1 Isanaayaan, ani marookna yꞌanihoob, bidhdhigilt kanaantii yꞌaab kaaki. Tari Ukwaasanaayt tibadeha bhaliiyihoob han, tageegaat fagarandi barii yꞌaab kaaki. 2 Ani geebookna iifiyihoob, Yasuuꞌa Umasiihiiwwa tuyatooh usaliibi kehiiwwa nuun, naatka abaadhin adꞌi. 3 Bareekna beeti nꞌakwuuytiiwwa mirkwaayiiwwa yꞌan, aree winneet idhee yꞌan. 4 Aniit tudiigwatwa aniib ibhaliitiiwwa fagarandiiteewwa iginꞌa daayiib shuumiint kalmaateewwa kiikeen. Laakiin Ishuuki akriri rhistii ikeena, 5 aflaay wꞌiimaanuukna udehayiit fagarandiiti kehii kadaaya. Laakiin Ukwaasanaay akriri kehii daayiini.

6 Hinin oodehay iwawinnaayi bitik fagarandiiteet diigwat hadiidnay. Laakiin oon udamaaniit fagarandi kiikeena tari oon udamaani yhaakmaayeet fagarandi kiikeen. Baraah willa kwidhi iyadna. 7 Abadan, hinin Ukwaasanaayt kwabast fagarandi hadiidnay, dhꞌimaat fagarandi aree tuduniya badooyaat baakaay Ukwaasana hini jillaay waasaab ikatiyeet bateeh hadiidnay. 8 Oon udamaani yhaakmaayeeb gaal han bateeh afhamaab kiiki. Bateeh afhamaab iiktiineek, baraah umatuuni Ankwana usaliibi kehii kiidirna. 9 Laakiin uuktaab bak indi:

"Ukwaasana, barooh areeyeen oodehayii dehaay soomraab ikatiyeet toona:

Liiliit han rhaat kitti,

tari angwiil han maaswaab kiiki,

girmaay han tikwaat kitti." indi.

10 Laakiin Ukwaasana batooh hinee dehaay Ishuukeesooh lawisiya.

Aashuuk kasteeh teena yhariwna, Ukwaasanaayt teena tidhoomaat ikatiineek han yhariwna. 11 Wꞌaadamiit kwoonanii ikteeniib, wꞌaadami ookna oobhaat ikati. Oontꞌaaneet, Ukwaasana inkwiineet toona ikteeniib, Ukwaasanaay Eeshuuk eebhat ikatiin. 12 Hinin toon tuduniyaati shuuk nuunamaab kinki. Laakiin Ukwaasanaay ikatiin Eeshuuk nuunamna. Aflaay Ukwaasana tikwkwuuyt yhiiyyeetoon toona afhameen nikati. 13 Toon toona bak hadiidnay, dehayiit fagarandiiti bhaliyee allamamaab kinki. Laakiin bhaliib Ishuukee allamameeneeb Ishuuki sidkiiwwa ishuuki bhaliiyeewwa bareeh hadiidnay. 14 Uutak Eeshuuk anu, teena Ukwaasanaay Ishuukee yꞌeent kagabbalamiya. Baruuh Eeshuuk afreeb hiisiini aree Aashuuk naan ikatiineeb ishuuki dehay aabhat afhameenayt, baruuh bateeh kaꞌafhamiya. 15 Ishuuki tak kasteeh tinaateeb hankiim, laakiin baruuh uukna gaalnaay han kahaakamamiya.

16 Uuktaab "Wꞌankwanaay ooginꞌa aaw ikteen?

Barooh aab mikir iniiw?" diyaabi.

Laakiin hinin Umasiihiib ooginꞌa nibari.