2 Samuel 7

दाऊद कै गैल परमेसवर का करार

1 जिब राजा दाऊद अपणे भवन म्ह रह्या करदा, अर यहोवा नै उस ताहीं उसके च्यांरु ओड़ के सारे बैरियाँ तै आराम दिया था, 2 फेर एक दिन राजा नातान नाम के नबी तै कहण लाग्या, "देख, मै तो देवदार के बणे होए घर म्ह रहूँ सूं, पर परमेसवर का सन्दूक तम्बू म्ह रहवै सै।" 3 नातान नै राजा तै कह्या, "जो कुछ तेरे मन म्ह हो उस ताहीं कर; क्यूँके यहोवा तेरै गैल सै।"

4 उसे रात नै यहोवा का यो वचन नातान के धोरै पोहच्या, 5 "जाकै मेरे दास दाऊद तै कह, ‘यहोवा या कहवै सै, के तू मेरे रहण खात्तर घर बणवावैगा? 6 जिस दिन तै मै इस्राएलियाँ नै मिस्र तै लिकाड़ ल्याया आज कै दिन ताहीं मै कदे घर म्ह न्ही रह्या, तम्बू म्ह आया-जाया करुँ सूं। 7 जित्त-जित्त मै सारे इस्राएलियाँ के बीच फिरदा रह्या, के मन्‍नै किते इस्राएल के किसी गोत्र तै, जिसतै मन्‍नै अपणी प्रजा इस्राएल की चरवाही करण ताहीं ठैहराया सै, इसी बात कदे कही, के थमनै मेरे खात्तर देवदार का घर क्यूँ न्ही बणवाया?’ 8 इस खात्तर इब तू मेरे दास दाऊद तै इसा कह, ‘सेनाओं का यहोवा या कहवै सै, के मन्‍नै तो तेरे ताहीं भेड़शाला तै, अर भेड़-बकरियाँ कै पाच्छै-पाच्छै फिरण तै, इस इरादे तै बुला लिया के तू मेरी प्रजा इस्राएल का प्रधान हो जावै।*7:8 भजन संहिता 78:71 9 अर जित्त किते तू आया गया, ओड़ै-ओड़ै मै तेरे गैल रह्या, अर तेरे सारे दुश्मनां नै तेरे स्याम्ही तै नाश करया सै; फेर मै तेरे नाम नै धरती पै के बड़े-बड़े माणसां के नाम्मां के बराबर महान कर दियुँगा। 10 अर मै अपणी प्रजा इस्राएल खात्तर एक जगहां ठहराऊँगा, अर उसनै स्थिर करुँगा, ताके वो अपणी ए जगहां म्ह बसी रहवैगी, अर कदे घुमक्‍कड़ ना होवैगी; अर कुटिल माणस उसनै फेर दुःख ना देण पावैगें, जिस तरियां के पैहले करया करदे, 11 बल्के उस बखत तै भी जिब मै अपणी प्रजा इस्राएल कै उप्पर न्यायी ठहराया करदा; अर मै तन्‍नै तेरे सारे बैरियाँ तै आराम देऊँगा। यहोवा तेरे ताहीं या भी बतावै सै के यहोवा खुद ए तेरा घर बणावैगा। 12 जिब तेरी उम्र पूरी हो जावैगी, अर तू अपणे पुरखां कै गैल जा मिलैगा, फेर मै तेरे खास वंश नै तेरे पाच्छै खड़या करकै उसके राज्य नै स्थिर करुँगा। 13 मेरे नाम का घर वोए बणवावैगा, अर मै उसकी राजगद्दी नै सदा स्थिर राखूँगा।*7:13 1 राजाओं 5:5 14 मै उसका पिता ठहरूँगा, अर वो मेरा बेट्टा ठहरैगा। जै वो अधर्म करै, तो मै उसनै माणसां के लायक दण्ड तै, अर आदमियाँ कै लायक मार तै ताड़ना देऊँगा।*7:14 2 कुरिन्थियों 6:18, इब्रानियों 1:5, 12:7 15 पर मेरी करुणा उसपै तै इस तरियां न्ही हटैगी, जिस तरियां मन्‍नै शाऊल पै तै हटा ली थी अर उसनै तेरे आग्गै तै दूर करया था। 16 बल्के तेरा घराना अर तेरा राज्य मेरै स्याम्ही सदा अटल बण्या रहवैगा; तेरी गद्दी सदा बणी रहवैगी।’"*7:16 भजन संहिता 89:36-37, लूका 1:32-33 17 इन सारी बात्तां अर इस दर्शन के मुताबिक नातान नै दाऊद ताहीं समझा दिया।

दाऊद की प्रार्थना

18 फेर दाऊद राजा भित्तर जाकै यहोवा कै धोरै बैठ्या, अर कहण लाग्या, "हे प्रभु यहोवा, के कहूँ, अर मेरा घराना के सै, के तन्‍नै मेरे ताहीं याड़ै तक पोंहचा दिया सै? 19 तोभी, हे प्रभु यहोवा, या तेरी नजर म्ह छोट्टी सी बात होई; क्यूँके तन्‍नै अपणे दास के घराने कै बारै म्ह आग्गै के भोत दिनां ताहीं की चर्चा करी सै, हे प्रभु यहोवा, यो तो माणस का नियम सै। 20 दाऊद तेरे तै और के कह सकै सै? हे प्रभु यहोवा, तू तो अपणे दास नै जाणै सै! 21 तन्‍नै अपणे वचन कै निमित्त, अर अपणे ए मन कै मुताबिक, यो सारा बड़ा काम करया सै, कै तेरा दास उसनै जाण ले। 22 इस कारण, हे यहोवा परमेसवर, तू महान सै; क्यूँके जो कुछ हमनै अपणे कान्‍नां तै सुण्या सै, उसके मुताबिक तेरे बराबर कोए न्ही, अर ना तन्‍नै छोड़ कोए और परमेसवर सै। 23 फेर तेरी प्रजा इस्राएल कै भी तुल्य कौण सै? वो तो धरती भर म्ह एक ए जात्ति सै जिस ताहीं परमेसवर नै जाकै अपणी खास प्रजा करण नै छुड़ाया, ज्यांतै के वो अपणा नाम करै, (अर तेरे खात्तर बड़े-बड़े काम करे) अर तू अपणी प्रजा कै स्याम्ही, जिस ताहीं तन्‍नै मिस्री अर जात-जात के माणसां अर उनके देवत्यां तै छुड़ा लिया, अपणे देश म्ह भयानक काम करे। 24 अर तन्‍नै अपणी प्रजा इस्राएल नै अपणी सदा की प्रजा होण खात्तर ठैहराया; अर हे यहोवा, तू आप उसका परमेसवर सै। 25 इब हे यहोवा परमेसवर, तन्‍नै जो वचन अपणे दास के अर उसके घराने कै बारै म्ह दिया सै, उस ताहीं सदा खात्तर स्थिर कर, अर अपणे कहण कै मुताबिक ए कर; 26 अर या करकै माणस तेरे नाम की महिमा सदा करया करें, के सेनाओं का यहोवा इस्राएल कै उप्पर परमेसवर सै; अर तेरे दास दाऊद का घराना तेरे स्याम्ही अटल रहवै। 27 क्यूँके, हे सेनाओं के यहोवा, हे इस्राएल के परमेसवर, तन्‍नै या कहकै अपणे दास पै जाहिर करया सै, कै मै तेरा घर बणाए राखूँगा; इस कारण तेरे दास नै तेरे तै या प्रार्थना करण की हिम्मत होई सै। 28 इब हे प्रभु यहोवा, तू ए परमेसवर सै, अर तेरे वचन सत्य सैं, अर तन्‍नै अपणे दास ताहीं या भलाई करण का वचन दिया सै; 29 तो इब खुश होकै अपणे दास के घराने पै इसी आशीष दे, के वो तेरै स्याम्ही सदा बण्या रहवै; क्यूँके, हे प्रभु यहोवा, तन्‍नै इसाए कह्या सै, अर तेरे दास का घराना तेरे तै आशीष पाकै सदा धन्य रहवै।"