1 Aflaay malya, uudehay Umasiihiib ishagaamana tꞌiiteena ishabibneetoon toonaatu, aree baliib Ukwaasanaayt teena tikwabas dehaay aamanamaab tꞌiiteena ishabibneetoon toonaati. 2 Oontꞌa baliin tꞌamaana dehaay eefeeneeb ibakii usidkoohna rhiseen. 3 Baraak aneeb haakamteeneeb whukwim ani haay kashagaaman, tari udehayiit mhakamaatii haay kashagaaman. Ugarooyu han kahaakaman. 4 Ani uginꞌu eeraabu, laakiin beet tuuna nhas kitkwaaseheeb. Wꞌankwana uukna aneeb haakamiini. 5 Aflaay uwaadiyaay damaani hankaay naat han baahakimna. Wꞌankwana yꞌiiniyeeb ookiik hagitna. Baruuh uthibniib dhꞌimaat toona oonuur beeti haay yꞌi indi, aree oodehayi ginꞌaayeeb teefeet toona lawsi indi. Been oodoor gaalka whamaad Ukwaasanaay iyaay indi. 6 Isanaayaan oontꞌa, teen teena ani ugarooyoowwa Aboolloosii dehaaywa adꞌi, aree bareekna rayiisti jillaay adꞌi. Aflaay baraakna oon oomiyaad hinee tikteenna, "Toona tukataabnaati mhakwal baasakaa." indi. Malya tak gaal weernaay kehii kibir ibari daayi kitdiina. 7 Oodehay irawee bareek aaw farig ikwasi hookna? Baraak attiyeewiyaab bitkaayneena naan tibariina? Aree attiyeewiyaab tikatiineek, naanhooy attiyeewiyaab baakaayt toonaatiit teefishna?

8 Baraak suur akay toona tutehariwneet kastooh tibariina! Suur akay gabtaana! Aree hinin anu hadꞌaab tikeena! Baraak sidik hadꞌaab tikatiineet toona ani kak minniimani, aflaay malya geebookna hadꞌaab han niikti! 9 Ukwaasana irhistiib linguumiyaab oosaf wꞌagiyaay daasiya hoon hiisani, oodehayi suurii madar haakamamaab eenda tꞌiiteeb ikwaas hoon. Uudehaywa imalakwa, kastuuh tuduniya ishabibna hoon. 10 Hinin Umasiihi jillaay afreena, laakiin baraak Umasiihiib amshawawaaytiit winneet fagaraab tikatiina. Hinin shalik taadiiba, laakiin baraak akraabaana. Baraak hamooysamaabaana, hinin dhibaaba! 11 Toon toosꞌa ookiik hinin hargwaawwa yaweewwa saknay, hinin shꞌiiya halaka akwaya, amaag nitweeraay, gawaab aree kinbari. 12 Hinin yꞌayeesoon akraab shagaamnay. Nitooꞌiitihoob, hinin needehari. Amaag nitweeriyihoob, hinin nimtariim. 13 Nimeedniinihoob, diiseet ninfariid. Toon tumidda ookiik aree hinin tuduniyaatiit adhift niki, tuduniya aree tirib hoon.

14 Ani toon toona bareek haay asiisakwꞌi jillaay kitbaab kaaki, laakiin yꞌari tꞌiiteena ashanbiib hookna, hisaabookna tidꞌani jillaay akantiib. 15 Baraak tamin alfa suurkinaab Umasiihiib tibariineek han, gwida baaba kitbariina. Umasiih Yasuuꞌiib, Usakana Udaayiinaay jhaatii ani baabookna akati. 16 Aflaay ani sakaniyeet toonaati dꞌuuy hookna aharriiw. 17 Oon usabbii aree ani Tiimootiib wꞌooru wꞌareeyaniyeeb bareekna beeti afandiig. Baruuh Wꞌankwanaay amiinu. Baruuh aniib usalal Umasiih Yasuuꞌiib shꞌasi hookna indi, uun usalal aree ani kassooh oomhiin kasteeh tikaniisaateeb allamaniyeet teenaati geeb taafagiini. 18 Gwadi bareesookna atoorbiib tikeena, ani bareekna beeti yꞌaab baakaayeeb hiistaana. 19 Laakiin Wꞌankwana indiyeek, ani willa yꞌaa hookna andi. Malya aan uudehay yꞌatoorbi naan hadiideeneeb iishbib oobhaat kaadi, laakiin baraah naa akrir ibariineeb iishbib andi. 20 Ukwaasanaayt tehadꞌaayi bhaliib eebhat kitti laakiin akrireet tikati. 21 Naan tehariwna? Kwirbaajii yꞌani hookna? Tari reerwa daayiinaaytiiwwa yꞌani hookna?