1 ✝ 31:1 Onger Akaba 22:5; 71:1; Aisaia 49:23 O Ikiavɨra Itir God, kɨ nɨn aven modoghtɨ

nɨ na geghuv deragh nan ganasa, kamaghɨn kɨ nɨ bagha ize.

Nɨ na ateghtɨ nan apaniba na abɨntɨ,

kɨ aghumsɨghan kogham.

Nɨ zurara arazir aghuim gami.

Egh nɨ uan arazir aghuir kamɨn gɨn mangɨ nan akuragh!

2 ✝ 31:2 Onger Akaba 71:2 Nɨ nan dɨmdiam baregh zuamɨra nan akuragh!

Nɨ dagɨar ekiamɨn mɨn na modogh.

Nɨ dɨvazir gavgavimɨn mɨn ikɨ na ekɨarughtɨ,

nan apaniba na abɨnan kogham.

3 ✝ 31:3 Onger Akaba 18:2; 23:3; 25:11 Guizbangɨra, nɨ uabɨ nan dagɨar ekiamɨn mɨn iti.

Nɨ nan dɨvazir bar gavgavimɨn mɨn ikia deragha na geghufi.

Nɨ uan ziar ekiam bangɨn, nɨ fomɨra mɨkemezɨ moghɨn,

kɨ zui naghɨn, nɨ nan faragh mangɨ nan akua na geghuv.

4 Nɨ nan danganir mogomemɨn mɨn iti.

Nan apaniba modogha na bagha gurazir azuazir kam,

nɨ nan akuraghtɨ a nan suighan kogham.

5 ✝ 31:5 Luk 23:46; Aposel 7:59 O Ikiavɨra Itir God, kɨ uan duam nɨn dafarim garɨsi.

Nɨ guizɨn arazibagh amir God,

nɨ nan akuragha ua na inigha gɨfa.