1 Nba, wo waati rɔ, Yuhana* mɛn ye mɔɔ sunna ji rɔ, a sera Jude wula kɔndɔ. A tɛrɛ mɔɔilu kawandila ko: 2 «Ai ye tubi, baa harijeene mansaya waati ra se.» 3 Baa keladen fisamante Esayi ka Yaya la ko fɔ ko:

«Kilikan ba bɔra wula kɔndɔ ko:

‹Ai ye sila rabɛn Faama ɲɛrɔ,

ka silaninilu latelen a ɲɛrɔ.›»*

4 Nba, duruki mɛn tɛrɛ ye Yaya kan na, wo tɛrɛ ye ɲɔɔmɛ si le ri. A tɛsidinin tɛrɛ gbolojulu la. A la dɔɔnnifenilu tɛrɛ ye tonkasailu ni waa rɔ li le ri. 5 Mɔɔ siyaman ba tɛrɛ ye bɔla Jerusalɛmu so kɔndɔ, a ni Jude mara rɔ, a ni Juridɛn Ba laminin yɔrɔilu bɛɛ rɔ, ka wa Yaya tɛrɛn ye. 6 A ri ii sun ji rɔ Juridɛn Ba rɔ, ii wa i lɔ ii la julumun na waati mɛn dɔ.

7 Farisi siyaman ni Sadusi siyaman tɛrɛ ye nala Yaya ma sun ji rɔ kanma. A ka wo yen ka a fɔ ii yɛ ko: «Aile, fɔnfɔnnin na munuɲailu! Alla la kiti mɛn natɔ, yon de ka ai lali ko ai ye ai bori wo kɔrɔ ten? 8 Ai ye kɛwaliilu kɛ, mɛnilu ri a yiraka ko ai ra tubi. 9 Ai kana ai miri ka a fɔ ko a ri bɛn ka a masɔrɔn Iburahima le ye ai benba ri! Ɛn-ɛn. N di a fɔ ai yɛ ko Alla ri se kabakudun ɲinilu yɛlɛmanna ka ii kɛ Iburahima bɔnsɔnilu ri. 10 Sisɛn, tɛɛran tii ra wuli jiri lulu tɛɛ kanma. Jiri mɛnilu tɛ den ɲuma kɛla, woilu bɛɛ ri tɛɛ ka lafili ta rɔ. 11 Nde ye ai sunna ji le rɔ, ka a yiraka ko ai ra tubi. Kɔni mɔɔ mɛn natɔ n kɔ, wo fanka ka bon n ta ri. Hali ka a la sanbara mira a yɛ, wo ka bon nde ma. Ale ri ai sun Nii Sɛniman dɔ, a ni ta. 12 A la baarafen ye a bolo, ka sumankisɛ ni a bu bɔ ɲɔɔn dɔ. A ri a la binbiriba magbasi gbere lagbɛ, ka sumankisɛ kɛ bondon kɔndɔ, ka bu bɛɛ janin ta la. Ta wo ye ta sabali le ri.»

13 Wo kɔ rɔ, Isa bɔra Kalile mara rɔ ka na Yaya tɛrɛn Juridɛn Ba dala sa Yaya ri a sun ji rɔ, 14 kɔni Yaya tɛrɛ ye a fɛ ka a ban. A ka a fɔ Isa yɛ ko: «Ile le ka kan ka nde sun ji rɔ. Nfenna i ra na n tɛrɛn ten?» 15 Isa ka a jabi: «I ye diɲɛ wo ma fɔlɔ, baa a bɛnnin an ye wo kɛ sa an di Alla sawo bɛɛ lakanbali.» Wo rɔ, Yaya sɔnda ka a sun ji rɔ. 16 Isa sun ji rɔ wo kɔ, a bɔra ji rɔ i kɔrɔ. Sankolo da lakara. A ka Alla la Nii jiitɔla yen a kan ikomin kanba. 17 Kumakan do bɔra sankolo rɔ ko: «N diyanan dencɛ le ten. N sɛwanin ale la kosɛbɛ.»