Salmos 99

God an atrivir bar ekiam

1 ✝ 99:1 Ua Me Ini 25:22 Ikiavɨra Itir God, an atrivimɨn iti.

Kamaghɨn gumazamiziba an atiatiava agoi.

A uan atrivir dabirabim enselɨn bar gavgavibar torimɨn a gapera,

kamaghɨn amizɨ, nguazim agoi.

2 Saionɨn nguibamɨn aven,

Ikiavɨra Itir God bar ziar ekiam ikia,

gumazamizibagh ativagha men gari.

3 Gumazamiziba bar anarɨra nɨghnɨgh,

ana atrivim, egha gavgavim ko ziar ekiam itima, an ziam bar zue.

Me an ziar ekiam fɨ.

4 Atrivir gavgavim, nɨ arazir aghuiba bagha ifonge.

Nɨ arazir aghuimra Israelia e gamizɨ e an gɨn zui.

Nɨ e gamizɨ,

e kotɨn aven deragha gumazamizibar araziba tuisɨsi.

5 Ia Ikiavɨra Itir Godɨn ziam fɨ, a en God.

An arazir aghuiba, ko an damazimɨn zuezir arazibara amir God.

Kamaghɨn, ia an boroghɨn mangɨ teviba apɨrigh,

an ziam fɨ.

6 Moses ko Aron, aning Ikiavɨra Itir Godɨn ofa gamir gumazimningɨn iti.

Samuel uaghan God ko mɨgeir gumazir mam.

Me bar Ikiavɨra Itir God ko mɨgeima,

a me baragha me ikarvasi.

7 ✝ 99:7 Ua Me Ini 33:9 God ghuariar ruarir ekiamɨn tongɨn ikia,

Akar Gavgaviba ko arazir a ifongeziba me ganɨngizɨ,

me dar gɨn zui.

8 ✝ 99:8 Dɨboboniba 14:20; Godɨn Araziba 9:20; Jeremaia 46:28; Sefanaia 3:7 O Ikiavɨra Itir God, nɨ en God, nɨ uan gumazamizibar azangsɨziba barasi.

Nɨ men arazir kuraba ikarvagha mɨzazim me gasi.

Nɨ uabɨ men akazɨ me fogha ghaze,

nɨ Godɨn men arazir kuraba gɨn amadim.

9 E Ikiavɨra Itir Godɨn ziam fam,

a en God, e an mɨghsɨamɨn an ziam fam.

Ikiavɨra Itir God, a en God,

a Godɨn arazir aghuibaram amim.