Romanos 9

Alla ka mɔɔ mɛnilu suwandi

1 N ye tuɲa fɔla ai yɛ Ɲenematɔmɔnin baraka rɔ, n tɛ wuya fɔla, n hankili ri sereya bɔ wo la Nii Sɛniman na ko kosɔn: 2 N sununnin, n jusu tɔrɔnin waati bɛɛ. 3 Baa, n tɛrɛ ye a fɛ le nde jɛrɛ le ye Alla la danka sɔrɔn, ka mataa Ɲenematɔmɔnin na n badenmailu la ko rɔ, n wara mɔɔilu, 4 Isirayɛlikailu, iile mɛnilu ta ye Alla dencɛ mɔɔdennabɔla ri, a ni a la gbiliya ni a la teriyailu ni a la sariya ni a bato ɲailu a batobon kɔndɔ, a ni a la lahidiilu. 5 Ii faranin benba fɔlɔilu le la, Ɲenematɔmɔnin bɔra iile le rɔ adamadenya ɲa rɔ. Alla mɛn ye fen bɛɛ kun na, wo ye tando habadan! Amina.

6 Adon, wo tɛ wo ri de ko Alla la lahidi tɔnɔ tɛ ye, baa Isirayɛlikailu bɛɛ kɛnin tɛ Alla la jama ri Isirayɛli. 7 Ii sɔrɔn Iburahima bɔnsɔn dɔ, wo tɛ ko ii bɛɛ kɛnin Iburahima den bɛrɛilu le ri. Ka a masɔrɔn Alla ka a fɔ le a yɛ ko, «Mɛnilu ye jatela i bɔnsɔn dɔ, woilu ye bɔla Isiyaka bɔnsɔn de rɔ.»*9.7 A Damira suran 21 kuma diya 12 8 Wo le wo ri, den mɛnilu sɔrɔnnin adamadenya ɲa ma, Alla la den tɛ woilu ri, kɔni fɔɔ Alla ka Iburahima lahidi den mɛnilu la, woilu le kɛnin a bɔnsɔn bɛrɛilu ri. 9 Baa Alla ka Iburahima lahidi wo ɲa le ma ko, «N di na waati latɛɛnin dɔ, Saran di dencɛ sɔrɔn.»*9.9 A Damira suran 18 kuma diya 10 haan 14

10 A bɛɛ tɛ wo ri, Rebeka den filailu bɛɛ ye fa kelen de la, an benba Isiyaka. 11 Adon, sani den ɲinilu ye sɔrɔn, sani ii ye koɲuma kɛ wala a juuman, Alla tɛrɛ ra a latɛɛ ko kelen ye suwandi 12 hali ka fara ii kɛwaliilu la kɔni fɔɔ a ka mɛn kili. A ka a fɔ Rebeka yɛ ko, «Kɔrɔ ri to dɔɔni fanka kɔrɔ.» 13 A sɛbɛnin Kitabu kɔndɔ ten de ko, «N da Yakuba kanin kɔni n da Esawu kɔn.»*9.13 A ragbɛ A Damira suran 25 kuma diya 23 ni Malaki suran 1 kuma diya 2 haan 3 kɔndɔ.

14 An di nfen fɔ wo rɔ? Alla ka telenbaliya le kɛ wo rɔ wa? Ɛɛn de! 15 Baa a ra a fɔ Musa yɛ ko, «N di hina mɔɔ la, n ye hinala mɛn na, n di kininkinin mɔɔ ma, n ye kininkininna mɛn ma.»*9.15 Hɔrɔya suran 33 kuma diya 19 16 Wo tɛ faranin mɔɔ diyanan koilu le la wala a kɛwaliilu, kɔni fɔɔ Alla la hina. 17 Baa a sɛbɛnin Kitabu rɔ, Alla ka a fɔ Ferawuna yɛ ko, «N da i kɛ mansa ri kosa n ye n fanka yiraka ile fɛ, n tɔɔ ri lase dunuɲa yɔrɔ bɛɛ rɔ.»*9.17 Hɔrɔya suran 9 kuma diya 16 18 Wo rɔ, Alla wa hina mɛn na a ri hina wo la, a wa kɛ mɛn kun gbɛlɛnyala, a ri a kun gbɛlɛnya.

Alla la mɔnɛ ni a la kininkinin

19 Ile ri a fɔ n yɛ wo rɔ ko, «Nfenna Alla ye an jalakila butun? Baa yon di se a banna Alla sawo ma?» 20 Ile, adamaden dɔrɔn, i ye yon di, mɛn ye Alla masɔsɔla? Bankudaa ti se a fɔla a ladan mɔɔ ma wa ko, «nfenna i ye n nadanna ten?» 21 Awa, se tɛ bankudaa ladanna yɛ wa, ka bankudaa fila ladan bankudaa banku kelen na, kelen kɛɲi ba le, do bankudaa gbansan?

22 Wo ye di, ni Alla ye a fɛ ka a la mɔnɛ ni a la fanka yiraka, wo le rɔ a ra diɲɛ kosɛbɛ, ka a lɔ wo mɔɔilu kɔrɔ a mɔnɛra mɛnilu ma, mɛnilu rabɛnnin tɛrɛ halaki kanma? 23 Wo ye di, ni a ka wo kɛ le kosa a ye a la gbiliya ba yiraka wo mɔɔilu la, a kininkininda mɛnilu la, a tun da mɛnilu rabɛn a la gbiliya sɔrɔn kanma? 24 Wo le andeilu ri, a ka mɛnilu kili, ka bɔ Judiyailu tɛma kɔni an kelen tɛ, ka bɔ siya gbɛrɛilu fanan tɛma. 25 Ikomin a ka a fɔ Hoseya la kitabu kɔndɔ ko,

«Mɛnilu tɛrɛ tɛ n na jama ri,

n di woilu kili n na jama,

n tɛrɛ ma mɛn kanin,

n di wo kili n kaninte.»

26 A sɛbɛnin ye ko,

«A fɔra ii ma yɔrɔ mɛn,

‹N na jama tɛ ai ri,›

ii tɔɔ ri bɔ ye

‹Alla Ɲenemaya la dencɛilu.›*9.26 Hoseya suran 2 kuma diya 1 haan 3 ni suran 2 kuma diya 25 »

27 Esayi ka a kan nayɛlɛ Isirayɛli la ko rɔ ko,

«Hali Isirayɛli denniilu ye siyayala

ikomin kiɲɛ mɛn ye kɔɔji dala,

ii to tɔnin de dɔrɔn di kisi.

28 Baa Maari ka a la kiti latɛɛninilu lakanbali dunuɲa lakaliya ko le ma ka a dafa!»*9.28 Esayi suran 10 kuma diya 22 haan 28

29 Esayi fɔlɔ ka ɲin fɔ ɲa mɛn ma ko,

«Na Maari Sebɛɛtii tɛrɛ ma an bɔnsɔn mɔɔ doilu to,

an tun da kɛ ikomin Sɔdɔmu,

an tun da kɛ ikomin Kɔmɔri.»*9.29 Esayi suran 1 kuma diya 9. A ragbɛ A Damira suran 19 kuma diya 23 haan 28 kɔndɔ.

Isirayɛli Kibaro Ɲuma la ko

30 An di nfen fɔ wo rɔ? Siya gbɛrɛ mɛnilu tɛrɛ tɛ telen ɲininna, woilu ra a sɔrɔn lemɛniya baraka rɔ. 31 Kɔni Isirayɛli mɛn tɛrɛ ye telenbaya ɲininna, telenbaya mɛn bɔnin sariya rɔ, woilu ti se a sɔrɔnna. 32 Wo di? Ka a masɔrɔn ii ma a ɲinin lemɛniya fɛ fɔɔ ii kɛwaliilu. Ii ka ii sennatu kaba la mɛn tɔɔ, «Sen natu kaba» 33 Kitabu mɛn na ko fɔra ko, «A ragbɛ, n da kaba la Siyon, jama ye ii sennatula kabakudun mɛn na, kaba mɛn ye ii labela. Kɔni mɛn wa lemɛniya a ma, wo tii tɛ lamaloyala.»*9.33 Esayi suran 28 kuma diya 16