1 Isanaayaan, hoobaan kassaah ibꞌaluuki whii iifiina, aree kassaah ubharii hasamiyaaneet toona shꞌiteeneet toona hookna aharriiw. 2 Baraah kassaah ibꞌaluukiiwwa ubhariiwwa Muusaay itoomaasna. 3 Baraah kassaah gaat shuukeet mꞌari tamiyaana 4 aree ishuuki yam eekna gwꞌiyaan. Bareeyooh geeb giigiyaab ishuuki liilaawii gwꞌiyaan. Been uliilaaw aree Umasiih ookna iikti. 5 Laakiin Ukwaasana bareesooh gwidaani geeb afirhaab kiiki. Bareeh igarooyaahna umingaayiib ibrarna.

6 Oontꞌa taan taana hinee dehaay misaal ikatiin. Baraah idꞌiineet toomaag iginꞌaayeen bitdaayayi jillaay sooyeen hoon. 7 Gwadi bareesooh idꞌiineet toonaatiit, isanama baaꞌabiidna. Uuktaab "Uudehay tamtiiwwa, gwꞌitiiwwa jillaay nꞌati isꞌana, aree sakariibwa jikuuniibwa hawaateeb yakiyaan." indi. 8 Gwadi bareesooh idꞌiineet toonaatiit, hinin jikuuniib binyakayeet toonaatu, bareeh gaat yintiib tagwgwu mhay alfaab hooy iiyaan. 9 Gwadi bareesooh idꞌiineet toonaatiit, Wꞌankwana binjarrabayeet toonaatu, aree bareeh kwakwara idaarna. 10 Gwadi bareesooh idꞌiineet toonaatiit, baaꞌashkiimaana. Baraah umalak ukwidhsiiniinaay itoodaarna.

11 Taan taana bareeyooh dehaay misaal iiktiina, aree udamaani agiyaay nikweer akay hini sooti jillaay iktabna. 12 Aflaay baraak akraa tingadiineeb hiisteeneek, digwagwna baadhibaana! 13 Oodehayi bitik diimaab ikatiib ijarrabamti nuun baraak shaawti jarrabami kitdiina. Ukwaasana aree sidkiibu, baraak bitꞌadgirayneet toonaati mhakwal jarrabsi hookna kiidi. Laakiin baraak jarrabamteenihoob, baruuh han salal rhisi hookna indi, shaawti bariiyooh whii asti ingid tiyadna.

14 Aflaay isanaayaan, isanamaayee sigiina. 15 Ani oodehay yꞌafhamaab hadiidsamani, ani andiyeeb ibhali abiiyaakna hakimna. 16 Ookaas Wꞌankwanaay diraariib niyayeeb Ukwaasana haay nhamid. Been ookaas hooy gwꞌinayihoob, hinin Umasiihiib oobooy nimꞌadhiidh. Yhadhi inikatꞌeeb aree Umasiihiib ugarooy adhidh kiiki han? 17 Gaal hadhi uubhaat eefi akay, hinin kassaan gwidaaba, gaal garu nikati, kassaan aree gaal hadhi nimkatꞌi.

18 Israaꞌiili dehay shibibna: baliin tikaraama tameen tikaraamaati mhiiniib shariikiib kiikeena han? 19 Aflaay tikaraama usanamii dehaay farꞌat naat kitti miyaad han? Tari usanam naat kiiki han? 20 Abadan! Laakiin oodiin baabariin udehayiit karaama eejin ittiyeewiina, Ukwaasana kiiꞌattiyeewaayna. Aree baraak eejin shaarakteeneet toona kaahariw. 21 Baraak Wꞌankwanaay kaasii gwꞌeetiit ijini kaasii gwꞌiteenee dehaay kaꞌadgirtaana. Wꞌankwanaayt mꞌariitiit taawlaatii tameetiit ijineet taawlaatii tamteenee dehaay kaꞌadgirtaana. 22 Hinin Wꞌankwanaayt giira yayakisnayeet toona jarrabnay han? Hinin bariisoohka akrakaab han?

23 Naatka nidꞌeet toona soomamaaba, laakiin tikatiinaaka daayiit kitti. Naatka nidꞌeet toona soomamaaba, laakiin tikatiinaaka shamaamt kitti. 24 Gaal han ooknaayt daayiinaayt biihariiweet toonaatu, laakiin oodehay iraweet daayiinaayt yharriiweet toonaati.

25 Tooshaati suugiib tamamtiniit toona kastooh tamaana, iginꞌaayeekna teefeet toona aree baaraataana. 26 Uuktaab "Tuubuutwa tehooy teefi kastuuhwa Wꞌankwanaayt tikati." diyaabi.

27 Aamanaab baakaay gaal mꞌariitii dehaay waliikiiniyuukna, aree baraak giig tehariwneek, suurook daasamtiniit toona kastooh raattiib anu tamaana! 28 Laakiin gaal bareeyookna dehaay, "Tuun batuuh karaamaateeb attiyeewiyaati." indiyuukna, aflaay batooh baatamaana! Bareek sooyaab ootaki jillaaywa uginꞌiyooh jillaaywa baatamaana. 29 Barook kittaa, ootak uraawi ginꞌa asehariiw. Aniit tufadagooy oodehay irawi ginꞌaayee naanhooy haakamamtini? 30 Ani Ukwaasana hamidtiit mꞌariit tamaniyeek, ani ahamidaayt tamaneet timꞌari naanhooy titoorariib?

31 Aflaay tamteenihoob tari gwꞌiteenihoob tari tidꞌaneet toonaatiibka, kastooh Ukwaasanaay umatuunii dehaay dꞌiina. 32 Gaal han goofiit hooy baadꞌiina. Yahuudiib ikatiyeek tari Yoonaaniib ikatiyeek tari Ukwaasanaayt tukaniisi tikatiyeek goofiit hooy baadꞌiina. 33 Ani kasseeh oodehay kasseeh isalalaayee afirhistiib han aharriiw. Ani ooknaayiitu daayiinaay kaahariw, laakiin gwidaaneet daayiinaay aharriiw. Aflaay baraah eedhhaniin ikatiin.