1 Isanaayaan, oontꞌa ani dehookna bhaliiyaneeb usakana udaayiib shꞌastiib asehariiw hookna. Baraakna barooh nuunamtaana, wꞌiimaanuukna bariisooh yꞌakir. 2 Oon usakana udaayiib daayiib abkaab kaleewaab tikatiineek aree baraakna bariisooh tidhhanna. Bak biikaayeek aree baraakna mishiit aamanaab tikatiina.

3 Ani nuunamaneet toona marookna hassan, batuuh aree winneet daayiiti. Umasiih hineeb idanuubi iiya diyaaba aaktab, 4 been baruuh itoobaas, tooyin tumhaya aree yakamiya diyaaba aaktab, 5 aree baruuh Bitrusii dehaay lawiya, malya aree itamna malooyee dehaay lawiya. 6 Beenaay harꞌii, gaal door ay sheeb sanaayee dehaay lawiya. Bareeh gwidaab masi hooy dhhaniiba, aree gwadi iiyaan. 7 Malya baruuh Yaaguubii dehaay lawiya, malya kasseeh ilinguumiyaayee dehaay lawiya. 8 Kasseeh wꞌagiyaay aree baruuh anii dehaay han lawiya, ani aree udooriyooh hankaay faraay nisrik akati.

9 Ani ilinguumiyaayeeb hooy oodiskaabi. Ani Ukwaasanaayt tukaniisi amaag waraayan akay ulinguuma atoosiimeet toona han kaꞌastehalan. 10 Laakiin Ukwaasanaay tinꞌimaatee ani aneebu, bariitaah tinꞌima han naat anu kiikeen. Abadan, bareeh kasseesoohka ani akraka shaga shagaaman, aneeb ooknaayu shaga kiiki, laakiin anii geeb eefeent Ukwaasanaayt tinꞌimaata. 11 Aflaay malya anii eetniit tikatiyeek bareesooh eetniit, toon batooh aree kassaan bhaliinay. Toon batooh aree baraak aamanteena. 12 Laakiin Umasiih tooyat hooy yakamiyaneet toona bhaliimaat tikatiyeek, gwadi bareesookna aree uuyak daayi kiidi kak tiyadna? 13 Uuyak yꞌayaani biihaayeek, aflaay Umasiih han yakamaab kiiki. 14 Umasiih yakamaab biikaayeek, hineeb ibhaliiti takweet kiibari, bareekna han wꞌiimaanuukna takweet kiibari. 15 Beenaatiika gwidaakaatu, hinin han aflaay Ukwaasanaay gwisreet badeha nikwasi, hinin Ukwaasana, Umasiih tooyat hooy yakisiya nidiit bidehaaba. Laakiin yꞌaya sidik biiyakayneek Ukwaasana han barooh yaksaab kiiki. 16 Yꞌaya biiyakayneek, aflaay Umasiih han yakamaab kiiki. 17 Umasiih aree yakamaab biikaayeek, bareek wꞌiimaanuukna takweet kiibari, baraak masi tumaagtiyookna teefeena. 18 Malya baliin Umasiihiib iiyaan aree kwidhaab iiktiin. 19 Oon umidhhan oobhaanaay dehaay Umasiihiib sꞌayaab niidꞌeek, hinin kassooh udehayiika gwirhaayikaab niikti. 20 Laakiin Umasiih sidik tooyat hooy yakamiya. Baliib yꞌayaaneet awwal firꞌaayt ikati. 21 Aflaay rhiteena, tuuyat tuduniyaatiib eetanihoob, takii eeta. Oontꞌa aree tooyatii masi uuyak weer takii badooya. 22 Kassaan Aadamiib nikatiyi sabbii, iiya niyad. Umasiihiib ikatiibka kassuuh gayi midhhan imaar indi. 23 Laakiin gaalka umhiiniyooh daayiini: Umasiih hankaab yakamiini. Baliin Umasiihiib ikatiin aree baruuh yꞌiiniyihoob yakamiin iyadna. 24 Umasiih kasteeh tehadꞌaayeewwa yꞌakrirwa katꞌiiniyihoob, tehadꞌaayeetooh Ukwaasana Ubaaba nuunsiini. Malya aakharaat tiikti tindi. 25 Baruuh yꞌashooyeeh kasseeh iragadaayi whii sakiiniyeeb ookiik ibakii hadꞌaab ikati. 26 Wꞌashu wꞌagiyaay katꞌamiiniib tooyat tikati. 27 Uuktaab "Ukwaasana naatka bariiyeeh iragadaayi whii daasaabi." diyaabi. Laakiin uuktaab "Naatka" bariiyeeh iragadaayi whii daasaabu, indiyihoob, Ukwaasana uukna hooy kiihaay, baruuh naatka Umasiihi whii daasaabi. 28 Baruuh bak idꞌiyihoob, Wꞌoor aree ugarooyooh bariiyooh whii daasiini, baruuh naatka bariiyooh whii daasaabi. Ukwaasana aree kastooh toonaati kehii hadꞌaab ikati.

29 Oontꞌa uuyak biihaayeek, baliin tooyatii dehaay itoomaas kak iikti iyadna? Yꞌaya biiyakayneek, uudehay bareeyooh dehaay naanhooy itoomiisna? 30 Hinin aree kassooh oodoor igarooyeen bidhꞌiib naanhooy nidꞌi? 31 Isanaayaan, ani bꞌeebka ayaayi! Umasiihi Yasuuꞌaab Wꞌankwanaayoon aree bareek sidik habnaab hookna sꞌayaamani. 32 Ani Afasoosiib mingaayiit dhhaniya finaayaneek, oodehayi jillaay finaayan, naan aree hooy rayiiman? Yꞌaya biiyakayneek, "Yakaana tameetiit gwꞌeetiit lhayt niyaayi!" andi hookna. 33 Baaꞌatootaalna, yꞌaraw yꞌamag udaayi adab kwidhseen. 34 Uginꞌiyookna dehaay agarnaat toomaag singadna. Gwadi Ukwaasana baakaan eefeeneek, sikwꞌaabaana andi hookna. 35 Laakiin gaal raatiini, "Yꞌaya kak yakeena? Kak tꞌiiti garooy aree baraah yakeena?" indi. 36 Yaa wꞌafrii tak! Baruuk teeraatiniyeeb uteera iiyaayeenaay harꞌii fuutiitiini. 37 Teeraatiniyihoob, ugaru kafuutiitisiya, laakiin uteera tꞌandiya, gamhi tari weena tikati. 38 Laakiin Ukwaasana been uteera garoob baruuh harriiweeb iniiw, teeraabka aree takwaakw garu iniiw.

39 Ubashar kassuuh gaal kiiki. Wꞌaadami gaal tꞌiiti bashar ibariin, uureew weer ibariin, aakilay weer ibariin, yꞌaashu weer ibariin. 40 Tibreeti garu aree eefeena, tubuuti garu aree eefeen. Laakiin tibreeti garooy daawri gaal tꞌiiteebu, tubuuti garooy daawri aree weeru. 41 Tuuyin tooknaati daawri tibari, tuutrig weer tibari, yhayikw weer ibariina, yhayikw aree gaal ooraawiika waasama daawri ibari.

42 Aflaay yꞌayaani yakiib bak iikti tindi. Ugaru teeraab ikatiib kwidhiini, malya baakwidhay akay yakiini. 43 Baruuh takweet anu teeraamiini, matuunii aree yakiini. Baruuh nꞌakw akay teeraamiini, akirtiit aree yakiini. 44 Baruuh teeraamiiniyihoob garoob akay teeraamiini, yakamiiniyihoob aree shuuki garu akay yakiini. Aadami garu daayiiniyeek, shuuki garu han daayiini. 45 Uuktaab "Uutak whankaani Aadam dhhaniib akay akhligamiya." indi. Laakiin Aadam wꞌaakhari aree midhhan iniiw shuuk ikati. 46 Ishuuki garu hankaab yꞌaab kiiki, laakiin aadami garu ibariib hankaab eeya, aree beenaay harꞌii ishuuki garu eeya. 47 Uutak whankaani tubuuti falfuutii daamaabu, uutak umalya aree tibreetee yꞌaabu. 48 Baliin tubuutiib ikatiin, tubuutii shagaamamiyaab tꞌiiteeba. Baliin tibreetee ikatiin aree, tibreetee yꞌaab baliib tꞌiiteeba. 49 Hinin ootak tubuutii shagaamamaanaay tꞌiiti neetkwi, aflaay ootak tibreetee eeyaanaayt neetkwi. 50 Isanaayaan, ani sooyani hookna, basharwa booywa Ukwaasanaayt tehadꞌaayi kakwasaamiyaana, ikwidheen han ibaakwidhaya kakwasaamiya. 51 Sinaakirna, ani kwabaasna sooyi hookna andi: hinin kassaan diwi kindi, laakiin kassaan gayyarami niyad. 52 Talawanaaytiib, gwꞌadiit damaamanaaytiib, tꞌambiilhooy tꞌaakhareet kwinhitniyihoob, yꞌaya tooyatii yakami iyadna, shaawti iiyyi kiidiin, aree hinin kassaan gayyarami niyad. 53 Ikwidheen aree ibakii ibaakwidhaya geeb igarooyeehna istookwiin, ibashar ibariin aree ibashar baabariin geeb igarooyeehna istookwiin. 54 Ikwidheen aree ibaakwidhaya geeb istookwiinihoob, ibashar ibariin aree ibashar baabariin geeb istookwiinihoob, aflaay tuuna tikataabt sidik tikati, "Tuuyat tigrab, tinasra timmiimiyaan!" indi.

55 Uuktaab "Wooh tuuyat naad ansiramtinii? Wooh tuuyat haay lhastiniyeeb yꞌakriraak naad eefeena?" indi. 56 Tuuyat tumaagtii yꞌakrir miriitiit lhastini, tuumaag aree yꞌakrireeh whaggii marri. 57 Laakiin whamaad Ukwaasanaayu! Baruuh tinasra Wꞌankwanaayoon Yasuuꞌaab Umasiihii iniiw hoon.

58 Aflaay isanaayaan, akirna gadna, naat han bitehantaaysay hookna. Diimaab aree igarooyeekna Wꞌankwanaay ishagaay dꞌiina. Wꞌankwanaay ishagaay tidꞌaneet tuuna aree takweet tibariyeet toona tikteenna.