Salmos 101

Atrivimɨn akar dɨkɨrɨzim

Devit ighiar kam osiri.

1 O Ikiavɨra Itir God,

kɨ arazir aghuim ko apangkuvir arazim gɨnɨghnɨghɨva ighiam bangam.

Bar guizbangɨra, kɨ nɨ baghvɨra ighiar kam bangam.

2 Kɨ nɨn damazimɨn deraghvɨra tuavir aghuimra mangɨtɨ

gumazitam nan gan akatam na gasan kogham.

O God, nɨ manadɨzoghɨn izɨ nan akuragham?

Guizbangɨra, kɨ uan dɨpenimɨn aven ikɨ gumazamizibagh ativagh men ganɨva,

uan navir averiamɨn aven deraghvɨra nɨghnɨgh biziba bar dar amuam.

3 ✝ 101:3 Godɨn Araziba 15:9; Onger Akaba 5:5; 40:4 Egh kɨ iti naghɨn, arazir kuratam bar ikian kogham.

Gumazamizir akɨrim ragha nɨ gasiba kɨ men aghua.

Kɨ me ko daruan kogham.

4 Kɨ ifavarir arazimɨn gɨn mangan kogham.

Egha kɨ arazir kurabagh nɨghnɨghan aghua.

5 ✝ 101:5 Onger Akaba 18:27; 50:20; Jeremaia 9:4 Gumazamizir moga gɨrakɨrangɨn igharaz daraziv geiba,

kɨ bar me gasɨghasɨgham.

Egh kɨ gumazamizir ifaghata uari uan ziaba feba ateghtɨ

me ikian kogham.

6 ✝ 101:6 Onger Akaba 119:1 Ezɨ gumazamizir nɨghnɨzir gavgavim Godɨn ikiavɨra itiba, kɨ me gifonge.

Merara na ko nan dɨpenimɨn ikiam.

Eghtɨ gumazamizir Godɨn damazimɨn deravɨra tuavir aghuimɨn zuiba,

merara nan ingangaribar amuam.

7 ✝ 101:7 Onger Akaba 52:2-5 Eghtɨ gumazir akar ifavaribagh amitam nan dɨpenimɨn aven ikian kogham.

Gumazamizir ifariba na ko ikian kogham. Bar puvatɨgham.

8 Eghtɨ dughiaba vaghvagh,

en kantrin aven itir gumazamizir kuraba, kɨ me asɨghasɨgham.

Egh gumazamizir arazir kurabagh amiba, kɨ me batueghtɨ,

me ua Ikiavɨra Itir Godɨn nguibar ekiamɨn ikian kogham.