Neemias 9

पापो रा मानणा

1 तेबे सातुए मीन्ने रे चौबिये दिने इस्राएली बअरतो री टाट पईनी की ओर सिरो पाँदे तूड़ लटी की कट्ठे ऊए। 2 तेबे इस्राएलो रे कुलो रे सब लोक दूजी जातिया रे लोका ते लग ऊईगे ओर खड़े ऊई की, आपणे-आपणे पाप ओर आपणे बुजुर्गा रे पापो रे काम मानी ले। 3 तेबे तिने आपणी-आपणी जगा पाँदे खड़े ऊई की दिनो रे एकी पईरो तक आपणे यहोवा परमेशरो रे बिधानो री कताब पढ़दे रये ओर दूजे पईरो दे आपणे पाप मानदे ओर आपणे परमेशर यहोवे गे माथा टेकदे रये। 4 ओर येशुअ, बानी, कदमिएल, शबन्याह, बुन्नी, शेरेब्याह, बानी ओर कनानिये लेविया री पईड़िया पाँदे खड़े ऊई की जोरे की आपणे परमेशर यहोवे री दुहाई दित्ती। 5 तेबे येशुअ, कदमिएल, बानी, हशब्नयाह, शेरेब्याह, होदिय्याह, शबन्याह ओर पतह्याह नाओं रे लेविया रे परदाने बोलेया, खड़े ऊई जाओ, आपणे परमेशर यहोवे खे शुरूओ ते लई की अन्तो तक तन्य बोलो। तेरे महिमा जोगे नाओं खे तन्य बोलेया जाओ, जो सारे तन्यवाद ओर स्तुतिया ते पोरे ए।

6 फेर इस्राएली लोके बोलेया, तूँ ई कल्ला यहोवा ए; सर्ग बल्कि सबी ते ऊच्चे स्वर्ग ओर सब गण, ओर तरती ओर जो कुछ तिदे ए ओर समुद्र ओर जो कुछ तिदे ए, सब तैं ई बणाया, ओर सबी री रक्षा तूँ ई करेया; ओर स्वर्गो रे सारे स्वर्गदूत तांगे ई माथा टेकोए।*9:6 बिध. 6:4, निर्ग. 20:11 7 ओ यहोवा! तूँ सेई परमेशर ए, जो अब्रामो खे चूणी की कसदिया रे ऊर शईरो ते निकयाल़ी की ल्याया, ओर तेसरा नाओं अब्राहम राखेया; 8 ओर तेसरे मनो खे आपू साथे सच्चा पाई की, तेस साथे वाचा बानी, कि मां तेरे कुलो खे कनानिया, हित्तिया, एमोरिया, परिज्जिया, यबूसिया, ओर गिर्गाशिया रा देश देणा; ओर तैं आपणा से वचन पूरा बी कित्तेया, कऊँकि तूँ तर्मी ए। 9 तेबे तैं मिस्रो दे म्हारे बुजुर्गा रे दु:ख देखे; ओर लाल समुद्रो रे कनारे तिना री मतादा रिया तँईं प्रार्थना सुणी। 10 ओर फिरौन ओर तेसरे सब कर्मचारी बल्कि तेसरे देशो रे सबी लोका खे दण्ड देणे खे नशाण ओर चमत्कार दखाए; कऊँकि तूँ जाणे था कि सेयो तिना ते सख्त बर्ताओ करोए; ओर तैं आपणा एड़ा बड़ा नाओं कित्तेया, जेड़ा आजके बखतो तक ए। 11 ओर तैं तिना ते आगे समुद्रो रे एड़े दो इस्से कित्ते, कि सेयो समुद्रो बीचे सुकी जमीना दे पैदल चली की पार ऊए; ओर जो तिना पीछे पड़ी रे थे, सेयो तैं डूगी जगा रे एड़े सेटी ते, जेड़ा पात्थरो खे समुद्रो दे सेटोए। 12 तेबे तैं दिने बादल़ो रे खम्बे दे ऊई की ओर राती आगी रे खम्बे दे ऊई की तिना री अगुआई कित्ती, ताकि जेते बाटा रिये तिना खे चलणा था, तिदे तिना खे प्रयासा मिलो। 13 तेबे तैं सीनै रे पाह्ड़ो पाँदे उतरी की सर्गो ते तिना साथे गल्ला कित्तिया, ओर तिना खे सीदे बिधि, सच्चा बिधान, ओर अच्छी बिधिया ओर आज्ञा दित्ती। 14 तिना खे तिना रे रामो रे दिनो रे बारे दे सिखाया, ओर आपणे दास मूसे रे जरीये आज्ञा, बिधिया ओर बिधान दित्तेया। 15 ओर तिना री पूख मटयाणे खे सर्गो ते तिना खे रोटी दित्ती ओर तिना री त्याय खत्म करने खे पात्थरा ते तिना खे पाणी काडेया, ओर तिना खे आज्ञा दित्ती कि जेस देशो खे तुसा खे देणे री मैं कसम खाई राखी, तेतेरे अधिकारी ऊणे खे तुसे तिदे जाओ।*9:15 यूह. 6:31 16 पर तिने ओर म्हारे बुजुर्गे कमण्ड कित्तेया ओर टीठ बणी गे ओर तेरी आज्ञा नि मानी; 17 ओर तिने आज्ञा मानणे ते ना कित्ती, ओर जो अचम्बे रे काम तैं तिना बीचे कित्ते थे, सेयो याद नि कित्ते, बल्कि टीठ बणी की एथो तक बगावत करने वाल़े बणे, कि तिने एक परदान ठराया, ताकि आपणी गुलामिया री दशा दे वापस ओ। पर तूँ माफ करने वाल़ा अनुग्रह करने वाल़ा, दयालु, देरिया ते रोष करने वाल़ा, ओर बऊत करूणामयी परमेशर ए, तैं सेयो नि त्यागे। 18 बल्कि जेबे तिने बाच्छूए री मूर्ति बणाई की बोलेया, तुसा रा परमेशर जो तुसा खे मिस्र देशो ते छुड़ाई की ल्याई राखेया, से येई ए, ओर तेरी बऊत बेज्जती कित्ती, 19 तेबे बी तूँ जो बऊत दयालु ए, सेयो जंगल़ो दे नि छाडे; ना तो दिने अगुआई करने वाल़ा बादल़ो रा खम्बा, ना राती प्रयासा देणे वाल़ा ओर तिना खे बाट दखाणे वाल़ा आगी रा खम्बा तिना पाँदा ते टाया। 20 बल्कि तैं तिना खे समजयाणे खे आपणी आत्मा जो खरी ए दित्ती, ओर आपणा मन्ना तिना खे खुलाणा नि छाडेया, ओर तिना री त्याय मिटाणे खे तिना खे पाणी देंदा रया। 21 चाल़िया साला तक तूँ जंगल़ो रे तिना खे एड़ा पाल़दा रया, कि तिना खे कोई कमी नि ऊई; ना तो तिना रे टाल्ले पुराणे ऊए ओर ना ई तिना रे पैरा दे सोजा आया। 22 तेबे तैं राज्य-राज्य ओर देशो-देशो रे लोक तिना रे वशो दे करीते ओर चऊँ कनारे सेयो बांडी ते; ईंयाँ सेयो हेशबोन शईरो रे राजा सिहोन ओर बाशानो रे राजा ओग, तिना दूनी रे देशो रे परदान ऊईगे। 23 तेबे तैं तिना री ल्वादा खे सर्गो रे तारेया जेड़ी बढ़ाई की सेयो तेते देशो दे पऊँचाई ते, जेतेरे बारे दे तैं तिना रे बुजुर्गा खे बोलेया था; कि सेयो तिदे जाई की तेथो रे अधिकारी ऊई जाणे। 24 तो ये ल्वाद जाई की तेथो रे अधिकारी ऊईगे, ओर तैं तिना रे जरीये देशो रे रणे वाल़े कनानी दबाये, ओर राजेया ओर देशो रे लोका समेत सेयो, तिना रे आथो दे करीते, ताकि सेयो तिना साथे जो चाओ से करो। 25 तेबे तिने गढ़वाल़े शईर ओर उपजाऊ जमीन लई ली, ओर सब प्रकारा री अच्छी चीजा साथे परे रे कअरा रे, ओर खणे रे अऊदा रे, ओर दाख ओर जैतूना रे बगिचेया रे, ओर खाणे वाल़े फला रे बऊती डाल़ा रे अधिकारी ऊईगे; सेयो तिना खे खाई-खाई की रज्जी गे; ओर अट्टे-कट्टे ऊईगे, ओर तेरी बड़ी पलाईया रिया बजा ते सुखी ऊई की रणे लगे। 26 पर सेयो तांते फिरी की बगावत करने वाल़े बणी गे ओर तेरा बिधान त्यागी ता, ओर तेरे जो नबी तेरी तरफा खे फिरने खे तिना खे बतांदे रये तिने सेयो काईते, ओर तेरी बऊत बेज्जती कित्ती। 27 इजी बजा ते तैं सेयो तिना रे दुश्मणा रे आथो रे करीते, ओर तिने सेयो मुसीबता रे पाई ते; तेबे बी जेबे-जेबे सेयो मुसीबता रे पड़ी की ताखे पुकारदे रये तेबे-तेबे तूँ स्वर्गो ते तिना री प्रार्थना सुणदा रया; ओर तूँ जो बड़ा दयालु ए, इजी री खातर तिना खे छुड़ाणे वाल़े पेजदा रया जो तिना खे दुश्मणा रे आथो रे छुड़ाओ थे। 28 पर जेबे-जेबे तिना खे चैन मिलेया, तेबे-तेबे सेयो फेर तां सामणे बुराई करदे रये, इजी बजा ते तूँ तिना खे दुश्मणा रे आथो दे करी देओ था, ओर तेबे तिना रे दुश्मण तिना पाँदे राज करो थे; तेबे बी जेबे सेयो फिरी की तांते प्रार्थना करो थे, तेबे तूँ स्वर्गो ते तिना री प्रार्थना सुणे था ओर तूँ जो दयालु ए, इजी री खातर बार-बार तिना खे छुड़ाए था, 29 ओर तूँ तिना खे चतौणी दे था, कि सेयो तेरे बिधि ओर बिधानो खे मानदे रओ। पर सेयो कमण्ड करदे रये ओर तेरी आज्ञा खे नि मानो थे, ओर तेरे नियम, जिना खे अगर माणूं मानो, तो तिना रिया बजा ते जिऊँदे रओ, पर म्हारे बुजुर्ग बिधानो रे खलाफ पाप करदे रये, ओर हठ करी की कमण्ड करो थे ओर सुणो नि थे। 30 तूँ तो कई साला तक तिना री सयींदा रया, ओर आपणी आत्मा साथे नबिया रे जरीये तिना खे बतांदा रया, पर सेयो कान नि लगाओ थे, इजी बजा ते तैं सेयो देशो-देशो रे लोका रे आथो रे करीते। 31 तेबे बी तैं जो बड़ा दयालु ए, तिना रा अन्त नि कित्तेया ओर ना सेयो त्यागे, कऊँकि तूँ अनुग्रह करने वाल़ा ओर दयालु परमेशर ए। 32 एबे तो ओ म्हारे परमेशर! ओ महान ओर पराक्रमी डरो जोगे परमेशर! जो आपणा वादा मानदा ओर करूणा करदा रई रा, जो बड़ा कष्ट, अश्शूरो रे राजेया रे दिना ते लई की आजके दिनो तक आसा खे ओर म्हारे राजेया, परदान, पुरोईत, नबी, बुजुर्ग, बल्कि तेरी सारी प्रजा खे पोगणा पड़ेया, से तेरी नजरा दे थोड़ा नि ठईरो। 33 तेबे बी जो कुछ आसा पाँदे बीती रा तिजी रे बारे दे तूँ तो तर्मी ए; तैं तो सच्चाईया साथे काम करी राखेया, पर आसे दुष्टता करी राखी। 34 ओर म्हारे राजे, ओर परदानो, पुरोईत ओर बुजुर्गे, ना तो तेरा बिधान मानेया ओर ना तेरी आज्ञा ओर चतौणिया पाँदे त्यान दित्तेया, जिना साथे तैं तिना खे बताया था। 35 तिने आपणे राज्य रे, ओर तैं बड़े कल्याणो रे बखते जो तिना खे तैं दित्तेया था, ओर एस लाम्बे-चौड़े ओर उपजाऊ देशो रे तेरी सेवा नि कित्ती; ओर ना आपणे बुरे कामो ते पश्चाताप कित्तेया। 36 देख, आसे आजकाल दास ए; जो देश तैं म्हारे पितरा खे दित्तेया था कि तेतेरी खरी उपज खाओ, इदे ई आसे दास ए।*9:36 एज्र. 9:9, बिध. 28:48 37 एतेरी उपजा ते तिना राजेया खे जो तैं म्हारे पापो रिया बजा ते आसा पाँदे ठराई राखे, बऊत तअन मिलोआ; ओर सेयो म्हारे शरीर ओर डांगरा पाँदे आपणी-आपणी इच्छा रे मुताबिक राज करोए, इजी बजा ते आसे बड़ी मुसीबता रे पड़ी रे।

वाचा रा बानणा

38 इना सबी गल्ला रिया बजा ते, आसे सच्चाईया साथे वाचा बानूँए, ओर लिखी बी देऊँए, ओर म्हारे परदान, लेविये, ओर पुरोईत तेते पाँदे छाप लगाओए।