1 An ye nfen fɔ an siya benba Iburahima la ko rɔ wo rɔ? A ka nfen yen ko ɲin dɔ? 2 Ni Iburahima telenda Alla ɲakɔrɔ a kɛwali le fɛ, a tɛrɛ ri a jɛrɛ matɔɔ wo rɔ. Kɔni a ti se wo kɛla Alla ɲakɔrɔ! 3 Baa Kitabu ka nfen fɔ ka bɛn wo ko ma? A ka a fɔ ko, «Iburahima lemɛniyara Alla ma, wo rɔ Alla ka wo jate telen di a yɛ.»* 4 Mɔɔ mɛn wa baara, ka a sara sɔrɔn, wo tɛ jatela sanba ri a yɛ, baa a la baara sara le a ri. 5 Kɔni mɔɔ mɛn tɛ baarala, kɔni a lanin Alla la mɛn ye Alla lɔnbaliilu latelenna, Alla ye wo tii la lemɛniya jatela telen di. 6 Dawuda fanan ka mɔɔ la sɛwa la ko fɔ wo ɲa le ma, Alla ka mɛn jate mɔɔ telennin di, ka fara kɛwaliilu la ko,

7 «Sɛwa ye wo tii yɛ,

mɛn na sariya tiɲanniilu ra makoto

mɛn julumunilu ra kafari.

8 Sɛwa ye wo adamaden yɛ,

Maari tɛ mɛn na julumun jatela.»*

9 Wo sɛwa kɛnin Judiya kojiikɛninilu le gbansan ta ri wa wala siya gbɛrɛilu fanan? Awa, an bansan de a fɔla ko, Alla ka Iburahima la lemɛniya jate le telen di a yɛ. 10 Kɔni wo kɛra waati ɲuman na? A tɛrɛ ra faaninta kɛ wala a tɛrɛ ma faaninta kɛ? A tɛrɛ ma faaninta kɛ! 11 A ka kojii kɛ sɔrɔn de a la telenbaya tɔɔmasereya la, a ka mɛn sɔrɔn a la lemɛniya fɛ sani a ye faaninta kɛ waati mɛn na. Wo le rɔ, Iburahima kɛra mɔɔilu bɛɛ benba ri mɛnilu lemɛniyanin Alla ma hali ii ma faaninta kɛ, kosa telen di jate ii fanan yɛ. 12 Mɛnilu ka faaninta kɛ, ii bilanin an benba Iburahima la lemɛniya kɔfɛ fanan Iburahima tɛrɛ mɛn dɔ sani a ye faaninta kɛ, woilu fanan benba le Iburahima ri.

13 Baa Alla ka lahidi mɛn sidi Iburahima ni a bɔnsɔnilu yɛ, ko dunuɲa ri kɛ ii cɛ ri, wo tɛrɛ ma lakanbali sariya fɛ kɔni a ra lakanbali a la telenbaya baraka rɔ mɛn ye nala lemɛniya fɛ.* 14 Baa ni mɔɔilu tɛrɛ ka wo cɛ sɔrɔn sariya mira le fɛ, wo rɔ lemɛniya tɔnɔ tɛ ye. Alla ka lahidi sidi le an yɛ wo rɔ fuyan! 15 Ka a masɔrɔn sariya le nala Alla la mɔnɛ ri, ni sariya ti ye, sariya tiɲan fanan ti ye.

16 Wo rɔ, Alla ka lahidi mɛn sidi Iburahima yɛ lemɛniya baraka rɔ, kosa a ye kɛ hina ri a ni ko latɛɛnin Iburahima bɔnsɔnilu bɛɛ yɛ mɛnilu jɛrɛ ye sariya kɔrɔ, woilu gbansan tɛ kɔni mɛnilu fanan lemɛniyara ikomin Iburahima. Iburahima le an bɛɛ benba ri, 17 ikomin a sɛbɛnin Kitabu kɔndɔ ɲa mɛn ma ko, «N da i kɛ siya siyamanilu benba ri.»* Ale le an benba ri Alla ɲakɔrɔ, Iburahima lemɛniyara Alla mɛn ma, Alla mɛn ye mɔɔ faaniilu nii bilala ii rɔ, Alla mɛn ye fenilu jamarila mɛn tɛ ye, wo ri kɛ ye. 18 Iburahima lemɛniyara le a jii ma, hali a la jii kun tɛrɛ tɛ yenna. Wo ɲa ma, a kɛra «siya siyamanilu benba ri,» ikomin Alla ka a fɔ a yɛ ɲa mɛn ma ko, «I bɔnsɔnilu totɔ wo ɲa le ma.»* 19 A tɛrɛ ma siya butun a ni san kɛmɛ (100) sɔrɔn, foyida a faribanku tɛrɛ faa ko rɔ, a la muso Saran fanan kɛnin tɛrɛ densɔrɔnbali le ri kɔni a la lemɛniya tɛrɛ kɛndɛ. 20 Alla ka lahidi mɛn sidi, a ma sika wo ma lemɛniyabaliya rɔ, kɔni a la lemɛniya ka a fanka don de, a ka Alla gbiliya. 21 A lanin tɛrɛ a la fewu, ko Alla ka lahidi mɛn sidi, a fanka ri se wo lakanbalila. 22 Wo le rɔ, Alla ka wo jate le telen di a yɛ.* 23 Kɔni wo kuma sɛbɛnin tɛ ale kelen na ko rɔ ko, «A jatenin de a yɛ.» 24 A sɛbɛnin ande le fanan yɛ, baa wo ri jate telen di andeilu fanan yɛ, an wa lemɛniya Alla ma mɛn ka an Maari Isa lawuli ka bɔ saya rɔ. 25 Isa donda bolo rɔ a faa ko rɔ an julumunilu le la ko rɔ, ka wuli ka bɔ saya rɔ, an natelen na ko rɔ.