1 Isanaayaan, oontꞌa Ishuuki miyaawu, ani gamaamt kaasehariw hookna. 2 Baraak diin bitbariinihoob, gwida kwidhi salala mitiyaamtaaniit sanamaab shuuk baabariin tꞌabidna. 3 Aflaay Ukwaasanaay Ishuukee bhaliiyiini gaal han, "Yasuuꞌa atooꞌitaab baꞌiikti!" indi kiihaay. Aree gaal han, "Yasuuꞌa Ankwanaabu" Eeshuuk Imugaddasaayee nuun indi kiihaay.

4 Gwida jinsaayi miyaaw eefi, laakiin Aashuuk gal ikatiin. 5 Gwida jinsaayeet khidma teefi, laakiin hinin been Wꞌankwana ookna shagaamnay. 6 Gwida jinsaayi shaga eefi, laakiin been Ukwaasana uukna kasseeh een bareeh kasseeh oodehayiib shagaamiini.

7 Shuuki miyaaw kasseen gaalka ittiyeewaay, aflaay taktak neeshtiimeet toona adgirnay. 8 Gaal nafar Aashuuk fagarandiiti mikriit hiila iyawna, weer aree baliin Aashuuk aakna kanaantiit diigwat iyawna, 9 baliin Aashuuk aakna weer aree win iimaan iyawna, weer aree Aashuuk aangal mheelti miyaaw iyawna, 10 weernaay dehaay mꞌuujisaat haay ikwasiyi akrir iyawna, weer aree siruudiit hiila iyawna, weer aree eeshuuk haay isfalliyi miyaaw iyawna, weer aree gwida bhaliyi hadiidti miyaaw iyawna, aree weer ibhali haay tarjamiiniyi miyaaw iyawna. 11 Aan baraah kassaah gaalnaay shaga ikatiina aree gal Shuuk ikatiina, aree baruuh bareeh gaalka iniiw, baruuh harriiweet hayꞌaatiika iniiw.

12 Umasiih gaal garu tꞌiiteebu, gwida garooy daf aree ibari, laakiin uun ugaru gwida daf ibariyeek han masi baruuh gaal garu ikati. 13 Oontꞌaaneet, hinin kassaan Iyahuudi tari Ijintiili, ikishiya tari yhirri, gal Shuukee gaal garooy kassaan nitoomaas. Kassaan aree gal Shuuk gwꞌinayeeb nittiyeewaay.

14 Ugaru uukna gal tarabee daamaab kiiki, laakiin gwida tarab ibari. 15 Uragad "Ani ayeeb kaakuuyt, ugarooy kaaki." indiyeek han, beet tuuna ugarooy kawaasta. 16 Wꞌangwiil "Ani gwꞌad kaakuuyt, ugarooy kaaki." indiyeek han, beet tuuna ugarooy kawaasta. 17 Ugaru kassuuh gwꞌad iiktiyeek, imaasiwi kak eemsiiw? Ugaru kassuuh angwiil iiktiyeek, ishiikamti kak baraamiini? 18 Laakiin Ukwaasana kasseeh itarab gaal garooy itaakwikw, bareeh gaalka aree baruuh yharriiweet toonaatiit ikwaas. 19 Baraah kassaah gal tarab iiktiineek, ugaru aree naad iikti? 20 Oontꞌaaneet, gwida daf eefeena, laakiin gaal garu eefi.

21 Uugwꞌad wꞌayii dehaay, "Kaahariw hook!" kiidi. Ugirma aree iragadaayee dehaay, "Kaahariw hookna!" kiidi. 22 Laakiin baliin ugarooy tarab nꞌakw ikatiin, bareeh anu naat nidꞌeet toona kaꞌadgirna. 23 Ugarooy tarab hinin shalikt takwi niyaweeb, hamooysiit winneet daayiib niwari. Ugarooy tarab daayiib baakay hiisnayeeb aree daayiib niwari. 24 Ugarooy tarab daawriib ikatiin daayi waraab kiihariwna. Laakiin Ukwaasana ugarooy tarab ishaawawiit, itarab inakwis daayiib hamooyisiya, 25 aflaay ugaru biiꞌadhaadheet toonaatu, laakiin ugarooy tarab taktakee dehaay indaalkiik ishbuub iyadna. 26 Tarab gal lhameeneek, itarab aaraw kassaah geeb lhameen. Tarab gal ishboobiineek, itarab aaraw kassaah afirheen.

27 Oontꞌa baraak Umasiihiib ugaru tikatiina, aree bareesookna gaalka bariiyooh ugarooy tarab tikatiina. 28 Tukaniisaatiib aree Ukwaasana hankaab linguumiyaab idꞌi, malya nabiyaab idꞌi, umhaya allamanaab idꞌi, malya aree timꞌuujisaati shagaamana idꞌi. Masi aree baliib mheelti miyaaw iibriinwa, baliib eeraw eeshtiimwa, baliib tꞌidaaraati miyaaw iibriinwa, baliib gwida bhali hadiideenwa idꞌi. 29 Aan baraah kassaah linguumiyaaba? Aan baraah kassaah nabiyaaba? Aan baraah kassaah allamanaaba? Aan baraah kassaah mꞌuujisaat ikwasiin han? 30 Aan baraah kassaah mheelti miyaaw ibariin han? Aan baraah kassaah gwida bhali hadiideena? 31 Laakiin baraak win miyaaw winneet tehariwna. Oontꞌa aree ani winneet daayi salal rhisi hookna andi.