1 ये सब ऊणे ते बऊत साल बाद मतलब फारसो रे राजा अर्तक्षत्रो रे दिना रे, एज्रा नाओं रा एक यहूदी माणूं बाबेलो ते यरूशलेम शईरो खे गया। से सरायाह रा पाऊ था ओर सरायाह अजर्याह रा पाऊ था, अजर्याह हिल्किय्याह रा, 2 हिल्किय्याह शल्लूमो रा, शल्लूम सादोको रा, सादोक 3 अहीतूबो रा, अहीतूब अमर्याह रा, अमर्याह अजर्याह रा, अजर्याह मरायोतो रा पाऊ था, 4 मरायोत जरहयाह रा, जरहयाह उज्जीए रा, उज्जी बुक्कीए रा, 5 बुक्की अबीशूए रा, अबीशू पीनहासो रा, पीनहास एलीआजारो रा ओर एलीआजार हारूणो रा पाऊ था जो बड़ा पुरोईत था। 6 येई एज्रा मूसे री बिधान रे बारे दे, जो इस्राएलो रे यहोवा परमेशरे दित्ती थी, निपुण शास्त्री था ओर तेसरे यहोवा परमेशरो री दया जो तेस पाँदे रई, इजी बजा ते राजे तेसखे मूँ मांगेया वर दित्तेया। 7 तेबे तेसखे कई इस्राएली ओर पुरोईत, लेवी, गाणे वाल़े ओर द्वारपाल ओर मन्दरो रे सेवका बीचा ते कुछ लोक अर्तक्षत्र राजे रे सातुए साले यरूशलेम शईरो खे लईगे। 8 एज्रा राजे रे सातुए सालो रे पाँजुए मीन्ने दे यरूशलेम पऊँचेया। 9 पईले मीन्ने रे पईले दिने से बाबेलो ते चलेया ओर तेसरे परमेशरो री दया-दृष्टि तेस पाँदे रई, इजी बजा ते पाँजुए मीन्ने रे पईले दिने से यरूशलेम पऊँचेया। 10 कऊँकि एज्रे यहोवे रे बिधान रा मतलब सिखणे ओर तिजी खे मानणे ओर इस्राएलो रे बिधि ओर नियम सिखाणे खे आपणा मन लगाया था।

11 जो चिट्ठी अर्तक्षत्र राजे एज्रा खे जो पुरोईत ओर बिधानो खे सिखाणे वाल़ा था दित्ती, इस्राएलो खे यहोवे जो आज्ञा ओर बिधिया दित्तिया तिना रे बारे दे एज्रा अच्छी तरआ ते जाणो था, ये तेते चिट्ठिया री नकल ये ए, 12 एज्रा पुरोईतो रे नाओं जो स्वर्गो रे परमेशरो रा पूरा शास्त्र जाणने वाल़ा ए, तेसखे अर्तक्षत्र महाराजाधिराजो रिया तरफा ते। 13 आऊँ ये आज्ञा देऊँआ कि मेरे राज्य दे जितणे इस्राएली ओर तिना रे पुरोईत ओर लेवी लोक आपणी इच्छा ते यरूशलेम शईरो खे जाणा चाओ, सेयो तां साथे जाई सकोए। 14 तूँ तो राजा ओर तेसरे सातो सलाहकारा रिया तरफा ते इजी खे पेजेया, ताकि आपणे परमेशरो रे बिधानो रे बारे दे जो तांगे ए, यहूदा ओर यरूशलेम शईरो री दशा जाणी लो, 15 ओर जो सूईना-चाँदी, राजा ओर तेसरे सलाहकारे इस्राएलो रे परमेशरो खे जेसरी रणे री जगा यरूशलेम शईरो दे ए, आपणी इच्छा ते देई राखेया, 16 ओर जितणा सूईना-चाँदी सारे बाबेल राज्य ते ताखे मिलणा ओर जो कुछ लोक ओर इस्राएलो रे पुरोईत आपणी इच्छा ते आपणे परमेशरो रे मन्दरो खे जो यरूशलेम शईरो दे देओगे, तिजी खे लई जा। 17 ओर एते तअनो ते फटाफट बल़द, खाडू ओर मिन्टू खरीद ओर तिना रे साथो खे जितणा नज्ज ओर तेल चाईयो बलि करने खे सब खरीद। तेबे इना सबी चीजा खे लई जाई की यरूशलेम शईरो दे परमेशरो रे मन्दरो दे चढ़ाई दे। 18 ओर जो चाँदी-सूईना बची जाओगा, तेते बीचा ते जो कुछ ताखे ओर तेरे पाईया खे ठीक लगो, सेई आपणे परमेशरो री इच्छा रे मुताबिक करना। 19 तेरे परमेशरो री आराधना करने खे जो पांडे तांगे सम्बाल़े जाओए, सेयो यरूशलेम शईरो दे परमेशरो रे मन्दरो दे राखी देणे। 20 इना ते अलावा जो कुछ ताखे आपणे परमेशरो रे मन्दरो खे जरूरत लगो, से राज खजाने ते लई लणा। 21 आऊँ अर्तक्षत्र राजा ये आज्ञा देऊँआ कि तुसे सब लोक जो फरात नदिया री पच्छमा दे राजे रे खजांची ए, तिना खे आज्ञा देऊँआ कि एज्रा पुरोईत, जो स्वर्गो रे परमेशरो रे बिधानो रा शास्त्री ए, तुसा लोका ते जो कुछ माँगो, से तेसखे देणा। 22 मतलब 3,400 किलो चाँदी, 10,000 किलो कणक, 2,000 लीटर तक अंगूरा रा रस, 2,000 लीटर जैतूनो रा तेल ओर जितणा लूण चाईयो तितणा देणा। 23 जो-जो आज्ञा स्वर्गो रे परमेशरो रिया तरफा ते मिलो, ठीक तिजी रेई मुताबिक स्वर्गो रे परमेशरो रे मन्दरो खे करेया जाओ, राजा ओर राजकुमारा पाँदे ओर राज्य पाँदे परमेशरो रा रोष नि पड़कणा चाईयो। 24 तेबे आऊँ तुसा खे बताई देऊँआ कि परमेशरो रे तेस मन्दरो रे केसी पुरोईत, लेविये, गाणे वाल़े, द्वारपाल, मन्दरो दे सेवा करने वाल़े या ओर केसी सेवको ते कर या जमीना रा कर लणे री आज्ञा नि ए।

25 तेबे ओ एज्रा! तेरे परमेशरे जो बुद्धि ताखे देई राखी तिजी रे ई मुताबिक न्यायी ओर बिचार करने वाल़े नियुक्त कर जो फरात नदिया रिया पच्छमा रिया जगा दे रणे वाल़े तिना सबी लोका बीचा ते जो तेरे परमेशरो रे बिधानो खे जाणोए, न्याय करेया करो ओर जो तिना खे नि जाणदे ओ, तिना खे तुसे सिखाया करो। 26 जो कोई तेरे परमेशरो रे बिधान ओर राजे रे बिधानो खे नि मानोगा, तेसखे सख्त ते सख्त सजा देणी, चाए मौती री सजा, चाए देश निकाल़ा, चाए तेसरी सारी तअन-दौलत लणा, चाए कैद करना।

27 तेबे एज्रे बोलेया, "तन्य ए म्हारे पितरा रा यहोवा परमेशर, जिने एड़ी इच्छा राजे रे मनो दे पैदा कित्ती कि यरूशलेम शईरो दे यहोवे रे मन्दरो री मरम्मत कराओ, 28 ओर मां पाँदे राजा ओर तेसरे सलाहकार ओर राजे रे सब बड़े परदान दयालु कित्ते, मेरे परमेशर यहोवे री दया-दृष्टि, जो मां पाँदे ए, इजी रे मुताबिक मैं ईम्मत कित्ती ओर इस्राएलो बीचा ते खास लोक कट्ठे कित्ते, ताकि सेयो मां साथे चलो।"