɔilu rɔ, mɛnilu siinin a laminin dɔ ye. A ka a fɔ ko: «I ma n na ni n dɔɔcɛilu yen? 35 Baa mɔɔ mɛnilu ye Alla sawo kɛla, woilu le ye n dɔɔcɛilu ni n dɔɔmusoilu ni n na ri.»