1 Isa jiira ka bɔ koyinkɛ kan tuma mɛn na, jama ba bilara a kɔfɛ. 2 Kunatɔ do nara a ɲɔnkin duu ma Isa kɔrɔ, ka a fɔ a yɛ ko: «Maari, ni i sɔnda, a se ye i yɛ ka n nadaha.» 3 Isa ka a bolo rasɔmɔn ka a maa cɛɛ la, ka a fɔ a yɛ ko: «N da sɔn, i ye ladaha.» A la kuna dahayara i kɔrɔ. 4 Isa ka a fɔ a yɛ ko: «I ye i janto i jɛrɛ rɔ, i kana wo ko fɔ mɔɔ si yɛ. Wa sarakalasela tɔrɔfɛ, a ye i fari ragbɛ. Wo wa ban, Musa ka saraka mɛn fɔ, ka a kɛ sereya ri, i ye wo bɔ ka a yiraka bɛɛ la ko i ra kɛndɛya.»

5 Awa, Isa wara Kapɛrinahumu. A dontɔla so kɔndɔ, tɛsidi kuntii do nara ka a madiya ko: 6 «Maari, n na baaraden lanin bon na. Kɔrɔngbɔ jankarɔ ra a mira ka a lala. A tɔrɔnin kojuuya.» 7 Isa ka a fɔ a yɛ ko: «N di wa a lakɛndɛya.» 8 Kɔni tɛsidi kuntii ka a fɔ ko: «Maari, i ma kan ka don n wara, baa a bɛnnin tɛ n ma ko i ye don n na bon na! Kɔni ni i ka kuma kelen fɔ dɔrɔn, n na baaraden di kɛndɛya wo rɔ, 9 baa n ye kuntii do la se kɔrɔ, tɛsidi doilu fanan ye n na se kɔrɔ. N wa a fɔ mɛn yɛ ko a ye wa, wo ri wa. N wa a fɔ mɛn yɛ ko a ye na, wo ri na. N wa a fɔ n na jɔn yɛ ko a ye mɛn kɛ, a ri wo kɛ.» 10 Isa ka kuma wo mɛn tuma mɛn na, a kabannakoyara. A ka a fɔ a kɔfɛbilalailu yɛ ko: «N di tuɲa fɔ ai yɛ ko n ma mɔɔ si sɔrɔn Isirayɛlikailu tɛma fɔlɔ, mɛn lemɛniyanin ikomin cɛɛ ɲin. 11 N di a fɔ ai yɛ ko lon do rɔ, mɔɔ siyaman di bɔ telebɔ ni telebe rɔ ka na i sii dɔɔnnin diya Iburahima ni Isiyaka ni Yakuba dafɛ harijeene mansaya rɔ. 12 Kɔni mɛnilu tɛrɛ ka kan ka kɛ Alla la mansaya mɔɔilu ri, ii ri lafili dibi rɔ kɔkan, kasi ni ɲin macin ye yɔrɔ mɛn dɔ.» 13 Isa ka a fɔ tɛsidi kuntii yɛ ko: «Wa i wara. I ka mɛn ɲinin, wo ri kɛ i yɛ i la lemɛniya kosɔn.» Wo waati kelen, tɛsidi kuntii la baaraden kɛndɛyara.

14 Isa wanin Piyɛri wara lon do rɔ, a ka Piyɛri biranmuso lanin yen. Fari makaliya ye a la. 15 Isa ka a maa muso bolo la, fari makaliya bɔra a fari rɔ. A wulira ka gba don ii yɛ.

16 Wura donnin, jama nara mɔɔ siyaman di Isa tɔrɔfɛ jena juuilu ye mɛnilu fɛ. Isa ka jenailu gbɛn a la kuma la, ka jankarɔtɔilu bɛɛ lakɛndɛya. 17 Wo kɛra sa Alla la kuma ri kanbali, a ka mɛn don keladen fisamante Esayi da rɔ ko:

«Fen mɛnilu tɛrɛ ye an sɛɛla, a ka woilu ta.

Jankarɔ mɛnilu tɛrɛ ye an kan, a ka woilu bɔ an kan.»

18 Isa ka a yen ko jama ba ye a laminin dɔ mɛn kɛ, a ka a fɔ a la karandenilu yɛ ko: «An ye wa dala kɔma.» 19 Sariya karanmɔɔ do ka a madon Isa la, ka a fɔ a yɛ ko: «Karanmɔɔ, i wa kɛ wala fan fan, n di n bila i kɔfɛ.» 20 Isa ka a jabi: «Denka ye banbanilu bolo, ɲaa ye kɔnɔilu bolo. Kɔni yɔrɔ si tɛ Mɔɔ Dencɛ bolo, a ri a la ka a ɲɔɲɔ yɔrɔ mɛn dɔ.» 21 Isa la karanden gbɛrɛ ka a fɔ a yɛ ko: «Maari, i ye a to n ye wa n fa su don fɔlɔ.» 22 Isa ka a fɔ a yɛ ko: «I ye i bila n kɔfɛ. I ye a to mɔɔ saniilu ye ii la mɔɔ saniilu suilu don.»

23 Isa ka a sii kulun kɔndɔ tuma mɛn na, a la karandenilu wara a kɔfɛ. 24 Ka ii to ji kan, fɔɲɔ ba do wulira i kɔrɔ. Fɔɲɔ bonya kojuu ma, ji wunwannailu tɛrɛ ye donna kulun kɔndɔ. Wo ka a tɛrɛn Isa ye sunɔɔ rɔ. 25 Karandenilu ka ii madon a la ka a lakunun ko: «Maari, i ye an nakisi! An faatɔ le!» 26 A ka ii jabi: «Nfenna ai ye silanna? Ai tɛ lemɛniyala kosɛbɛ!» A wulira ka ji ni fɔɲɔ makuma. Mankan masumara fewu. 27 Cɛɛilu kabannakoyara. Ii ka a kɛ a fɔ ri i ɲɔɔn yɛ ko: «Ee! Cɛɛ ɲin ye mɔɔ su ɲuman de ri? Hali fɔɲɔ ni ji ye a kan mirala.»

28 Isa ni a la karandenilu banda dala tɛɛla ka se Kadara mara rɔ. Jenatɔ fila bɔra kaburu so la ka na Isa kunbɛn. Jenatɔ woilu fadiman, fɔɔ mɔɔ tun ti se taminna ye. 29 Ii kulera ii kan ba la ko: «Alla Dencɛ, i ye nfen ɲininna an fɛ? I nanin an tɔrɔ diya le, sani an na tɔrɔya waati ye se wa?»

30 Wo ka a tɛrɛn kɔsɛ kuru ba ye dɔɔnninna yɔrɔ jan. 31 Jenailu ka Isa madiya ko: «Ni i ka an gbɛn, i ye diɲɛ an ye wa don kɔsɛ kuru ɲin dɔ.» 32 Isa ka a fɔ ii yɛ ko: «Ai ye wa!» Jenailu bɔra cɛɛ fila wo fɛ ka wa don kɔsɛilu rɔ. Ii donda kɔsɛilu rɔ mɛn kɛ, kɔsɛilu bɛɛ ka ii bori kojuuya, ka jii tindi la ka wa don dala ji rɔ. Ii bɛɛ tununda ji rɔ ka faa.

33 Kɔsɛ gbɛnnailu ka ii bori ka wa so kɔndɔ. Ko mɛnilu kɛnin, ii ka wo bɛɛ lakali, katɛrɛtɛ jenatɔilu lakɛndɛyara ɲa mɛn ma. 34 So kɔndɔ mɔɔilu bɛɛ bɔra ka na Isa tɛrɛn. Ii ka a yen tuma mɛn na, ii ka a madiya ko a ye a sabari ka bɔ ii la mara rɔ.