1 Ani fadaag kaaki han? Ani linguumanaab kaaki han? Yasuuꞌa Wꞌankwanaayoon rhaab kaaki han? Baraakna Wꞌankwanaay eefiib aniib ushagaayt firꞌaay kitteena han? 2 Ani weer dehayii dehaay linguumanaab baakaayeek han, ani sidik bareeyookna dehaay linguumanaab akati. Wꞌankwanaay aree baraakna aniib ulinguumti khatim tikatiina.

3 Anii kehii bhaliib iyad oodehayii dehaay, ani ugarooyu bak hanbi. 4 Hinin mꞌariitwa gwꞌitiiwwa nimeereet toona haggoon kiiki han? 5 Hinin geeboon takat aamanaat niyayeet toona hag kiiki han? Ilinguumiya aarawwa Wꞌankwanaay isanaawwa, Bitruswa dꞌiyaab kiikeen han? 6 Tari aneebwa Barnaabaaswa aabhat ibakii nikweeri jillaay shagaamnay han?

7 Aaw ooknaay jeebii ikajareet shagaamiini? Aaw inab adiitiit itbashiikwihoob hooy katamiya? Aaw reew shaakwtiit aat kaagwꞌiya? 8 Ani een ibhali wꞌaadami rꞌayee hadiidaniyeeb hiisteena han? Whag toon toona tookna kiidi han? 9 Tuun batuuh Muusaay whaggiib kataabtu: "Uuyu wharru eetiiniyeet midda ooyaf baahakwiira." indi. Ukwaasana ooyu haay isehariiw han? 10 Baruuh toon toona sidik hinee dehaay indi, bak kiiki? Awooh tuun tuuna hinee dehaay kataabti. Uutak uteeraayanaawwa uwookanaawwa wharru imꞌadhiidhni jillaay bak shagaameen. 11 Hinin bareekna ibtikeekna shuuki teera teeraanayeek, bareesookna naat hookna nimeereek, winneet gwidaat han? 12 Wari aree bareesookna toon batooh sꞌayaameeni hag iibriineek, hinin aree gwidaka hag kinbari han?

Laakiin hinin oon whag haay anfꞌamaab kinki. Umasiihiib Usakana Udaayiinaay salaliib goofiyaat biidaayayni jillaay naatka nimtaraam. 13 Baliin udiini gawiib shagaameen timꞌariitoohna udiini gawiib imeerneet toona kitkanna han? Baliin tikaraamaati mhiiniib shagaameen han tikaraamaati mhiinii dehaay tittiyeewiit toona kiiꞌamꞌadhaadhna han? 14 Oontꞌaaneet, baliib Usakana Udaayiib bhaliiyeen han timꞌariitoohna Usakana Udaayiinaay ibakii imeerneet toona Wꞌankwana waseeyaabi.

15 Laakiin ani oon whaggii naat han haay anfꞌamaab kaaki. Baraak teen teena teekna dehoon tidꞌani jillaay ani kaakitib. Ani een eefaal atehabbiyeet toonaatiika tooyat asehayiis. 16 Ani masi Usakana Udaayiib bhaliiyaniyihoob, kaafish, ani ibakii waajibtuuyt bhaliiyani. Ani Usakana Udaayiib baasooyayeek adhikw! 17 Ani uknaayu bhaliiyaniyeek, ijir imaar andi. Laakiin ani uknaayiitu niyaatii baabhaliiyayeek, Ukwaasana aneeb dehaay aamaniyaneeb ishaga kitꞌaab akati. 18 Aniib wꞌijir aflaay naanaatu? Baruuh bak eefi: Usakana Udaayiib ibhaliiti ani balaashii akwasi, barooh sooyaniyeeb oodoor whaggiisu kaꞌanfꞌaman.

19 Ani fadaag tak gaalnaay baakaayeek han, gwida dehay rayiimaniyi jillaay, kassooh oodehayii dehaay ugarooyu kishiyaab akwasi. 20 Iyahuudi geeb ani Yahuudiib akati, Iyahuudi aree rayiimani. Baliib whaggi whii eefeen aree ani whaggi whii bareeh tꞌiiteeb akati, aflaay baliib whaggi whii eefeen aree rayiimani. Ani uknaayu laakiin whaggi whii kaaki. 21 Baliib whag baabariin ani bareeh tꞌiiteeb hag baabariib akati, aflaay baliib whag baabariin aree rayiimani. Ani uknaayu Ukwaasanaay whaggii nigiyaab kaaki, laakiin Umasiihiib whaggi whii eefi. 22 Oodehay imiskiinaayi geeb miskiin akati, aflaay imiskiina rayiimani. Kassooh oodehayii dehaay naatka dehaay akati, aflaay kasseeh isalalaayee gwadib ashidhhiin akati. 23 Ani toon toona kastooh Usakana Udaayiinaay jillaay sakani, aflaay tibarakaateeh atꞌadhiidh akati.

24 Amgaruubaab ikatiyihoob kassaah idhaabana dhaabeena, laakiin gaal uubhaat tujaaꞌisa kiimiri han? Tujaaꞌisa timeerni jillaay bak tꞌiiteena dhaabaana!

25 Wꞌamgaruubaay imgirib indiibka daayiib eedhab lalaamiini. Baruuh taaj diimaab daayi baadiinaay dehaay toon toona sakiini. Laakiin hinin taaj diimaab daayi indiinaay dehaay toon toona shagaamnay. 26 Shaawti ani ootak hadaf anu dhaabiiniib tꞌiiteenaayt dhaabi kaadi. Ootak ubaraam inthꞌi tꞌiiteenaayt ani kafinaayan. 27 Abadan, ani ugarooyu thꞌatiit kishiyaayu akwasi, aflaay weer dehayii dehaay bhaliiyaneenaay harꞌii, ani uknaayu tujaaꞌisaatu eetniiweet toona arankwi.