1 Ani sakaniyeet toona sakaana, ani han Umasiih sakiiniyeet toona sakani.

2 Ani bareek beeti hassaneeb wꞌallamti daayiib tꞌabikna, aree kastooh toonaatiib han shꞌiteenheeb akay ani ahammiid hookna.

3 Kasseeh eenda girma Umasiih ikatiyeet toona ani oontꞌa asookiin hookna. Tutakati girma aree ootak ikati, Umasiihiib ugirma aree Ukwaasana ikati. 4 Aflaay uutak siileeliiniyihoob, tari Ukwaasanaayt diigwat oodehayi suurii sooyiiniyihoob, ugirmaayooh kwanbiileek Umasiih hamooysaab kiiki. 5 Taamꞌat aree kastaah siileeleenihoob, tari Ukwaasanaayt diigwat oodehayi suurii sooyeenihoob, igirmaayeehna biikwabiilneek, eendeehna hamooysaat kiikeen. Bataahwa taamꞌat igirma atoomnaat ikatiineetwa farig kiibariin. 6 Tutakat ugirmaayooh bitkwabiileek, tehamooteeh kantꞌeet toonaati. Tehamooti katꞌiti tari uumaan aree tootakat eebsiiniyeek, aflaay batuuh ugirmaayooh kwanbiileet toonaati. 7 Ukwaasana ooknaawwa umatuunoohwa rhisiiniyi jillaay, uutak ugirmaayooh kiikwibil. Laakiin tutakat ootaki matuun rhistini. 8 Uutak takatii farꞌa kiiki, laakiin tutakat takii tifirꞌa. 9 Uutak takati jillaay daamaab kiiki, laakiin tutakat ootaki jillaay daamaati. 10 Oon usabbiiwwa, imalaki sabbiiwwa, tutakat ugirmaayooh kehii hadꞌaayeetiit alaama tibariyeet toonaati.

11 Wꞌankwanaay geeb aree tutakat tak anu oodꞌooh kitkwiri, uutak aree takat anu oodꞌooh kiikwiri. 12 Tutakat takii tifirꞌa, uutak han takatii itfari. Laakiin naatka Ukwaasanaay eetni. 13 Abiiyaakna hakimna: tutakat Ukwaasanaay dehaay siileeltiniyihoob ugirmaayooh kwanbiileet tuuna daayiitu? 14 Tꞌaada taakna allameen hookna, uutak hamoot gwimadt kiidꞌi, beet tuuna bariiyooh dehaay eeb tikati, 15 laakiin takat gwimadt hamoot tibariyeek, batooh gibil dehaay ikatiin. Baliit tehamu tigwimadt aree batiiyooh ugirma ikwabisna. 16 Laakiin gaal han toon batooh amgwasuuraab hooy ikwasiyeek, hinin shagaab weer kinbari, Ukwaasanaayt tukaniisi han kitbari.

17 Een ibhaliyeeb aree ani kaahamid hookna. Baraak timmarriinihoob, gwidaat maagt daayiinaayt baakaayt shagaamteena. 18 Hankaab, baraak tukaniisaatiib hiddaab timmarriinihoob, jamꞌaab akeetiit waasamteena diyee amaasiw, aree beet toona shalik door aamanan. 19 Bareek ibtikeekna ibakii khilaaf ikatiyeet toonaatu, aree tooshbu shagaameen hookna laween ikatiin. 20 Baraak hiddaab timmarrariinihoob, Wꞌankwanaay diraar katamtaana, 21 tamteenihoob gaalka ooraaw baahagiit akay tamteena, gaal hargwaa manhi, weer aree askiriini. 22 Gawaab hooy tamteeneebwa hooy gwꞌiteeneebwa kitbariina han? Tari Ukwaasanaayt tukaniisi abaabteena, malya baliib naat baabariin gadabisteena? Naan andi hookna? Een bareeh dehaay ahammiid hookna? Abadan bak kiiki!

23 Ani Wꞌankwana ooknaay amaasiweet toona dehookna hassi andi. Whawaad baruuh nuunamiyaneeb, Wꞌankwana Yasuuꞌa hadhiib gaal yakisiyaayt, 24 Ukwaasana yhamid. Malya yhadhi firkak ikwaasiit, "Uun baruuh aniib ugaru ikati, aree bareeyookna jillaay ittiyeewi. Aneeb shꞌiteeni jillaay toon dꞌiina." idi. 25 Oon tꞌaaneet, oodiraari harꞌii haab kaas yakisiyaayt, "Uun uukaas Ukwaasanaawwa oodehaywa eebtik ikatiib ugalad ugayiibu, aree uutfaag aniib ubooyii ikati. Oon barooh gwꞌiteenihoob haay shꞌiteeni jillaay toon dꞌiina." idi. 26 Kassoohoob een yhadhi tamteenihoobwa, oon ookaas gwꞌiteenihoobwa, Wꞌankwana masi yꞌiiniyeeb ookiik tooyatooh sooteena!

27 Aflaay ikatiibka een yhadhi tamiiniib, tari oon ookaas Wꞌankwana takweet baahiiw gwꞌiiniib, Wꞌankwanaay ugarooywa ubooyi kehiiwwa danuub gwibbaab ikati. 28 Tuun tuuna aree wꞌaadami hadhiib tamaab baakaay aree haay kaas gwꞌaab baakaay hankaab ugarooyooh tingwꞌiideet toona sootni. 29 Wꞌankwanaay ugaru gwꞌadaab baakaay, gaal han tamiiniyeek aree gwꞌiiniyeek, baruuh tamiiniyihoobwa gwꞌiiniyihoobwa ugarooyooh ooknaay kehii hukwim ikwasi. 30 Oon usabbii aree gwida bareesookna nꞌakwwa lhaabwa ikatiin. Gwida bareesookna aree iiyaayiin. 31 Laakiin igarooyeen eekna haakamaab niiktiyeek, hinin kahaakamamna. 32 Wꞌankwana hinin haakamiiniyeek, hinin adab ibariin nikati, aflaay tuduniyaati geeb ittiw hoon kiidi.

33 Aflaay malya, isanaayaan, mꞌariiti kehii hiddaab timmarriinihoob taktak hagitna. 34 Gaal han hargwaab ikatiyeek, ugawiib tamiiniyeet toonaati. Aflaay hiddaab timmarriinihoob hukwimiib daayi kitdiina.

Aree ani yꞌaniyihoob aree masi wari mitiya iyaaw hookna andi.