1 Ani Baawloos Ukwaasanaayt tuniyaatii Umasiih Yasuuꞌi linguuma atoosmaanaaywa, usanoon Soosteeneesiiwwa, 2 Ukwaasanaayt tukaniisi Koorinteeneeb teefeet beeti, baliib Ukwaasanaay mugaddasa dehay atoosmaab beeti, baliib kasseeh hiddaab kassooh oomhiin eefeen Wꞌankwanaayoon Yasuuꞌaab Umasiihi simii waliikeen beeti nikatib. Baruuh Ankwanaayoohna ikati aree Ankwanaayoon ikati.

3 Ukwaasana Baabuunwa Wꞌankwana Yasuuꞌa Umasiihwa nꞌimaatwa mꞌasigwa baꞌiyaawna hookna.

4 Ukwaasana Umasiih Yasuuꞌii nꞌimaat yhii hooknayt, ani diimaab bareeyookna jillaay Ukwaasana ahammiid. 5 Baraakna bariiyooh timshawwaayniit kasteeh tinaateeb gabtaana. Kastooh toona tehadiidteeneetwa, kastooh tikanaantiiwwa gabtaana. 6 Umasiihiib tibadehaataan bareeyookna akkadamiyaan. 7 Shaawti Wꞌankwanaayuun Yasuuꞌa Umasiih lawti winneet tehagitneet midda, baraakna shuuki miyaaw naat han aniw kitteena. 8 Baruuh wꞌagiya ookiik isꞌikir hookna indi. Aflaay Wꞌankwanaayoon Yasuuꞌaab Umasiihiit tuyintiib baraakna yaay baabariib iikti tiyadna. 9 Ukwaasana Wꞌoorooh Yasuuꞌaab Umasiih Wꞌankwanaayoon timooriimni jillaay bareekna waliikiyaab, sidkiibi.

10 Isanaayaanwa tikwaataanwa, Wꞌankwanaayoon Yasuuꞌaab Umasiihiib oosmii waliikani hookna, kassaakna gaal uraawi geeb taafagteeneet toonaati. Aflaay beentooy ibitkeekna adhidh daayi kiidi aree ufikriiwwa uginꞌiiwwa gal akeena. 11 Yaa isanaayaan, Kiloosi dhiwaayee gwadi tehasiyaay ibitkeekna tikeet sooyaanheeb. 12 Ani bak asehariiw: Gaal bareesookna, "Ani Baawloos eetriim." indi. Weer "Ani Aboolloos eetriim." indi. Weer "Ani Bitrus eetriim." indi. Masi weer "Ani Umasiihi oobhaat eetriim." indi.

13 Umasiih yꞌadhadh han? Baawloos bareeyookna jillaay sallabamiya han? Baraakna Baawloosiib oosmii titoomaasna han? 14 Kirisbooswa Gaayooswa nuun ani gaal han hookna misaab baakaayeet toona Ukwaasana hamdaabu, 15 aflaay aniib oosmii atoomsaabu gaal han hookna iyaad kiidi. 16 Awooh ani Istifaanuusi dhiwa han amis, bareeh baakaay, weer gaal han misaab akatiyeek kashꞌan. 17 Umasiihi ani anmiisee dehaay diigwataayu kiiki. Laakiin Usakana Udaayiib ibhaliiti jillaay diigwatiyaheeb. Dehayiit fagarandiiti kalmaatee kiiki, Umasiihi saliib yꞌakrireesooh harar iikti kiidi.

18 Umasiihiit tooyat usaliibi kehii tikeenaatiit diigwat baliib ikwidhaab afreeb dehaay tikati. Laakiin hinin yꞌidhhan, beet tuuna Ukwaasanaay akrir dehoon tikati. 19 Tuun batuuh kataabtu:

uuktaab "Ani ifagarnaayeet fagarandi kwidhsi andi,

iginꞌiinaayeet tufhama diinanoosi andi." diyaabi.

20 Uutak ufagar naad eefi? Wꞌaalim naad eefi? Oon udamaani kanaaniiga naad eefi? Ukwaasana tuduniyaatiit fagarandi afreeb kwaasaab kiiki han? 21 Uudehay iknaayeet fagarandiiti salalii Ukwaasana kanaab kiikeen. Baliib yꞌaamaneen nishidhhiini jillaay bhaliinayeet tudiigwat "Yꞌafri" tittiyoodiit Ukwaasana batiisooh afirhiya. 22 Iyahuudi mꞌuujisaateet alaama raateena, aree Iyoonaani fagarandiit yhariwna, 23 laakiin hinin Umasiihi sallabamiyaab bhaliinay: Iyahuudi akraat goofi dehaay tikati, aree Ijintiili afreeb dehaay tikati, 24 laakiin baliib Ukwaasana waliikiyaneeb, Iyahuudiiwwa Iyoonaaniiwwa kasseeh Umasiih Ukwaasanaay akrirwa Ukwaasanaayt fagarandiitwa dehaay ikati. 25 Ukwaasanaay yꞌafri wꞌaadamiit fagarandiiteeka fagarakaaba, aree Ukwaasanaay shalik taad wꞌaadami taadiika akrakaab ikati.

26 Yaa isanaayaan, waliikamtaanihoob naan tiifiineeb hooy kwinna. Udehayiit hayꞌaatii nishabbeek, gwida bareesookna fagaraab kitteena. Gwida bareesookna akraab kitteena, gwida bareesookna shariifaab kitteena. 27 Laakiin Ukwaasana ifagaraab isiisakwꞌi jillaay, tuduniyaatiit teena tꞌafraya yhayid. Ukwaasana yꞌakraab isiisakwꞌi jillaay, tuduniyaatiit teena teenꞌakw yhayid. 28 Baruuh toon tuduniyaatiit teena tidhibaatwa teena tꞌabaabamaatwa waasiya. Taana baliit titakweet baabari, teena titakwi ibariint kwidhseeni jillaay, 29 aflaay bariiyooh suurii infiish gaal han biidaayayi jillaay Ukwaasana kastooh toon toona idꞌi. 30 Bariiyooh sabbii baraak Umasiih Yasuuꞌiib teefeena, baruuh hini jillaay Ukwaasanaay yꞌeent fagarandi iki. Beet tuuna shibootwa gaddastiiwwa fadagooytwa dehoon tikati. 31 Shaawti tuun batuuh kataabtu: uuktaab "Wꞌinfiish, Wꞌankwana idꞌiyeet toonaatii baꞌiifish." diyaabi.