1 N badenmailu, n ye a fɛ n jusu bɛɛ rɔ, n wara mɔɔ Isirayɛlikailu ye kisi. N ye Alla matarala ii yɛ wo la kosɛbɛ! 2 Baa n tɛrɛ ye kɛla ii sere le ri ko Alla la ko kunfan ye ii la, kɔni ii ye lɔnbaliya rɔ. 3 Alla ye mɔɔilu latelenna ɲa mɛn ma a jɛrɛ ɲakɔrɔ, ii ma wo lɔn. Wo rɔ, ii ra ii la ko ɲaɲinin ka kankan ii la telenbaya ma, ii ma kolo Alla la telenbaya kɔrɔ. 4 Ka a masɔrɔn Ɲenematɔmɔnin da sariya lakanbali. Wo le rɔ, mɛn wa lemɛniya a ma, wo tii ra telen Alla ɲakɔrɔ.

5 Mɔɔilu ye telenbaya mɛn sɔrɔnna sariya rɔ, Musa ra wo ko sɛbɛ ko, «Mɛn wa sariya wo mira, wo tii ri to ɲenemaya rɔ ii fɛ.»*10.5 Sarakalaselailu Suran 18 kuma diya 5 6 Kɔni telenbaya mɛn ye sɔrɔnna Alla ɲakɔrɔ lemɛniya rɔ, wo sɛbɛnin Kitabu kɔndɔ ten de ko, «I kana a fɔ i jɛrɛ ma ko, ‹yon di se yɛlɛla harijeene rɔ?›» Wo kɔrɔ le, kosa a ye wa Ɲenematɔmɔnin najii. 7 «Wala, ‹Yon di wa lakira?›» Wo kɔrɔ le, kosa a ri wa Ɲenematɔmɔnin nawuli ka bɔ saya rɔ. 8 Kɔni a ka nfen fɔ? Ko, «Alla la kuma ye i tɔrɔfɛ, a ye i da rɔ, a ye i jusu rɔ,»*10.8 A ragbɛ Sariyailu suran 30 kuma diya 12 haan 14 kɔndɔ. wo le lemɛniya kuma ri, an ye mɛn kawandila ten. 9 Ni i ka i lɔ a la i da rɔ ko Isa le Maari ri, ka lemɛniya i jusu rɔ, ko Alla ka a lawuli le ka bɔ saya rɔ, i ri kisi. 10 Baa mɔɔ ye lemɛniyala a jusu le rɔ, wo rɔ Alla ye a latelenna a ɲakɔrɔ. I ye i lɔla a la i da rɔ, ka kisi. 11 Ka a masɔrɔn Kitabu ka a fɔ ko, «Mɔɔ si wa lemɛniya a ma, wo tɛ lamaloyala.»*10.11 Esayi suran 28 kuma diya 16 12 Baa dannafarabɔ tɛ Judiyailu ni siya gbɛrɛilu tɛma. Maari kelen pe le ii bɛɛ kun na mɛn ye mɔɔ bɛɛ sɔla a ɲumala mɛn ye a tɔɔ fɔla, 13 baa Kitabu ka a fɔ ko, «Mɔɔ si wa Maari tɔɔ fɔ, wo ri kisi.»*10.13 Jowɛli suran 3 kuma diya 5

14 Kɔni ii ye a tɔɔ fɔla di, ni ii ma lemɛniya a ma? Ii ye lemɛniyala a ma di, ni ii ma a la ko lamɛn? Ii ye wo mɛnna di, ni mɔɔ ma kawandili kɛ ii yɛ? 15 Wo kawandili ye bɔla di, na keladenilu ma lawa? A sɛbɛnin Kitabu kɔndɔ wo ɲa le ma ko, «Kibaro ɲuma laselailu na ko bɛnnin haan!»*10.15 Esayi suran 52 kuma diya 7 16 Kɔni bɛɛ ma wo Kibaro Ɲuma mira. Baa, Esayi ka a fɔ le ko, «Maari, yon lanin an na kuma la?»*10.16 Esayi suran 53 kuma diya 1 17 Wo rɔ, lemɛniya ye nala Alla la kuma mɛn fɛ. Alla la kuma fanan ye mɛnna Ɲenematɔmɔnin na ko kawandili le fɛ.

18 Kɔni n ye ɲininkali kɛla: Ii ma a la ko mɛn wa? Ɛɛn, ii ra a mɛn! Kitabu ka a fɔ ko,

«Ii kumakan tun da wa duu fan bɛɛ rɔ.

Ii la kumailu wara haan dunuɲa danna.»*10.18 Yaburi suran 19 kuma diya 5

19 Awa, n ye ɲininkali kɛla ikɔ tuun, «Isirayɛlikailu ma a famun wa?» Musa le fɔlɔ ka ɲin fɔ ko, «N di ai keleya mɔɔilu fɛ siya bɛrɛ tɛ mɛnilu ri, ka ai lamɔnɛ siya hankilidɔɔ fɛ.»*10.19 Sariyailu suran 32 kuma diya 21 20 Esayi susura Alla la kuma ɲin fɔla ko, «Mɛnilu tɛrɛ tɛ n ɲininna, woilu ra n yen. Mɛnilu tɛrɛ tɛ ɲininkali kɛla n na ko rɔ, n da n jɛrɛ yiraka woilu la.»*10.20 Esayi suran 65 kuma diya 1 21 Kɔni a ka a fɔ Isirayɛli la ko rɔ ko, «N da n bolo rasɔmɔn jama kuma mirabali kɔnɔrɔgboilu ma telen gben!»*10.21 Esayi suran 65 kuma diya 2