1 Oontꞌa aree Ukwaasanaay oodehayii dehaay ifarꞌiti: Galaatiyaaneet tikaniisi sooyaneet toona dꞌiina. 2 Tꞌasaramaatiib oombꞌi wꞌawwaliibka baraak gaalka tufirꞌaaytiisooh mhallagaab firꞌatiit daasiini. Aflaay ani yꞌaniyihoob farꞌiti iikti kiidi. 3 Malya ani yꞌaniyihoob oodehay baraak waasaab tikatiineeb sooknooyti jawab aniiw, malya bareeh oomiyaawiyookna geeb Algudus beeti giigsani. 4 Ani aree oogiig amankiireek, baraah iitramheeb iyadna.

5 Ani Magadoonyaay giiganiyihoob, bareek beeti yꞌaa andi, aree Magadoonyaay hasami andi. 6 Shalik door geebookna han iistꞌa andi, tari tehibi han geebookna aniin. Aflaay baraak tꞌiibaabtiib andiifi mhiinka iishtamheeb tiyadna. 7 Oontꞌa rhitiyookna kaahariw, aree hasamee oobhaat yꞌani hookna, aree Wꞌankwana indiyeek shalik door geebookna eesitꞌeet toona minniimani. 8 Laakiin ani Afasooseeb Oowaaki wꞌiid ookiik iistꞌa andi, 9 ani daayi shaga hooy shagaamaniyeet tageegaat fursa tooy teefi, aree beentooy aneeb imooriib gwida dehay eefeen.

10 Tiimooti yꞌiiniyeek, baruuh geebookna eefiyeeb ookiik rankwiyeena bitehaayeet toona sooyaana. Baruuh han oon aniit Wꞌankwanaay ishaga shagaamiini. 11 Aflaay barooh gaal han biiriibeet toonaati. Barooh umꞌasgiib giigsaana! Aflaay anii dehaay itꞌigir indi. Barooh isanaayi geeb agarti yꞌiiniyeet toona sꞌayaamani.

12 Oontꞌa aree usanoon Aboolloos: baruuh isanaayi geeb bareek beeti giigiiniyeet toona winneet sooyani. Oontꞌa baruuh oogiig niyaamaab kiikuuyt tim ikati, laakiin baruuh fursaat manriyeek giigi indi.

13 Digwagwna! Wꞌiimaaniib daayiib akirna gadna, arika da akeena, akirna! 14 Naatka ooreerii dꞌiina.

15 Istifaanuusi dhiwa Akhaaꞌiyaay awwal aamaniyaaneet toona baraak tikteenna. Baraah igarooyeehna Ukwaasanaay oodehayi shagaay dehaay waasiyaan. Isanaayaan, ani sooyani hookna: 16 oon tꞌiiteeb oodehayi suurkina bak ramna, eeraw aree bareeyooh geeb ishaga shagaamiit yakseen ramna.

17 Istifaanuuswa, Foortuunaatooswa, Akhaayiikooswa eeyaanihoob ani afirhan. Baraah bareesookna nakwist toona timmiisiyaanayt, ani afirhan. 18 Baraah aneeb tuseeti lꞌasiyaana, bareekna han tuseetookna lꞌasiyaan. Een tꞌiiteeb aanda shiboot astehaleen.

19 Tikaniisi Aasiyaay whaashiib eefeent shiboonaaka salaameen hookna. Akiilaawwa Biriskillaawwa Wꞌankwanaay oosmii winneet shiboonaaka salaameen hookna. Tukaniisi bareeyooh ugawiib teefeet han shiboonaaka salaamtini hookna. 20 Tooy eefeen isana kassaah shiboonaaka salaameen hookna. Gaalka mugaddast salaam salaameen hookna. 21 Ani Baawloos ooknaayu ayii kitbaab aree - shiboonaaka salaamani hookna. 22 Wꞌankwana baaꞌareeyayka aree atooꞌitaab baꞌiikti. Yaa Wꞌankwanaayuun, mꞌaa!

23 Wꞌankwana Yasuuꞌiit tinꞌima geebookna baꞌiiktiin. 24 Umasiih Yasuuꞌiib tikatiin kasseekna aniib uureer geebookna eefi. Aamiin.