Onger Akaba 19

God ingarizir biziba, an ziar ekiam en akakasi

1 ✝ 19:1 Onger Akaba 8:1; 50:6; Rom 1:19-20 Overiam Godɨn gavgavir ekiam ko ziar ekiam en akakasi.

Bar guizbangɨra, bizir pɨn itiba, da an gun e geghara ghaze,

a bar deragha dar ingari.

2 Arueba zurara sɨgha gara, bizir kamɨn gun mɨgei.

Ezɨ dɨmagariba uaghan bizir kamɨn en akakagha ghuavɨra iti.

3 Aruem ko dɨmagarim mɨkɨmamin akaba puvatɨgha mɨgeir puvatɨ.

E aningɨn mɨgɨrɨgɨataba barazir puvatɨ.

4 ✝ 19:4 Rom 10:18 Ezɨ e aruem ko dɨmagarimɨn gara fofoziba isi.

Akam inigha izir gumazibar akatoribar otivir mɨgɨrɨgɨaba,

da ghua nguazir kamɨn nguibaba bar dar otozɨ,

gumazamiziba bar, men kuariba da baraki.

Overiamɨn pɨn, God aruem bagha purirpenir mamɨn ingari.

5 Aruem otogha anaga,

mati gumazim amuimɨn ikiasa bar akuegha, a itir danganim ategha azenan izi.

Aruem anaga,

mati gumazir gavgavim itim pamtem ivemara bar akonge.

6 ✝ 19:6 Onger Akaba 113:3 Aruem dɨkavigha overiamɨn mɨriamɨn anagava otogha

ua vongɨn uaghiri.

Ezɨ bizitam an fefer gavgavir kamɨn modoghan kogham.

7 ✝ 19:7 Onger Akaba 119:130 Ikiavɨra Itir Godɨn Araziba, da bar guizbangɨra,

egha ikɨrɨmɨrir aghuim e ganɨdi.

E nɨghnɨzir gavgavim Ikiavɨra Itir Godɨn akabar ikiam.

Ezɨ fofoziba puvatɨzir darasi,

a fofozir aghuim me ganɨdi.

8 ✝ 19:8 Onger Akaba 12:6; 36:9; 119:128 Ikiavɨra Itir Godɨn akaba bar deravɨra en sure gami.

An akar kaba en sure damutɨ, e uan navir averiabar da bagh bar akuegham.

An Akar Gavgaviba angazangarim e ganɨdi,

egha fofozir bar aghuim en nɨghnɨzibagh arɨki.