1 ज़ैखन तैन बीती जेव, त फिरी अम्बरे मां अक बड़ो आजीब निशान लेइहोव। मतलब अक कुआन्श ज़ै चाँदनी पुड़ खड़ीए ते तैसां ज़ैना लिगड़ां लेवरन तैना दिहाड़ेरे ज़ेरां लेइहोतन। ते तैसेरे अपने दोग्गे पुड़ ताज लेवरू थियूं ज़ैस पुड़ 12 तारे थिये। 2 तै दोज़ींती भोइ, ते चिन्डां मारती थी; किजोकि तैस बच्‍चो ज़ानेरी तकलीफ थी। 3 ते अक होरो निशान अम्बरे मां लेइहोव, ते हेरा; अक बड़ो लाल अजगर (यानी शैतान) थियो, तैसेरी सत क्रोड़ी ते दश शिन्गां थियां, ते तैसेरे क्रोड़न पुड़ सत ताजां थियां। 4 ते तैसेरे पौंछ़ड़न अम्बरेरे तारां केरि अक तिहाई ज़मीनी पुड़ आनी, ते तै अजगर तैस कुआन्शरे सामने खड़ो भोव ज़ै दोज़ींती थी, कि ज़ैखन तै बच्‍चो ज़ाए त तै बच्‍चे तैस खाए। 5 तैखन तैस कुआन्शां मट्ठू ज़ाऊ, तैन अजगरे न खेइ बटु किजोकि तैन अकदम परमेशरे ते तैसेरे तखते कां आनू जेव। तैन मट्ठू सारी कौमन पुड़ लोंहेरे डण्डे सेइं राज़ केरेलू। 6 ते ई कुआन्श जंगले जो नश्शी, ज़ैड़ी परमेशरेरे तरफां तैसेरेलेइ अक ठार तियार कोयोरी थी, कि तैड़ी 1260 दिहाड़न तगर तैसेरी हेरगेश की गाए।

7 फिरी सुर्गे पुड़ लड़ाई भोइ, मीकाईल ते तैसेरे स्वर्गदूत अजगरे सेइं लड़ने लेई निस्से, ते अजगर ते तैसेरे दूतन सेइं लड़े। 8 अजगरे लड़ाई हारी, ते फिरी तैना सुर्गे मां न रेइ बटे। 9 एल्हेरेलेइ तै त तैसेरे दूत धेरती पुड़ शारे, तैए बड्डो अजगर, ई तैए ज़ै बड़े पेइले सप्पेरे रूपे मां बांदो भोवरो थियो, ज़ेसेरू नवं शैतान या दोष लानेबालोए। तैए आहे ज़ै दुनियारे लोकन धोखे देने लगोरोए। 10 फिरी मीं सुर्गेरां ई बड़ी आवाज़ एइती शुनी, "कि हुनी परमेशर अपने लोकन बच़ालो! हुनी तै अपनि शक्ति इस्तेमाल केरेलो ते राज़ेरू ज़ेरू राज़ केरेलो! हुनी तैसेरो मसीह दुनियाई पुड़ अधिकार रखेलो! किजोकि हुनी शैतान इश्शे परमेशरेरे हज़ूरी मां खड़ो न रेइ बटेले कि इश्शे साथी सेवकन पुड़ रात दिहाड़ी दोष लाए। तै सुर्गे मरां शारो जेवरोए। 11 ते तैनेईं गबड़ेरे खूनेरे वजाई सेइं ते अपने गवाहेरे वचनेरे वजाई सेइं, तैस पुड़ ज़ींत हासिल की, ते तैनेईं अपने प्राण ट्लारे न समझ़े, इड़ी तगर की मौतरी भी परवाह न की। 12 एल्हेरेलेइ तुस सब ज़ैना इड़ी सुर्गे मां राने बालेथ खुश भोथ। पन हे धेरतली ते कने समुन्दरे मां रानेबालव तुसन पुड़ अफ़सोस! किजोकि शैतान बड़े क्रोधे सेइं तुसन कां एजनेबालोए, किजोकि तै ज़ानते कि तैसेरो आखरी वक्त एजनेबालो।"

13 ते ज़ैखन अजगरे समझ़ू, कि अवं ज़मीनी पुड़ जो शारोरो, त तैस कुआन्शी पत्ती दौड़ो ज़ैसां मट्ठू ज़ावरू थियूं। 14 पन परमेशरे तैस कुआन्शी उकाबेरां दूई बड्डां फंघां दित्तां, कि अजगरे करां उडरतां जंगले मां तैस ठैरी पुज़्ज़े, ज़ैड़ी सड़े ट्लाई सालन तगर तैसेरी हेरगेश भोवरी थी, ताके तैड़ी अजगर न पुज़ी बटे। 15 फिरी अजगरे तैस कुआन्शी पत्ती अपने ऐशी सेइं दरियारू ज़ेरू पानी शारू, कि तैस इस दरियाए सेइं रुड़े। 16 तैस कुआन्शरी मद्दत केरनेरे लेई ज़मीनां तैन पानी पियूं ज़ैन तैस अजगरेरे ऐशी मरां निसोरू थियूं। 17 ते अजगर कुआन्शी जो सेरकोव। एल्हेरेलेइ तैने कुआन्शरे औलादी सेइं लड़ाई केरनेरू एलान कियूं। तैना लोक ज़ैन परमेशरेरे हुक्म मनतन, ते यीशुएरी दित्तोरी शिक्षाई पुड़ च़लतन। 18 तैखन अजगर जेव, ते समुन्दरेरे बन्ने पुड़ खड़ो भोव।