Godɨn Dɨpenimɨn ghuavanaga an ziam fer ighiam.

1 ✝ 120:1 Onger Akaba 118:5; Jona 2:2 Kɨ osɨmtɨzim itir dughiamɨn,

kɨ uabɨn akurvaghasa Ikiavɨra Itir Godɨn diava araima,

a nan dɨmdiam barasi.

2 Kɨ ghaze, "O Ikiavɨra Itir God, gumazir ifariba na gasɨghasɨghasava ami.

Nɨ men akar ifavaribar ua nan akuragh,

men dafaribar ua na inigh."

3 Ia gumazir ifariba, God mɨzazir manmaghɨra garim ia danɨngam?

Egh a manmaghɨra garir arazim ian arazir kuraba ikaragham?

4 God ti afuzir ghumtɨzim inigh ia ginivam.

A ti avir bar puvɨra isim inigh ia dapongam.

5 Maia! Kɨ uabɨn apangkufi!

Kɨ Mesekia ko Kedarian tongɨn pazava aperazɨ moghɨn,

ian tongɨn datɨrɨghɨn pazava apera.

6 Gumazir igharaziba ko deragh dapian aghuaziba,

kɨ dughiar ruarimɨn ian tongɨn ikegha, bar amɨra.

7 Kɨ uabɨ dabirabir aghuim baghavɨra mɨgei,

ezɨ me mɨdorozim baghavɨra mɨgei!